Prezident İlham Əliyev Ramazan bayramı münasibətilə Azərbaycan xalqına təbrik ünvanlayıb.

Qaçqınların və Məcburi Köçkünlərin İşləri üzrə Dövlət Komitəsinin strukturuna dəyişiklik edilib.

"Qafqazinfo" xəbər verir ki, Prezident İlham Əliyev bununla bağlı Azərbaycan Respublikası Prezidentinin 2010-cu il 14 iyul tarixli 1015 nömrəli Sərəncamı ilə təsdiq edilmiş “Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin strukturu”nda dəyişiklik edilməsi haqqında Sərəncam imzalayıb.

Dəyişikliklə “Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin strukturu”nun 2-ci və 4-cü hissələri ləğv edilib.

Belə ki, qurumun Repatriasiya departamenti və Beynəlxalq əlaqələr, informasiya və mətbuat xidməti departamenti ləğv olunub.

Xocalıda kütləvi məzarlıqda tapılan daha bir nəfərin şəxsiyyəti müəyyənləşib.

Məhkəmə-genetik ekspertizasının hazırkı mərhələsində Vaqif Cəmil oğlu Məhərrəmovun şəxsiyyəti müəyyən edilib.

Qeyd edək ki, daha əvvəl səkkiz nəfərin, o cümlədən Vaqif Cəmil oğlu Məhərrəmovun həyat yoldaşı Bəsirə Vəli qızı Məhərrəmovanın şəxsiyyəti müəyyən edilib.

Xocalı soyqırımı zamanı itkin düşmüş Bəsirə Vəli qızı Məhərrəmova və Vaqif Cəmil oğlu Məhərrəmovun qalıqları Zabrat qəbiristanlığında dəfn olunacaq.

Xatırladaq ki, işğaldan azad edilmiş Xocalı şəhərinin mərkəzində (keçmiş xalça fabrikinin yaxınlığında) həyata keçirilən əsaslı bərpa-quruculuq işləri çərçivəsində aparılan qazıntı işləri zamanı basdırılmış vəziyyətdə kütləvi insan qalıqlarının aşkar olunması faktı ilə bağlı araşdırmalar aparılır.

Qeyd olunan ərazidə həyata keçirilən baxış istintaq hərəkəti nəticəsində aşkar edilmiş insan qalıqlarının müayinəsi zamanı onların ən azı 18 nəfər şəxsə məxsus olması (onlardan 4 nəfərinin azyaşlı olması ehtimal edilir), onların müxtəlif üsullarla işgəncə, fiziki zorakılıq və qeyri-insani rəftara məruz qalmaları, fərdi şəkildə və mənsub olduqları dinin tələblərinə uyğun qaydada dəfn olunmamaları, həmişə tapıla bilmələri üçün lazımi qaydada qorunmaları və nişanlanmalarının təmin olunmaması müəyyən edilib.

Brüsseldə keçirilən ABŞ-Avropa İttifaqı-Ermənistan görüşü (ABŞ Dövlət katibi Antoni Blinken, Avropa Komissiyasının rəhbəri Ursula fon der Lyayen və Ermənistanın baş naziri Nikol Paşinyan) Qərbin İrəvanın təhlükəsizliyinə dair vədlərə ehtiyatlı yanaşdığını göstərdi.

Öncəliklə, görüşün üçtərəfli olduğu elan edilib, lakin orada dörd nəfər iştirak edib - Nikol Paşinyan, Antoni Blinken və Ursula fon der Lyayendən başqa, Avropa diplomatiyasının rəhbəri Josep Borrel səhnədə görünüb.

Halbuki, açıq bəyanatlarda əməkdaşlıq sahələri arasında Ermənistana təhlükəsizlik zəmanətləri məsələsi qeyd olunmayıb.

Bu da Azərbaycanla davamlı sülhün olmadığı halda Ermənistan üçün siqnaldır. 

Amma ola bilər ki, bağlı qapılar arxasındakı görüşlərdə Ermənistanın gələcək trayektoriyası üçün hərbi aspektlər və silahlanma xətti müzakirə masasına yatırılıb.

