Azərbaycan Prezidenti tərəfindən həyata keçirilən islahatlar ölkəmizin dinamik inkişafının gətirdiyi yeni keyfiyyət mərhələsində reallaşır və kompleks xarakter daşıyır. İslahatların birinci mərhələsi əsasən qanunvericilik və institusional sahələri əhatə etdi və dərhal sonra struktur və kadr islahatlarına keçid başlandı.

Əslində bu ardıcıllıq həyata keçirilən islahatların müxtəlif komponentlərini özündə birləşdirməklə onun tamlığından xəbər verir. Hazırkı mərhələ daha çox kadr islahatları mərhələsi kimi görünsə də, bir qədər diqqət etsək, kadr islahatlarının digər komponentləri ilə paralel həyata keçirildiyini görə bilərik. 2015-ci ildən qəbul edilən qərarlar, imzalanan sərəncam və fərmanlar dediklərimizi təsdiq edir və xeyli sahədə nazir vəzifələrinə qədər mühüm dəyişikliklərin olduğunu göstərir. Son dəyişiklər isə kadr islahatlarında daha yuxarı idarəetmə strukturlarını əhatə etdiyi üçün daha çox diqqət cəlb edir. Bu dəyişikliklər kadr islahatlarının daha da dərinləşməsi kimi qiymətləndirilməlidir. Ancaq bu proses, sadəcə, kadrların dəyişməsi deyil, həm də idarəetməyə yeni keyfiyyət dəyişikliyinin gətirilməsi kimi nəzərdən keçirilməlidir.

Təəssüflər olsun ki, Azərbaycanın bəzi rayonlarında bu islahatların hətta heç xəfif küləyi də hiss olunmur. İnsanlar yalnız dövlət televiziyasına baxanda islahatların aparıldığı xəbərini eşidir və qulaqlarına inanmırlar. Onların qulaqlarına qurğuşun tökən yerli icra hakimiyyəti başçıları hələ də özlərini "kiçik padşah" kimi aparırlar. Daha pisi budur ki, bəzən onların "qara vəzir"ləri daha böyük səlahiyyətlərə malik olur, kəsdikləri başa görə sorğu-sual olunmurlar. Goranboy rayon rəhbərliyində olduğu kimi.

Sadiq oxucularımız bir neçə gün əvvəl Goranboy rayonunda ikihakimiyyətlilik mövzusunda qələmə aldığımız məqaləni yəqin ki xatırlayarlar. Məqalədə söhbət vaxtilə rayonda I müavini işləmiş Ceyhun Həsənovun sensasion şəkildə yenidən həmin vəzifəyə qayıtmasından, hazırkı icra başçısı Məhərrəm Quliyevdən daha keçərli söz sahibi olmasından, özünə yaxın, sözü ilə oturub-duran məmur ordusu formalaşdırmasından gedirdi.

Üzvləri sırasında rayon maliyyə idarəsinin rəisi İltifat Sadıqovun, rayon Suvarma Sistemləri İdarəsinin rəisi Gündüz Bağırovun,  Mənzil Kommunal Təsərrüfatı İstesalat Birliyinin rəisi Daşqın Hacıyevin adlarını çəkmiş, onların çevirdikləri işdəycələrdən bəhs etmişdik. Bizim üçün sevindirici haldır ki, rayon ictimaiyyətinin məqaləyə reaksiyası özünü çox gözlətmədi - redaksiyamıza Goranboy sakinlərindən zənglər gəldi. Əlaqə saxlayanların bəziləri yazdıqlarımızı təsdiqləyir, hətta rayon rəhbərliyinin idarəetmədə yol verdiyi nöqsanlar barədə daha müfəssəl məlumatlar verə biləcəklərini deyirdilər. Digər bir qisim isə əksinə, Məhərrəm Quliyevin və RİH başçısı aparatının üzvlərinin fəaliyyətindən razı olduqlarını bildirirdilər. Təbii ki, biz hər iki tərəfin fikirlərinə hörmətlə yanaşırıq. Amma gözüyumulu inanmağa da borclu deyilik. Jurnalist olaraq öz növbəmizdə faktlara istinad etməyi vacib hesab edirik.

