Bu gün Türkiyənin milli müdafiə naziri Yaşar Gülər Azərbaycana rəsmi səfər edəcək.

Səfər, iki qardaş ölkə arasında bütün sahələrdə olduğu kimi, hərbi və müdafiə sahəsində də inkişaf edən sıx əməkdaşlığın daha da dərinləşdirilməsi baxımından xüsusi əhəmiyyət daşıyır. Rəsmi Bakı ilə Ankara arasında son illərdə intensivləşən yüksək səviyyəli təmaslar, regional sabitliyin təminatı və strateji müttəfiqlik baxımından mühüm göstəricilərdən biridir. Bu səfər son illərdə intensivləşən qarşılıqlı səfərlərin davamı olmaqla yanaşı, həm də bölgədəki yeni geosiyasi reallıqlar fonunda hərbi əməkdaşlığın gələcək istiqamətlərinin müəyyənləşdirilməsi baxımından xüsusi əhəmiyyət daşıyır.

Yaşar Gülərin ölkəmizə gəlişi hansı yeniliklərin xəbərçisidir?

Mövzu ilə bağlı Bakıvaxtı.az-a açıqlama verən hərbi ekspert Ədalət Verdiyev bildirib ki, Azərbaycan və Türkiyə arasında hərbi əməkdaşlıq təkcə iki ölkənin maraqlarını deyil, həm də regionun təhlükəsizlik arxitekturasını yenidən formalaşdırır:

"Bu kontekstdə 2021-ci ildə imzalanan Şuşa Bəyannaməsi, qarşılıqlı hərbi yardım, birgə təlimlər və müdafiə sənayesi sahəsində əməkdaşlıq kimi bir sıra strateji istiqamətləri əhatə etməklə münasibətlərə yeni dinamika qazandırıb. Bəyannamə faktiki olaraq iki ölkə arasında hərbi ittifaqın hüquqi əsaslarını qoyub. Yaşar Gülərin bu səfəri zamanı müzakirə ediləcək məsələlər arasında birgə hərbi təlimlərin planlaşdırılması, yeni silah və texnoloji avadanlıqların tətbiqi, eləcə də hərbi təhsil sahəsində əməkdaşlığın genişləndirilməsi xüsusi yer tutacaq. Qeyd edək ki, Azərbaycan bu gün 40-dan çox ölkə ilə hərbi əməkdaşlıq həyata keçirir, lakin Türkiyə ilə münasibətlər strateji tərəfdaşlıq səviyyəsindədir və bu əlaqələrin miqyası heç bir başqa ölkə ilə müqayisə edilə bilməz".

Onun sözlərinə görə, Türkiyə Silahlı Qüvvələrinin müasir döyüş təcrübəsi və hərbi sənaye sahəsindəki irəliləyişi Azərbaycan Ordusu üçün ciddi təcrübə mübadiləsi imkanı yaradır. Müsahibimizin sözlərinə görə, son illərdə keçirilən “TurAz Qartalı”, “Sarsılmaz Qardaşlıq” və digər birgə təlimlər orduların qarşılıqlı koordinasiyasını daha da gücləndirib. Bu təlimlər yalnız texniki-taktiki əməkdaşlığı deyil, həm də bölgədəki mümkün təhlükələrə qarşı birgə müdafiə strategiyasının formalaşmasını təmin edir.

Ədalət Verdiyev: Bu səfəri təkcə diplomatik gündəliyin bir hissəsi adlandırmaq olmaz

Ədalət Verdiyev əlavə edib ki, Yaşar Gülərin səfəri eyni zamanda regional mesaj daşıyır. Ermənistanla sülh danışıqlarının davam etdiyi, Cənubi Qafqazda yeni geosiyasi reallıqların formalaşdığı bir vaxtda, Azərbaycan-Türkiyə hərbi əlaqələrinin inkişafı təkcə ikitərəfli deyil, həm də geostrateji müstəvidə regionun təhlükəsizlik strukturuna təsir edən amillərdəndir:

"Bir sözlə, bu səfər təkcə diplomatik gündəliyin bir hissəsi deyil, Azərbaycan-Türkiyə strateji hərbi əməkdaşlığının növbəti mərhələsinə keçidin əsas göstəricisidir",- deyə Ədalət Verdiyev fikrini yekunlaşdırıb.

Əli Hüseynov

Azərbaycan Ordusunun qələbəsi ilə yekunlaşan tarixi döyüşlərin başlanmasından 9 il ötür.