Bununla belə, sammitdən sonra verilən bəyanatların ümumi məzmunu belə oldu ki, Ermənistanın demokratik islahatlarına və iqtisadi davamlılığına dəstək məqsədləri müzakirələrin ana xəttini təşkil edib.

Bunun üçün Ermənistana Avropa İttifaqından 330 milyon avro, ABŞ-dən isə 65 milyon dollar dəstək paketi ayrılması qərara alınıb.

Bəlkə də, bu, görüşün əsl mahiyyətinin iqtisadi pərdələrlə örtülməsidir. Hələ görüşdən əvvəl Blinken və fon der Lyayen Azərbaycan Prezidenti İlham Əliyevə zəng edərək Bakının narahatlıqlarını sakitləşdirməyə çalışırdılar. Onlar görüşdən sonra verilən bəyanatlarla bunu sübut etmək öhdəliyini göstərməli idilər.

Nisbətən müsbət qarşılanacaq xətt budur ki, Brüssel danışıqlarında Cənubi Qafqazdakı geosiyasi gerçəklik və Azərbaycanın ərazi bütövlüyünün hüquqi şərhi baxımından vacib bir nüans masaya yatırılıb. Bu, Azərbaycanın ərazi bütövlüyünü, suverenliyini təmin etməsi reallığı ilə barışıq və ermənilərin Qarabağa yenidən köçünün mümkünsüzlüyünə edilən işarələrdir.

Hərçənd ki, Qərbin Ermənistana qoyduğu investisiyanın təhlükəsizliyini mühafizə edəcək ideyaları onun regionda hərbi möhkəmlənməsinə cəhdlərin elanı kimi göstərilə bilər.

Məsələnin bu prizmadan şərhi belə ola bilər ki, Qərb Ermənistanı da qurban verərək regionda Rusiyaya qarşı cəbhələr açmaq missiyasını bəyan edir. Sözsüz ki, bu, regionda təhlükəsizliyi və Azərbaycanın formalaşdırdığı əməkdaşlıq formatlarını zədələməyə gətirib çıxara bilər.

Üçtərəfli görüş günü İlham Əliyevin Türkiyənin NATO Parlament Assambleyasındakı nümayəndə heyətinin rəhbəri Mövlud Çavuşoğlunu qəbul edərkən: “Cənubi Qafqaz üçün cızılan plan gələcəkdə böyük fəlakətə gətirə bilər”, - deməsi həmin fikrin təsdiqi sayıla bilər.

Həmçinin, sammitin mürəkkəbi qurumamış, Azərbaycan-Ermənistan şərti sərhədi boyunca hərbi insidentlər oldu.

Azərbaycan Müdafiə Nazirliyi aprelin 6-da yaydığı məlumatda bildirib ki, Ordumuzun Tovuz, Daşkəsən, Kəlbəcər və Laçın istiqamətində yerləşən mövqeləri fasilələrlə atəşə tutulub.

Bu, üçtərəfli görüşdən vəcdə gələn qüvvələrin Bakı tərəfindən neytrallaşdırılması çağırışını canlandırır.

Bundan savayı, Azərbaycanın strateji müttəfiqi Türkiyə də həmin sammitin regional təhlükəsizliyi təhdid etdiyinə eyham vuran bəyanatla çıxış edib.

Qərbin rəqibi Rusiyaya gəlincə, onun İrəvana qarşı hədələyici mövqeyini bir cümlə ilə belə canlandıra bilərik:

Sammitin yekunu İrəvan üçün daha təhlükəli nəticələr doğuracaq.

Deməli, bir tərəfdən, İrəvanın Brüsseldəki görüşdən gözləntiləri çox olsa da, o, faktiki olaraq Qərb və Rusiyanın mübarizəsinin arasında möhkəm sıxışır.

Başqa yandan, Azərbaycan, Türkiyə və Rusiyanın sammit barədəki mövqeləri görüşün İrəvan üçün kəskin xəbərdarlıq kimi qiymətləndirilməsini ümumiləşdirilə bilər.

Azərbaycan regionda gərginləşən mühitdə Ermənistanı mənşə kimi görməkdə haqlıdır, çünki İrəvan müstəqil qərar verə bilmək iqtidarından uzaqdır və prosesləri sülh gündəliyindən yayındıran mövqelərə keçidlər edir.