İndi isə görək faktlar nə deyir: Gəlin ondan başlayaq ki, Ceyhun Həsənovun bir vaxtlar dövlət qulluqçusu ola-ola həm də bizneslə məşğul olmasını Goranboyda uşaqdan-böyüyə hamı bilir. Bundan əlavə, onun əlil olması barədə informasiyalar hələ də internet resurslarında qalımaqdadır. Dövlət qulluğu ilə sahibkarlıq fəaliyyətini bir araya sığdıran Ceyhun Həsənov həmin məlumatları rəsmən təkzib etməyib. RİH başçısı Məhərrəm Quliyevin icra hakimiyyəti aparatında apardığı özünəməxsus kadr islahatı da (əgər buna islahat demək mümkünsə) yerli ziyalıları məmnun etmir. Çünki, son on ildə rayonda yetərincə savadlı, ali təhsilli, dövlət qulluğunda çalışmağı haqq etmiş gənc mütəxəssislər yetişib. Onların öz doğma rayonlarında idarəetmə işindən kənarda qalması, əksinə, Məhərrəm Quliyevin keçmiş kadrlara, xüsüsəndə onların dövründə rayonda korrupsiyanın tüğyan etməsi kimi faktları yaradanlara rəhbərlik edənlərə, "intriqant" lara üstünlük verməsi narazılıq doğurur.

Yeri gəlmişkən, "intriqant" sözünü səbəbsiz yerə işlətmədik. Adlarını çəkdiyimiz vəzifəli şəxslərin nifaqçı əməllərinə dair çoxsaylı məlumatlar vardır. Belə ki, Rayon Suvarma Sistemləri İdarəsinin rəisi Gündüz Bağırov RİH başçısının birinci müavini Ceyhun Həsənovun qrupunda yer almaqla, Subartezian Quyularının İstismarı İdarəsinin rəisi Rauf Teyyubovun sıxışdırılması senarisinin həyata keçirilməsinə əhəmiyyətli töhfələr verir. Belə ki, başçının yanında keçirilən iclaslarında, Prezident Administrasiyasından təşrif buyuran hörmətli qonaqların gözü qarşısında Rauf Teyyubovun fəaliyyətindən narazı olan su istifadəçilərinə şikayətlərini ifadə etmələri üçün geniş meydan verilir, bununla da idarə rəisini gözdən salmağa hesablanmış plan tədricən reallaşdırılır. Məlumata görə, SQİİ rəisinin nişangaha gəlməsinin səbəbi onun korruptiv təkliflərə dəstək verməməsi, Ceyhun Həsənovun onu "görməyə gözünün olmamasıdır".

Bir vaxtlar rayonun Dəliməmmədli şəhər bələdiyyəsinin sədri işləmiş və adı qanunsuz torpaq satışında hallanan zaman ölkəni tərk edərək Ukraynaya üz tutan Daşqın Hacıyevin (Pedaksiyadan, Kecmiş bələdiyyə sədrinin Ukraynada nələrlə qarşılaşdığı haqda Dəliməmmədli qəsəbə sakinlərinin nələr danışdığı gələn sayımızda)  rayonun mənzil-kommunal təsərrüfatının rəhbər vəzifəyə irəli çəkilməsi də intriqalarla müşayiət olunmuşdur. Bu mövzuda əvvəlki məqalədə qedy olunmuşdu ki, rayon Suvarma Sistemləri İdarəsinin rəisi Gündüz Bağırov kecmiş bələdiyyə sədrinə yanında vəzifə verərək iyerarxia nərdivanında irəliləməsi üçün yolunu acmışdı. məsələ burasındadır ki, Daşqın Hacıyevin təyinatına qədər MKTB-nin rəisi işləmiş Müşfiq müəllimin işdən kənarlaşdırılması da xeyli cavabsız suallar doğurmuşdur. Bu barədə təfərrüatları əks etdirən məlumatlar redaksiyamızda dəqiqləşdirilmə mərhələsindədir.