Bakı Arbitraj Mərkəzi Azərbaycan Respublikasının Ədliyyə Nazirliyi tərəfindən dövlət qeydiyyatına alınıb.

“Qafqazinfo” xəbər verir ki, Bakı Arbitraj Mərkəzi Fransanın Paris-Est Creteil Universitenin hüquq üzrə professoru, Paris Vəkillər Kollegiyasının üzvü, Azərbaycan Arbitraj Assosiasiyasının sədri və Azərbaycan Respublikasının Ali məhkəməsinin elmi-məsləhət şurasının üzvü Professor Kəmalə Mehdiyeva tərəfindən təsis olunub. 

Kəmalə Mehdiyeva qeyd edib ki, Bakı Arbitraj Mərkəzinin yaradılması ilə ölkədə tərəflər arasında mübahisələrin həll edilməsinin alternativ bir yolu olan arbitrajın inkişafı üçün bütün vacib elementlər – arbitrajla bağlı mütərəqqi hüquqi baza, arbitrajın inkişafı üçün dövlət dəstəyi və yeni yaradılmış arbitraj təşkilatı – artıq formalaşıb. 

Qeyd edək ki, “Arbitraj haqqında” Qanun 2024-cü il 25 yanvar tarixində qüvvəyə minib və arbitraj sahəsində ən müasir təcrübələri əks etdirən “Beynəlxalq Ticarət Arbitrajı haqqında” 1985-ci il tarixli (2006-cı ildə edilmiş dəyişikliklərlə) UNCITRAL Model Qanundan belə daha mütərəqqi xarakter daşıyır. Qanun Birləşmiş Millətlər Təşkilatının Beynəlxalq ticarət hüququ üzrə Komissiyası (UNCITRAL) tərəfindən sınaqdan keçmiş və Komissiya həmin Qanunun mütərəqqi beynəlxalq təcrübəni əks etdirən və beynəlxalq arbitraj sahəsində vahid standartlar müəyyən edən “Model Qanuna” uyğun olduğunu təsdiqləyib. 

Bakı Arbitraj Mərkəzin yaradılması dövlət-özəl tərəfdaşlığının ən önəmli təzahürlərindən biridir. Belə ki, dövlət iqtisadi subyektlər arasında, xüsusilə xarici elementli mubahisələrin dövlət məhkəmələri tərəfindən deyil, qeyri-dövlət qurumu – arbitraj təşkilatları vasitəsilə həll olunmasına yol açır.

Qeyd edilməlidir ki, “Arbitraj haqqında” Qanunun layihəsi “Azərbaycan Respublikasında biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin 2016-cı il 13 iyul tarixli 2199 nömrəli Sərəncamı ilə yaradılmış Biznes mühiti və beynəlxalq reytinqlər üzrə Komissiyanın təsdiq etdiyi “Dünya Bankı Qrupunun “Əlverişli Biznes Mühiti” layihəsinin “Mübahisələrin həlli” indikatoru ilə bağlı müvafiq sahədə təkmilləşmələrin həyata keçirilməsinə dair 2022-2023-cü illər üzrə Yol Xəritəsi”nin icrasının təmin edilməsi məqsədi ilə hazırlanıb. 

Eyni zamanda, arbitrajın təşəkkülü ölkədə sahibkarlığın inkişafına, Azərbaycanın investisiya məkanı kimi cəlbedəcəliyinə, o cümlədən dövlət iqtisadiyyatına və ölkədə hüquq sisteminin möhkəmlənməsinə töhfə verəcəkdir. Bu kontekstdə, arbitraj institutlarının yaradılması və inkişafı mübahisələrin effektiv həlli üçün mühüm mexanizm rolunu oynayır.

Kəmalə Mehdiyevanın fikrincə, Bakı Arbitraj Mərkəzin yaradılması önəmli bir təşəbbüsdür. O qeyd edib ki, danılmaz həqiqətdir ki, iqtisadi münasibətlərin qloballaşması fenomeni mübahisələrin həllinin spesifik üsulunun - arbitrajın inkişafına səbəb olmuşdur və Bakı Arbitraj Mərkəzin fəaliyyəti ölkəmizdə və regionda arbitraj mexanizmini inkişaf etdirməyə imkan verəcək və bununla da Azərbaycan Respublikasında əlverişli biznes və investisiya mühitinin təşviq edilməsinə töhfə verəcək.

Azərbaycanda hərbi xidmətdən yayınan çağırışçı həbs edilib.

