Taekvondo üzrə IV dan qara kəmər sahibi Zahid Nadirov beynəlxalq dərəcəli təlimatçı və ADBTİA-nın taekvondo müəllimidir. 15 oktyabr 2023-cü il tarixində klubun 6 illik yubileyi münasibətilə Maştağa qəsəbəsində yerləşən “Görüş” restoranında təşkil olunmuş möhtəşəm Qala-gecəyə 200 nəfərə yaxın qonaq və idmançılar təşrif buyurmuşdular. Həmçinin tədbirdə media nümayəndələri də iştirak etmiş, Qala-gecənin gedişində TV kanalları tərəfindən çəkilişlər aparılmışdır. Tədbir Azərbaycan Respublikasının Dövlət Himninin səsləndirilməsi ilə başlandı. Sonra ölkəmizin ərazi bütövlüyü uğrunda gedən döyüşlərdə öz canlarını fəda etmiş şəhidlərimiz bir dəqiqəlik sükutla yad olundular. Bundan sonra gecənin aparıcıları qonaqlara “Alpman” Taekvondo klubunun tarixi, adı və loqosu barədə maraqlı açıqlamalar təqdim etdilər.

        Giriş sözü ilə çıxış edən Zahid Nadirov qonaqları salamladıqdan sonra, ilk dəfə taekvondo ilə Cəlilabad rayonunda məşğul olduğunu  qeyd etdi və öz müəllimi, Cəlilabad Gənclər və İdman Sektorunun Uşaq və Gənclər İdman Məktəbinin məşqçi-müəllimi Yasər Babayevi tədbir iştirakçılarına təqdim etdi. Qeyd olundu ki, idman sahəsində 33 ildən artıq çalışan Yasər müəllim hələ sovet dönəmində yüksək nailiyyətlərə imza atıb və idmanın karate növü üzrə SSRİ çempionatının gümüş mükafatçısı olub. Həmçinin Zahid Nadirov tərəfindən klubun yetirmələrinin son bir ildə əldə etdikləri nailiyyətlər barədə ətraflı məlumatlar təqdim olundu. Zahid müəllim son bir ildə “Alpman” Taekvondo klubunun ən yüksək nəticələr göstərmiş 13 idmançısının bu Qala-gecədə xüsusi diplom və mükafatlarla təltif ediləcəklərini də anonsladı.

        Bundan sonra çıxış edən Yasər Babayev Azərbaycanda idmanın inkişafı üçün dövlətimiz tərəfindən ən yüksək səviyyədə şərait yaradıldığını vurğuladı. Öz yetirməsinin uğurları ilə qürur duyduğunu bildirən Yasər müəllim klubun bütün üzvlərinə yeni-yüni nailiyyətlər arzuladı.

        Həmçinin Qala-gecədə “Alpman” Taekvondo klubunun rəsmi tərəfdaşları – “Dr.Nihad” Müasir Stomatoloji Klinikanın rəhbəri doktor Nihad Əvəzbəyli, Maştağa qəsəbəsində fəaliyyət göstərən “Vüqar foto-studiyası”nın rəhbəri Novruz Mehdiyev, “Nizami” Tədris Mərkəzinin təsisçisi Hafiz Rəhimov, “Klass-Academy” Tədris Mərkəzinin rəhbəri Mahir Süleymanov, “Ziya” Tədris Mərkəzinin rəhbəri Rəsul Mirzəyev iştirak edirdilər. Tərəfdaş şirkət rəhbərləri təbrik çıxışı edərək öz ürək sözlərini dedilər və idmançılara bundan sonra da ən yüksək nailiyyətlərlə xalqımızı sevindirmələrini arzuladılar. Qeyd edək ki, “Alpman” Taekvondo klubunun ən yüksək nəticələr göstərmiş 13 idmançısına, o cümlədən iki gənc parataekvondoçumuza tərəfdaş şirkətlər tərəfindən pul mükafatları, qiymətli hədiyyələr və xidmət sahələri üzrə bonus-mükafatları təqdim olundu.

        Qala-gecədə təltif olunan idmançılar arasında taekvondo üzrə Avropa çempionatının qalibləri, beynəlxalq turnirlərin qalib və mükafatçıları yer alıblar. İlin idmançısı nominasiyasında bu ilin avqust ayında Estoniyanın Tallin şəhərində keçirilmiş Avropa çempionatında gənclər arasında gümüş medala sahib olmuş III dan qara kəmər sahibi Səlimə Quliyeva qalib elan edilib.