Ötənki yazımızdan bir məqamı da xatırlatmağa dəyər ki, Rayon İcra Hakimiyyətinin Başçısı aparatının Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsinə Göranboy rayonu üzrə Maliyyə İdarəsinin rəisi İltifat Sadıqovun oğlu, o vaxtadək icra hakimiyyətində kiçik vəzifə tutan Sərdar Sadıqov irəli çəkilib. Ceyhun Həsənov qalmaqallı şəkildə yenidən səhnəyə çıxanda məhz bu vəzifəyə gəlmiş, iki ay sonra birinci müavin kürsüsünə keçmişdi. Sərdar Sadıqovun ərazi icra nümayəndələrinə, bələdiyyə sədrlərinə nəzarət edən şöbənin müdiri vəzifəsini Ceyhun Həsənovdan təhvil alması o deməkdir ki, o da ağzında birinci müavinin dilini daşıyır.

Noyabrın son günlərində KİV-də məlumat yayıldı ki, Məhərrəm Quliyev öz sələfi, sabiq icra başçısı Nizaməddin Quliyevin fəaliyyətini yoxlatdırır. Bildirilir ki, Nizaməddin Qulievin hakimiyyəti dönəmində rayon rəhbərliyindən perik düşən Ceyhun Həsənov, Daşqın Hacıyev və başqaları bu yolla sabiq başçıdan və onun hələ də vəzifədə qalan bəzi kadrlarından qisas almaq niyyətindədirlər.Bu arada qeyd edək ki, bir vaxtlar Göranboy rayonunda icra başcısı işləmiş Nizaməddin  Quliyevin həbs xəbəri yayılıb.
Maraqlıdır ki, yoxlama əhatə etdiyi dövrdə hər hansı pozuntular aşkar edərsə, "padşah və vəzir" onun mənfi nəticələrindən "xəzinədar"ı - maliyyə rəisi İltifat Sadıqovu necə qoruya biləcəklər?

Sərkərdə Leonidin başçılıq etdiyi 300 spartalının Fermopil keçidini qoruyaraq fars ordusunun qarşısını kəsməsi barədə qədim dünya tarixi dərsliyini oxumuş hamı xəbərdardır. Natamamlıq kompleksi olan bir əlil spartalı farslara spartalıların arxasına keçmələri üçün dağın arasından yol göstərir. Xəyanət nəticəsində Leonid tələyə düşür. Bütün müşahidələr belə düşünməyə əsas verir ki, qisasçı ruh daşıyan Ceyhun Həsənovda da bir natamamlıq kompleksi var.

Odur ki, Məhərrəm Quliyev onunla ehtiyatlı olmalıdır.  

Araşdırmamız davam edir.

Əks tərəfin mövqeyini dərc etməyə hazırıq.

Zaur Vəliyev

Bizimaz.az baş nazirin sabiq müavini, hazırda təqaüddə olan Hacıbala Abutalıbovun Qaynarinfo.az-a müsahibəsini təqdim edir:

Bizimaz.az  Azərbaycan Dövlət Neft Şirkətinin (SOCAR) I vitse-prezidenti, akademik Xoşbəxt Yusifzadənin Musavat.com-a müsahibəsini təqdim edir:

"Ölkədən kənardakılar da məsuliyyətdən kənarda qalmayacaq"

İnternet hazırda ən sürətli yayım vasitəsidir. İnternet üzərindən əlaqə qurulması, xüsusilə sosial şəbəkələr vasitəsilə məlumatlandırma və interaktivlik imkanı olduqca güclü və sürətlidir.

Buna görə də toplumun həyatının vacib və ayrılmaz elementinə çevrilmiş sosial şəbəkələrdə davranışın hüquqi tənzimlənməsi aktuallıq qazanıb. Günümüzdə ən çox müzakirə edilən mövzulardan biri sosial media üzərindən şərəf və ləyaqətin alçaldılması, təhqir və böhtanın yaratdığı məsuliyyətlə bağlıdır. Ümumiyyətlə, sosial media üzərindən şərəf və ləyaqətin alçaldılması, təhqir və böhtan hüquqi məsuliyyət yaradırmı? Bu məsələ qanunla necə tənzimlənir?

Beynəlxalq praktika

Türkiyə Cümhuriyyətinin Cinayət Məcəlləsinin (Ceza Kanunu) 125-ci maddəsində göstərilir ki, əməlin səsli, yazılı və ya görüntülü vasitələrdən istifadə etməklə törədilməsi də təhqir (hakaret) cinayəti tərkibi yaradır. Digər hallarda əməl ən azı 3 şəxsin iştirakı ilə törədilməlidir.