“Qafqazinfo”nun əldə etdiyi məlumata görə, 19 yaşlı Ramin Osmanov (ad-soyad şərti) iki ardıcıl çağırışda xidmət keçməkdən boyun qaçırıb.

Osmanov 2024-cü ilin yanvarında hərbi xidmətə getmək üçün Səfərbərlik və Hərbi Xidmətə Çağırış üzrə Dövlət Xidmətinin Bakı şəhəri Xətai rayon idarəsinin çağırış komissiyası tərəfindən tibbi müayinədən keçirilərək hərbi xidmətə yararlı hesab edilib. O, müddətli həqiqi hərbi xidmət keçmək üçün Dövlət Xidmətinin rəisinin sərəncamı ilə Müdafiə Nazirliyinin N saylı hərbi birləşməsinə təyin olunub.  

Çağırışçı hərbi birləşməyə getmək üçün Dövlət Xidmətinin Xətai rayon idarəsinə gəlib, lakin hərbi xidmət keçməkdən boyun qaçırmaq məqsədilə əvvəlcə ağrıyan dişlərinin müalicə etdirməsinin zəruri olduğunu, sonra isə telefon vasitəsilə anası ilə danışmasını bəhanə gətirərək həmin ünvandan uzaqlaşıb.

Gənc bundan sonra hərbi xidmətdən yayınmaq üçün növbəti dəfə eyni addımı atıb.

Bu səbəbdən onun barəsində Xətai Rayon Prokurorluğunda Cinayət Məcəlləsinin 321.1-ci (hərbi xidmət keçməkdən boyun qaçırma) maddəsi ilə cinayət işi başlanıb. 

Osmanovun işi Xətai Rayon Məhkəməsində araşdırılıb. Ona 1000 manat məbləğində cərimə cəzası kəsilib. Amma ittiham tərəfi hərbi xidmət keçmək istəməyən müttəhimin sərbəst qalması ilə razılaşmayıb. 

Hökmdən verilmiş protesti Bakı Apellyasiya Məhkəməsi təmin edib. Qərara əsasən, birinci instansiya məhkəməsinin hökmü ləğv edilib. Osmanov 1 il müddətinə azadlıqdan məhrum edilərək məhkəmə zalındaca həbs edilib.

Sail Ağasəlim

  Özünü tarixə verənlərindir. 

 Ehtiyatda olan polkovnik-leytenant Abdullayev Nihat İntiqam oğlu 1981-ci il iyunun 18-də  Bakı şəhəri Yasamal rayonunda anadan olmuşdur. 279 saylı orta məktəbin 8-ci sinifini bitirdikdən sonra Cəmşid Naxçıvanski adına hərbi liseyə daxil olmuşdur. 1998-ci ildə hərbi liseyi bitirib Bakı Ali Birləmiş Komandanlıq Məktəbinə daxil olmuş və 2002-ci ildə oranı bitirmişdir. 1 il Silahlı Qüvvələrin Təlim və Tədris Mərkəzindəki Zabit İxtisas Kursunu bitirdikdən sonra Gəncə şəhərində yerləşən N saylı hərbi hissəyə xidmətini davam etdirmək üçün göndərilmişdir. Orada qısa müddət 5 ay xidmət etdikdən sonra hərbi xidmətinin 2 ilini Murovdağ yüksəkliklərindəki hərbi hissədə, 8 ilini Tovuz rayonunda yerləşən  hərbi hissədə, 2 ilini Ağdam rayonundakı hərbi hissədə, 2 ilini Yevlax rayonu ərazisində yerləşən hərbi hissədə xidmət etmişdir. Daha sonra o xidmətinin son 4 ilini 1-ci Ordu korpusunun baş zabiti kimi keçmişdir. Qəhrəmanımız həm aprel,  həm də 44 günlük Vətən müharibəsi iştirakçısıdır. Hal-hazırda ehtiyatda olan baş zabitdir və eyni zamanda “Gənc İstedadlar” liseyində Hərbi rəhbər vəzifəsində işləyir. Nihat müəllim üçün çətin və ağır olsa da döyüş  xatirələrini bizimlə bölüşdü: “Biz hər zaman müharibənin olacağına,  torpaqlarımızı işğaldan azad edib qələbə əldə edəcəyimizə inanmışıq və buna tam hazır idik. Çünki biz həm döyüş hazırlığına, həm də şəxsi heyətin mənəvi-psixoloji hazırlığına həssas yanaşırdıq. Bu səbəblə də qələbənin birmənalı yalnız bizim olacağına inanmışıq. 