Bu, Azərbaycanla Ermənistan arasında açıq qalan məsələlərin başqa alternativ yollarla həllini Bakının masasına qoyacaq. İrəvanın sərhəddəki təxribatları hansı həddə qədər davam etdirməsi Bakının qovluğundakı ssenarinin tətbiq edilmə arealını müəyyənləşdirəcək.

Aqşin Kərimov

Xəbər verdiyimiz kimi, Prezident İlham Əliyev bu gün Türkiyənin sabiq xarici işlər naziri, Türkiyə Böyük Millət Məclisinin millət vəkili və NATO Parlament Assambleyasındakı nümayəndə heyətinin rəhbəri Mövlud Çavuşoğlunu qəbul edib.

Bu gün ABŞ, Avropa İttifaqı və Ermənistan arasında Brüsseldə keçirilən üçtərəfli görüşə toxunan dövlət başçısı bildirib ki, bununla Cənubi Qafqaz üçün növbəti təhlükə mənbəyi yaradılır. Halbuki, son günlər həm ABŞ-nin, həm də Avropa İttifaqının yüksəkvəzifəli şəxsləri onların təşəbbüsü ilə baş tutan telefon danışıqları əsnasında bizi inandırmağa çalışıblar ki, bu görüş Azərbaycanın əleyhinə deyil. Prezident İlham Əliyev qeyd edib ki, lakin biz bunun Azərbaycanın və Cənubi Qafqazda iş birliyinin əleyhinə olduğunu bilirik. Bu, ayırıcı xətlərin yaradılması və ölkəmizi təcrid etmək məqsədi güdür.

Dövlət başçısı bir daha qeyd edib ki, keçən ilin sentyabrından indiyədək Avropa Parlamentinin, Avropa Şurasının Azərbaycan əleyhinə bəyanatlar verməsi, Ermənistanı Cənubi Qafqazda bir silahlı forpost kimi yaratmaq cəhdləri gələcəkdə çox böyük fəsadlar törədəcək. Buna görə, biz bununla bağlı ABŞ və Avropadakı tərəfdaşlarımıza xəbərdarlıq etmək üçün açıqlamalar verdik.

Geosiyasi vəziyyətin dəyişdiyini deyən Prezident İlham Əliyev belə bir şəraitdə Azərbaycan-Türkiyə birliyinin hər zaman olduğu kimi, bu gün də güclü olmasının vacibliyini qeyd edib və bu birliyi pozmaq istəyənlərin arzularının puç olacağına əminliyini bildirib.

AHİK sədri, Milli Məclisin deputatı Səttar Möhbalıyevin "Azərbaycan" qəzetində "Mərhəmətin zərif rəmzi" adlı məqaləsi dərc olunub.Məqalə ilə tanış olarkən hiss edirsən ki,AHİK sədri bu strukturda çalışanların qarşısında hansı vəzifələri qoyub.

Azərbaycan Dəniz Nəqliyyatı İşçiləri Həmkarlar İttifaqı Respublika Komitəsinin sədri Səməd Allahverdiyev  bizimlə söhbətdə bildirdi ki,bu gün qarşıya qoyulan bütün vəzifələrin öhdəsindən gəlmək üçün tam gücləri ilə çalışırlar.Hər bir dənizçinin hüquq və mənafelərini qoruyan, onların sosial-iqtisadi rifahını yüksəldən bu təşkilatın üzvlərini öz ailəmin üzvləri hesab edir, heç bir fərq qoymuram.

“Bizim keçirdiyimiz tədbirlərə nəzər salmaq kifayətdir ki,insanlarda Azərbaycan Dəniz Nəqliyyatı İşçiləri Həmkarlar İttifaqı Respublika Komitəsi hansı işləri necə gördüyü haqda təsəvvür yaransın”- deyən Səməd müəllim daha sonra bildirdi ki, “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin sədri Rauf Vəliyevin yaxşı bir sözü bizim üçün şüara çevrilib. “Gəmiçinin talehi təkcə rəhbərlikdən asılı deyil.Həmkarlar İttifaqı təkcə tələb etməklə işini bitmiş hesab etməməlidir,yeri gələndə gəmiçiliyin işini yaxşılaşdırmaq üçün təkliflər verməlidir…”

Səməd Allahverdiyev özü uzun illər gəmiçilik həyatı yaşayıb.Onun ömür kitabını vərəqləyəndə görürsən ki, bu adam çox keşməkeşli yollardan keçib.Bəlkə elə buna görədir ki, bu gün dənizçilər onu Azərbaycan Dəniz Nəqliyyatı İşçiləri Həmkarlar İttifaqı Respublika Komitəsinin sədrindən çox bir ata kimi sevir.