Rusiya Federasiyasının Cinayət Məcəlləsinə 2011-ci ilə edilən düzəlişlərlə təhqir (оскорбление) cinayətin dekriminallaşdırılması faktıdır. 2011-ci ildən etibarən vətəndaşı təhqir etmək inzibati xəta hesab olunur. (Кодекс Российской Федерации об Административных Правонарушениях - ст. 5.61). Vəzifəli şəxslərin, din xadimlərinin və hərbi qulluqçuların təhqir olunması isə müvafiq maddələrə əsasən cinayət məsuliyyətinə səbəb olur.

Avropa Məhkəməsinin qərarlarında isə qeyd edilib ki, ifadə azadlığına hər hansı məhdudiyyətin “zəruriliyi” əsaslı qaydada müəyyən edilməlidir. İlk növbədə, məhkəmələr məhdudiyyətin tətbiqi üçün “ciddi ictimai tələbatın” mövcud olub-olmadığını müəyyən etməlidir; bu halda onların müəyyən mülahizə hüdudları var. Mətbuatla bağlı işlərdə məhkəmələrin malik olduğu mülahizə hüdudları demokratik cəmiyyətin azad mətbuatı təmin etmək və qorumaq marağı ilə müəyyən edilir. Eynilə, Konvensiyanın 10-cu maddəsinin 2-ci bəndinə əsasən, məhdudiyyətin qanuni məqsədə mütənasib olub-olmamasının müəyyən edilməsində bu maraq daha ağır çəkiyə malikdir. Lakin mətbuat müəyyən hədləri, xüsusilə başqalarının nüfuz və hüquqlarına aid olan hədləri aşmamalıdır.

Həmçinin, nəzərə alınmalıdır ki, məqbul olan tənqidin hüdudları fərdi şəxslə müqayisədə ictimai xadim, o cümlədən siyasətçi ilə bağlı daha genişdir.

Azərbaycan qanunvericiliyi nə deyir?

Beynəlxalq hüququnun hamılıqla qəbul edilmiş norma və prinsiplərində olduğu kimi, Azərbaycan Konstitusiyasında da hər kəsin şərəf və ləyaqətini müdafiə etmək hüququ var, heç bir hal şəxsiyyətin ləyaqətinin alçalmasına əsas verə bilməz.

Mülki Məcəllənin 7-ci maddəsinə görə, şərəf və ləyaqəti ləkələyən, həqiqətə uyğun olmayan məlumatların təkzib edilməsi məhkəmə yolu ilə tələb edilə bilər. Həmçinin, şəxsin buna görə təzminat və ya kompensasiya almaq hüququ var.

Şərəf və ləyaqətin alçaldılması məsələsini mübahisələndirmək üçün ilk növbədə bu anlayışların mənasının dəqiqləşməsinə ehtiyac var.

Şərəf - şəxsə verilən ictimai qiymətdir. Yəni, şəxsin cəmiyyətin üzvü kimi əxlaqi, mənəvi keyfiyyətlərinə, digər insanlara, dövlətə, cəmiyyətə münasibətinə görə dəyərləndirilməsidir.

Ləyaqət - şəxsin özünün özünə verdiyi qiymətdir. Yəni, şəxsin mənəvi və əqli keyfiyyətlərini, cəmiyyətdəki mövqeyini və nüfuzunu dərk etməsidir.

Nüfuz - başqa şəxslər tərəfindən verilən qiymətdir. Yəni, şəxsin cəmiyyət, kollektiv, dostlarının əhatəsi, təşkilatda öz qabiliyyətinə görə tutduğu mövqe başa düşülür.

Bəs təhqir və böhtan dəyərkən nə nəzərdə tutulur? Təhqirin və böhtanın obyekti nədir? Təhqirin obyekti şəxsiyyətin şərəf və ləyaqətidir. Şərəf və ləyaqəti alçaltma şəxsi nüfuzdan salan hərəkətlər kimi dəyərləndirilir. Şəxsiyyətin nalayiq formada alçaldılmasını, təhqiredici hərəkətin nalayiq olub-olmamasını isə cəmiyyətdə ümumilikdə qəbul edilmiş əxlaqi dəyərlərə, birgə yaşayış qaydalarına, ümumi qəbul edilən prinsiplərə uyğun olaraq məhkəmə, amma ilk növbədə zərərçəkmiş şəxs müəyyən edir.