        Sentyabr ayında isə, qonşu Gürcüstanın Batumi şəhərində keçirilmiş Beynəlxalq açıq turnirdə 5 nəfər idmançı ilə təmsil olunan taekvondoçularımız həmin mötəbər yarışda 3 qızıl və 2 bürünc medal qazanmışdılar. Həmin turnirin qalibi, II dan qara kəmər sahibi Səidə Həsənova “İlin uğurlu təmsilçisi” nominasiyasında qalib elan olundu. Xüsusi olaraq qeyd edək ki, yüksək nəticələrinə rəğmən Səidə Həsənovanın hələ cəmi 13 yaşı var. Bir maraqlı fakt da budur ki, Səidənin bir bacısı və bir qardaşı da idamanın taekvondo növü ilə məşğul olurlar.

        Qala-gecənin gedişində tərəfdaş şirkətlərin rəhbərləri, məşqçilər və “Alpman” Taekvondo klubunun əməkdaşlrı da təşəkkürnamələr və fəxri diplomlarla təltif olundular.



Gununxeberi.az 

“Cənab İlham Əliyevin ilk dəfə Prezident seçildiyi 15 oktyabr 2003-cü il tarixindən 20 il keçir. 20 il hər bir vədə sadiqliyin, Ümummilli Lider Heydər Əliyevin siyasi kursunun uğurla davam etdirilməsinin təqdimatıdır. Bu gün qürurla qeyd edirik ki, Prezident İlham Əliyev təkmil islahatları, yeniliyə, müasirliyə əsaslanan siyasəti ilə Azərbaycanı Ulu Öndər Heydər Əliyevin görmək istədiyi Azərbaycan səviyyəsinə yüksəldib. Onun şah əsəri olan müasir müstəqil Azərbaycan son üç ildir ki, qalib ölkə kimi dünyanın diqqətindədir. Ərazi bütövlüyümüzün və tarixi ədalətin bərpası Ümummilli Liderin ən böyük arzusu idi. Hər bir hədəfə nail olmaq üçün səylərin artırılması, hərtərəfli hazırlıq işlərinin görülməsi vacib faktordur. Cənab İlham Əliyev Ümummilli Liderin “İqtisadiyyatı güclü olan dövlət hər şeyə qadirdir” çağırışına uyğun olaraq öncə iqrisadi müstəqilliyimizin möhkəmləndirilməsini prioritet məsələ kimi qarşıya qoydu. Belə ki, dövlət başçısı İlham Əliyev hələ 2003-cü ildə jurnalistlərə ilk müsahibəsində “İlk növbədə Sizdən hansı addımları gözləyəcəyik ki, iqtisadiyyatın inkişafı üçün bunlar zəruridir” sualına çavabında bildirmişdir ki, hər şey iqtisadiyyat üzərində qurulub. Azərbaycanın iqtisadiyyatı möhkəm olarsa, bütün məsələləri həll etmək imkanımız olacaq. Artıq bu istiqamətdə çox böyük işlər görülüb. Bu hədəfi də açıqlamışdır ki, iqtisadiyyatımızın növbəti mərhələsi məhz özəl sektorun daha fəal iştirakından asılı olmalıdır və bu istiqamətdə üzərimizə düşən vəzifələri yerinə yetirməyə hazırıq. Bazar iqtisadiyyatı davam etdiriləcək. Sahibkarlar sinfi yaranacaq. Özəl sektorun fəaliyyəti nəticəsində  Azərbaycanın büdcəsi artacaq, yeni iş yerləri açılacaq. Bu mühüm məqam, çağırış da diqqətə çatdırıldı ki, bütün Azərbaycan xalqının, hər bir Azərbaycan vətəndaşının  Prezidentiyəm. Borcumdur ki, imkan daxilində hər bir vətəndaş inkişafa, yaxşılığa doğru irəliləyişi görsün və onu hiss etsin.”

Bu fikirləri Milli Məclisin deputatı Əliabbas Salahzadə bildirib.