Bizim tapşırığımız manevr edərək düşmən qüvvələrini üzərimizə çəkmək olub. Qarabağın açarı da Ağdam olduğu üçün düşmən əsas təhlükəni də elə bizim istiqamətdən gözləyirdi. Bu səbəblə qarşımızda düşmənin çox sayda, tam hazır vəziyyətdə zirehli texnikası, artilleriya silahları, yeni nəsil tank əleyhinə vasitələri, hava hücumundan müdafiə sistemləri, yeni istifadəyə verilmiş silah-sursatı və ardı arası kəsilmədən köməyə göndərdiyi tam təchizatlı, yüksək hazırlıqlı şəxsi heyəti cəmlənmişdir. Həmçinin, bizdən fərqli olaraq düşmənin strateji yüksəkliklərdə yerləşməsi taktiki üstünlüyün onlarda olmasının göstəricisi idi. Komandir və əsgər heyəti düşmənin üzərinə qorxmadan, əzmlə hücum edirdilər. Onların gözlərində vətən sevgisinin alovu, düşmənə qarşı 30 illik nifrət dolu bir qisas hissi, beyinlərində isə bir məqsəd vardı: “yalnız və yalnız qələbə”. Biz bütün taktiki normativləri, öz əzmimiz və dəmir iradəmiz ilə qıraraq döyüş təlimatına yenilik gətirdik.  Hər kəs bir nəfər kimi verilən tapşırığı tam olaraq yerinə yetirdi. 

Çünki hər şeydən və hər kəsdən öncə Vətənin bütövlüyü məsələsi vardı. Müharibə dönəmində daha bir möcüzə ilə rastlaşdıq. Yer üzündə bizim xalqdan xeyirxah, fədakar və mərd ikinci bir xalqın olmadığını gördük. Vətən müharibəsi zamanı xalqımızdan gələn maddi və mənəvi  dəstək bizi qələbədən qələbəyə aparırdı. Müharibənin gedişatındakı hər bir uğurumuzda xalqımızın arxamızda böyük dayaq və dəstəyini görür, onlara qələbə sevinci yaşatmağa can atırdıq. Müharibə dönəmində biz siyasi sferadan bixəbər idik. Çünki telefon və internet şəbəkəsindən istifadə olunmurdu.

 
Vətən sadəcə üzərində gəzdiyimiz bir torpaq parçası kimi görünə bilər. Dərindən düşünək ki, bu adi görünən torpağın altında hətta nə qədər kəfənsiz qalan şəhidimiz olduğu üçün dövlətimiz qurulub, var olub. Unutmamalıyıq ki, bu adi görünən torpağın hər qarışı müqəddəs şəhid qanıyla yoğrulub. Bu torpaqda əmin-amanlıqla körpələr böyüyürsə, oxuyursa, yeni yuvalar qurulursa, ziyalılar yetişirsə, xəstələr şəfa tapırsa, yaşlılar nəvələri ilə əylənirlərsə, dünyadan köçənlərimiz rahat yatırlarsa demək ki, bu adi yox, müqəddəs torpağımız, Vətənimizdir. Evsiz insanlar bir daxmaya möhtac olduqları kimi, xalqlar da Vətənə möhtacdırlar. Nəzərə alaq ki, İslam aləmində, hələ də bir türk olaraq namus və qeyrət anlayışına digər xalqlardan daha fərqli yanaşırıq. Bizlər ailənin müqəddəs və paklıq anlayışı səbəbi ilə kimsənin evinin içinə yad birinin girməsini istəmədiyimiz kimi, eyni yanaşma ilə də Vətəni qorumalıyıq. Vətənə, dövlətə və dövlətçiliyə toxunmaq olmaz. O bizim müqəddəs dəyərimiz, sarı simimizdir. Vətənə və dövlətə olan borcun nə miqdarı, nə də həcmi var. Peşəsindən asılı olmayaraq hər bir vətəndaşın öz vəzifəsini vicdanla və layiqincə yerinə yetirməsinin özü belə, onun vətənpərvər olmasının dəlilidir.

Ehtiyatda olan polkovnik-leytenant Nihat Abdullayev 44 günlük müharibədə  Ağdam, Suqovuşan, Tərtər,  Goranboy  istiqamətlərində döyüşlərdə iştirak etmiş və Müzəffər Ali Baş Komandan tərəfindən “Vətən uğrunda”, “Suqovuşan uğrunda” və “Ağdam uğrunda”, Baş nazir tərəfindən isə “Vətən müharibəsi iştirakçısı” medalları ilə təltif edilmişdir.

Hazırladı; Afət İlkin