Böhtan isə yalan olduğunu bilə-bilə şəxsin şərəf və ləyaqətini ləkələyən, onu nüfuzda salan məlumatların yayılmasıdır.

Sosial şəbəkələrdə təhqir və böhtan hansı hallarda cinayət məsuliyyətinə səbəb olur?

Real kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internetdə böhtan və təhqir etmə Cinayət Məcəlləsinin (CM) 147 və 148-ci maddəsi ilə məsuliyyətə səbəb olur. Eyni zamanda CM-nin 148-1-ci maddəsinə görə, İnternet informasiya ehtiyatında saxta istifadəçi adları, profil və ya hesablardan istifadə edərək, kütləvi nümayiş etdirməklə böhtan atma və ya təhqir etmə cinayət hesab edilir.

Təhqiredici hərəkətlərin və sözlərin doğru və yalan olması şəxsin cinayət məsuliyyətinə cəlb edilməsinə mane olmur. Əməlin cinayət olması üçün təhqir edən şəxs başqa şəxsin şərəf və ləyaqətini alçaltdığını dərk edir və bunu arzu edir. Şəxs təhqir edildiyi anda cinayət əməli başa çatmış hesab edilir.

Saxta profillər

Hazırda sosial media ilə bağlı müzakirə olunan əsas məsələ saxta hesab və profillərlə bağlıdır. Adətən, məsuliyyətdən və "şəxsi hesablaşma"dan yayınmaq üçün təhqir və böhtan saxta hesab və profillər üzərindən edilir. Sosial mediada saxta istifadəçi adları, profil və ya hesablar dedikdə qanunvericilik nəyi nəzərdə tutur? Hansı hesablar saxta hesab edilir?

İstifadəçinin şəxsiyyətini eyniləşdirməyə imkan verməyən, yəni ad, soyad və ya ata adına dair yalan məlumatların yerləşdirildiyi profillər saxta hesab olunur. Eyni zamanda məlumatların gizlədildiyi, habelə digər şəxsə aid olan məlumatlarla onun razılığı olmadan yaradılmış hesablar, profillər də saxta hesab olunur.

Amma nəzərə almaq lazımdır ki, İnternet informasiya resurslarında müxtəlif ictimai iaşə obyektlərinin, tarixi şəxsiyyətlərin, müxtəlif şəhər, rayon və s. ərazi adlarını özündə əks etdirən hesablar, qruplar, səhifələr var. Hazırkı qanunvericilikdə bu məsələ açıq qalır.

İstintaq tarixi şəxsiyyətlərin, müxtəlif şəhər, rayon və s. ərazi adlarını daşıyan səhifələri şəxsin eyniləşdirilməsi mümkün olmayan profil hesab edərək, saxta qəbul edə bilər. Amma bu barədə maddənin dispozisiyası və qeydində dolğun məlumat verilməyib. Yəqin ki, həmin xüsusatlarla bağlı qanunvericiliyin şərhi veriləcək.

Bəs saxta hesabın olduğu yerin müəyyənləşdirilməsi hansı qaydada aparılmalıdır?

Cinayət Prosessual Məcəlləsinin 177-ci maddəsində göstərilib ki, cinayət prosesini həyata keçirən orqan istintaqın normal gedişini təmin etmək üçün istintaq hərəkətini məcburi apara bilər. İP və data ünvanının əldə edilməsi üçün “Telefon və digər qurğularla aparılan danışıqların, rabitə və digər texniki vasitələrlə ötürülən məlumatların ələ keçirilməsi” istintaq hərəkətlərinin məcburi aparılmasına məhkəmə qərarının alınması tələb olunur. Belə halda, müstəntiqin vəsatəti əsasında prokuror məhkəməyə təqdimatla müraciət edir. Məhkəmə qərarı ilə telefon və digər qurğularla aparılan danışıqlar, rabitə və digər texniki vasitələrlə ötürülən məlumatlar ələ keçirildikdən sonra ekspert və mütəxəssislər cəlb edilməklə şəxsin yeri müəyyən edilə bilər.