Millət vəkilinin sözlərinə görə, ölkəmiz iqtisadiyyatını düzgün əsaslar üzərində qurmaqla hər bir sınaqdan uğurla çıxmasını təmin etdi: “Ümummilli Liderin müəllifi olduğu neft strategiyasının uğurlu icrası Azərbaycanın qarşısında geniş imkanlar yaradır. Prezident İlham Əliyev ölkə iqtisadiyyatında qeyri-neft sektorunun çəkisinin artırılması ilə bağlı davamlı tədbirlər görür. Regionların malik olduğu potensialdan səmərəli istifadə etmək məqsədilə Regional inkişaf Proqramları təsdiqləndi və uğurla icra edilir. 3 Dövlət Proqramı icra edilib, dördüncü sənədin icrası bu il başa çatacaq. Regional inkişaf Proqramlarına uyğun olaraq mühüm  infrastruktur layihələri həyata keçirilir. Azərbaycanda nəqliyyat sisteminin yenidən qurulması ölkəmizin dünyaya çıxışını təmin edir. Olimpiya idman komplekslərinin inşası gənc nəslin sağlamlığının qorunmasına, yüzlərlə səhiyyə ocağının, müalicə-diaqnostika mərkəzlərinin inşası səhiyyə sisteminin inkişafına, minlərlə məktəb tikilməsi və təhsil müəssisələrinin maddi-texniki bazasının gücləndirilməsi təhsilin zamanın tələblərinə uyğun qurulmasına mühüm töhfələr verir. Dünyada enerji təhlükəsizliyinin təmin olunmasında Azərbaycan rolu artır. Neft-qaz sahəsində qazandığı uğurları davam etdirən ölkəmiz Cənub Qaz Dəhlizi layihəsinin əsas tərkib hissələri olan TANAP-ın və TAP-ın istifadəyə verilməsinə nail oldu. Xəzərin Azərbaycan sektorunda “Azəri”, “Çıraq” və “Günəşli” yataqlarının birgə işlənməsi və neft hasilatının pay bölgüsü haqqında yeni sazişin imzalanması ölkəmizin dünya enerji sənayesində həlledici rolu olduğunu bir daha təsdiqlədi. Ümumilikdə Azərbaycanın iştirakçısı və təşəbbüsçüsü olduğu enerji layihələri dünyanın enerji xəritəsini yenidən tərtib edir.”

Ə.Salahzadə 20 ilin uğurlarının xronologiyasını belə təqdim edib: “Azərbaycanın siyasi, iqtisadi imkanları genişləndirilib, ölkəmizin beynəlxalq arenadakı mövqeləri möhkəmləndirilib və 30 il ərzində pozulmuş ərazi bütövlüyümüz bərpa edilib. Prezident İlham Əliyev ölkəyə rəhbərlik etdiyi dövr ərzində bütün sahələr öz uğurlu  inkişafına nail olub. Ötən dövr ərzində insanların rifah halı daha da yaxşılaşıb və xalqa verilən vədlər bütünlüklə yerinə yetirilib. Azərbaycanın yeni iqtisadi və sosial çağırışların müzakirəsi üçün ideal məkan kimi qəbul olunması həyata keçirilən təkmil sosial-iqtisadi islahatların göstəricisidir. Hər bir Azərbaycan vətəndaşının Prezidenti olduğunu əməli addımları ilə təsdiqləyən cənab İlham Əliyevin irəli sürdüyü təşəbbüslər, qəbul etdiyi qərarlar xalqımız tərəfindən böyük rəğbət hissi ilə qarşılanır. Azərbaycan brendi kimi dünyaya səs salan “ASAN xidmət”, ABAD, DOST layihələrinin uğurlu icrasında da vətəndaş məmnunluğunun artırılması əsas hədəfdir.”

Millət vəkili Azərbaycanın müstəqillik tarixinin ən parlaq səhifəsinin məhz ölkə Prezidenti, Müzəffər Ali Baş Komandan İlham Əliyev tərəfindən yazıldığını böyük qürur hissi ilə qeyd edib: “Böyük Qələbə uzun illər ərzində davam edən hazırlıq işlərinin, habelə dövlətin qüdrətinin artırılması istiqamətində atılan addımların nəticəsidir. Uğurlu siyasət, xalqın dəstəyi və tarixi ədalət Azərbaycanı qalib ölkəyə çevirdi. Ərazi bütövlüyümüzün bərpa olunması Prezident İlham Əliyevin siyasətinin şah əsəridir. İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Şəhidlərimizin qanı, canı bahasına, qazilərimizin qəhrəmanlığı, şücaəti ilə qazanılan Zəfərimizdən başlanan yolun hədəfi Qarabağımızı və Şərqi Zəngəzurumuzu cənnətə çevirmək, soydaşlarımızın Böyük Qayıdışını tam şəkildə  reallaşdırmaqdır. Mərhələli şəkildə dogma yurd-yuvalarına qovuşdurulan soydaşlarımız 30 ilə yaxın dövrdə bu günü səbirsizliklə gözləyirdi. Dövlət başçısı İlham Əliyev hər zaman bu inamı ifadə edirdi ki, biz öz dogma torparlarımıza qayıdacaq, bu əraziləri dirçəldəcəyik. Azad Qarabağımız və Şərqi Zəngəzurumuz dirçəlir. Artıq xalqımız Müzəffər Ali Baş Komandan İlham Əliyevdən növbəti müjdəni gözləyir. Tezliklə tarixi ədalətə söykənərək Qərbi Azərbaycana da qayıdışımız təmin ediləcək. Bütün bunlar onu deməyə əsas verir ki, Azərbaycan hər zaman gələcəyə baxır, nə vaxt, nəyi, necə emək lazımdır bunu bilir.”

 Gununxeberi.az