Ölkədən kənardakılar da məsuliyyətdən kənarda qalmayacaq

Sosial şəbəkələrdə ölkədən kənarda olan şəxslərin söyüş və təhqir, böhtanla daha çox məşğul olması müşahidə edilməkdədir. Ümumiyyətlə, ölkədən kənarda olan şəxsin hər hansı cinayət törədərkən məsuliyyətdən kənarda qalacağı haqqında fikirlər kökündən yanlışdır. CM-də göstərilib ki, Azərbaycan vətəndaşı ölkədən kənarda törətdiyi əmələ görə (bu əməl həm Azərbaycan Respublikasının, həm də ərazisində törədildiyi xarici dövlətin qanunvericiliyinə əsasən cinayət hesab olunursa) xarici dövlətdə məhkum olunmayıbsa, Azərbaycanda cinayət məsuliyyətinə cəlb edilir. Həmçinin, əcnəbilər və vətəndaşlığı olmayan şəxslər Azərbaycandan kənarda ölkəmizin maraqlarına (mənafelərinə) və vətəndaşlarına qarşı cinayət törətdikdə qanunvericiliyimizə əsasən cinayət məsuliyyətinə cəlb edilə bilərlər.

CM-nin 147 (böhtan) və 148 (təhqir) maddələri üzrə xüsusi ittiham qaydasında zərərçəkmiş tərəfindən məhkəmələrə müraciət oluna bilər. CM-nin 148-1-ci (İnternet informasiya ehtiyatında saxta istifadəçi adlar, profil və ya hesablardan istifadə edərək böhtan atma və ya təhqir etmə) maddəsi isə ictimai xüsusi ittiham qaydasında prokurorluq orqanları tərəfindən istintaq edilir.

Şamil Paşayev
Hüquqşünas

Biz postsovet məkanında müasir qiymətləndirmə sistemini tətbiq edən ilk ölkələrdənik

Rayonda bütün rəhbərlərin dosyesi hazlrdlr

Son günlərdə sosial mediada olunan müzakirələr ciddi insanlar tərəfindən qınaq obyektinə çevirilib. Bayağı musiqilərlə necə mübarizə aparmaq lazımdır ?

Bu barədə Metbuat.az-a bir neçə sənətçi öz fikirlərini söyləyib.

Azərbaycanın xalq artisti, xanəndə Mənsum İbrahimov mövzu ilə bağlı fikirlərini bölüşərkən qeyd etdi ki, hər kəs bu işlə mübarizə aparmalıdır:

"Son zamanlar Azərbaycan televiziyasında bədii şura yaradılıb. Mən də həmin bədii şuranın üzvüyəm və biz orda çox çalışırıq ki, gənclər mariflənsin, bu kimi hallar aradan qaldırılsın. Aparılan muğam müsabiqəsi də buna xidmət edir. Heydər Əliyev Fondu da bizə çox kömək göstərir. Bununla sadəcə ifaçılar yox, eyni zamanda jurnalistlər, televiziyalar, ziyalılarımız da mübarizə aparmalıdır. Bunun bəlasını biz hamımız çəkirik. Görürsünüz də nələri təbliğ edirlər, nələr paylaşıb gündəmə gətirirlər. Mən hesab edirəm ki, hər kəs bu işlə mübarizə aparmalıdır. Hər birimizin evində övlad böyüyür və biz vətəndaş böyüdürük.20 faiz torpağı işğalda olan ölkəyik və gələcək üçün əsgər yetişdiririk. Bu məsələlər hər birimizi narahat edir. Hesab edirəm ki, burda mətbuatın və televiziyanın üzərinə daha böyük yük düşür.

Orta məktəblərdə mobil telefonlar qadağan olunmalıdır. İndi ən azyaşlı uşağın belə əlində telefon var. Bu çox mənfi təsir göstərir" .

Azərbaycanın xalq artısti, xanəndə Arif Babayevlə də mövzu ilə bağlı söhbət apardıq. Səhhətində olan problemlə bağlı çox danışa bilməyən sənətkarı yormaq istəmədik, amma qısa danışığımız zamanı Arif Babayev bayağı mahnıların qarşısını almağın mümkün olmadığını bildirib:

"Bayağı mahnıların qarşısını almaq mümkün deyil, hücum çəkiblər. Yaxşılar çoxaldıqca o bayağılar gedəcək. Müsabiqələr keçirilməlidir, xalq mahnıları, muğam oxuyan yaxşı, istedadlı gənclərimiz var, onlar üzə çıxmalıdır. Televiziyalar gərək yaxşıları çağırsın ki, pislər itsin".

Xalq artisti, müğənni Nazpəri Dostəliyeva mövzuya çox həssas yanaşaraq, reytinq üçün can atan verilişləri qınadı:

"Bunlar hamısı bir müddətdir. Gözəl musiqilərimiz hər zaman olduğu kimi qalacaq, amma bayağı mahnılar müvəqqətidir, səslənir və itib batır. Heç vaxt bayağı mahnılar əsrlər boyu səslənmir. Adam bilmir nə desin. Hazırda aləm bir-birinə dəyib. Mən qulaqlarımı və ağzımı tutub sakit oturmuşam ki, Allah, özün bu xalqı və gəncləri bu bəlalardan hadisələrdən qoru. Tək mən azam, bütün ziyalılar, alimlər, professorlar, musiqişunaslar ayağa qalxmalıdır, televiziyalara, radiolara qadağalar olmalıdır.

“Youtube”da ola bilər qoyulsun, gənclər dinləsin, amma televiziyalar reytinqə görə həmin şəxsləri efirə çıxarmamalıdır. Baxış sayı çoxdur deyə həmin insanları gətirib efirdə müğənni kimi təqdim etmək bizim ən qorxulu, ən pis, ən aciz tərəfimizdir.

Mən özümü görmədiyim bir çox verilişə getmirəm. Mənə deyirlər “nə üçün az görünürsünüz?” Nə edim? Hər verilişə çıxa bilmərəm axı. Çünki görürəm həmin verilişlərdə nələr baş verir. Reytinqə işləyən proqramlar çoxdur."

Əməkdar artist Ədalət Şükürov da məsələ ilə bağlı fikirlərini bizimlə bölüşdü:

"Birinci növbədə hər kəsin öz zövqü var və ikincisi də təqsirkar o adamlardır ki, həmin musiqiləri bəyənir, dinləyirlər, paylaşırlar.

Bunlar qadağa ilə düzələn məsələ deyil, insanlar maariflənməlidir. Maariflənmək üçün də yaxşı verilişlər lazımdır telekanallara.Həmin verilişlər də yoxdur. Çox təəssüflər olsun ki, həmin verilişlərin də üzərində işləmirlər. Televiziyaların çoxu reytinq axtarır".

Sevinc Kərimova // Metbuat.az

Azərbaycan Respublikasının Birinci vitse-prezidenti Mehriban Əliyeva özünün İnstaqram səhifəsində Aprel qələbəsinin üçüncü ildönümündən yazıb.

Paylaşımda qeyd olunub:

"Aprel döyüşləri bir daha bütün dünyaya nümayiş etdirdi ki, Azərbaycan dövləti işğalla heç zaman barışmayacaq və Azərbaycan Ordusu lazım olan əməliyyatı uğurla həyata keçirməyə qadirdir. Bu döyüşlər zamanı mərd və cəsarətli Azərbaycan gəncləri, əsgərlərimiz, zabitlərimiz Vətən yolunda qəhrəmanlıq göstərərək şəhid oldular, ömürlərini qurban verdilər. Azərbaycanın ərazi bütövlüyünün bərpası, müstəqilliyi, ölkəmizin daha qüdrətli, daha möhkəm olması yolunda şəhid olmuş bütün insanlara Allah rəhmət eləsin. Onların əziz xatirəsi Azərbaycan xalqının qəlbində daim yaşayacaq".

Xatırladaq ki, bu gün Azərbaycan və Ermənistan arasında baş vermiş aprel döyüşlərinin növbəti ildönümüdür. Azərbaycan ordusunun qələbəsi ilə yekunlaşan Aprel döyüşlərinin başlanmasından üç il ötür.