“Mən çox xoşbəxtəm ki, ömrümün 40 ildən çoxunu dənizçiliyə həsr etmişəm, dənizçilərlə bir yerdə olmuşam. Bakı Dənizçilik Məktəbi var idi, sənədlərimi verdim ora, qəbul olundum. İşləyə-işləyə həmin gəmi sürücülüyü fakültəsinə daxil oldum və təhsilimi davam etdirə-etdirə gəmi sürücüsü – kapitan vəzifəsinə yüksəldim. 1993-cü ilin martına kimi kapitan vəzifəsində çalışdım. 1993-cü ilin mart ayının 10-da Həmkarlar Təşkilatına sədr seçildim. Hər bir insanın dərdi,səri,qayğıları ola bilər və mən onlara cavabdehlik daşıyıram. Hazırda bu sahədə çalışmaqdan qürur duyuram və gələcəkdə də öz nəvələrimə tövsiyə edəcəyəm ki, bu sahələrdən birində çalışsınlar”.

Söhbətimizin sonunda Səməd müəllim bildirdi ki, "Azərbaycan Xəzər Dəniz Gəmiçiliyi” QSC-nin (ASCO)-nun Sosial inkişaf və nəqliyyat departamentinin təşkilatçılığı ilə bütün strukturlarda çalışanların sosial həyatını yaxşılaşdırmaq üçün əlimizdən gələni edirik. 44 günlük Vətən savaşından sonra hərbi əməliyyatlarda iştirak edən əməkdaşlarımızın,şəhidlərimizin ailələrini daima diqqətdə saxlayırıq.

Biz də öz növbəmizdə inanırıq ki, Azərbaycan Dəniz Nəqliyyatı İşçiləri Həmkarlar İttifaqı Respublika Komitəsini dənizçilərin ümid yeri hesab etmək olar.

Z.Vəliyev

Azərbaycanda qadın dövlətə xəyanətdə ittiham olunur.

Yusifova Validə Elçin qızı Dövlət Təhlükəsizliyi Xidməti (DTX) tərəfindən həbs edilib. Lakin cinayət işinin təfərrüatı haqda məlumat yayılmayıb.

Artıq iş üzrə ibtidai istintaq tamamlanıb, toplanmış materiallar baxılması üçün Gəncə Ağır Cinayətlər Məhkəməsinə daxil olub.

Xanım müttəhimə qarşı Cinayət Məcəlləsinin 274-cü (dövlətə xəyanət) maddəsi ilə ittiham irəli sürülüb.

Sail Ağasəlim

AFFA-nın Hesabat-Seçki konfransında quruma yeni prezident seçilib.

Dövlət Neft Şirkətinin (SOCAR) prezidenti Rövşən Nəcəf federasiyanın rəhbəri olub.

Qeyd edək ki, 2008-ci ildən AFFA-ya Rövnəq Abdullayev rəhbərlik edirdi.

Azərbaycan Respublikasının Prezidenti İlham Əliyev aprelin 2-də Türkiyə Respublikasının Prezident Administrasiyasının Müdafiə Sənayesi Komitəsinin sədri Haluk Görgünün rəhbərlik etdiyi nümayəndə heyətini qəbul edib.

AZƏRTAC xəbər verir ki, nümayəndə heyətinə “ASELSAN” şirkətinin baş direktoru Ahmet Akyol, “ASFAT” şirkətinin baş direktoru Behçet Karataş, “HAVELSAN” şirkətinin baş direktoru Mehmet Akif Nacar, “Maşınqayırma və Kimya Sənayesi” şirkətinin baş direktoru İlhami Keleş, “REPKON Grup” şirkətinin prezidenti İbrahim Külekçi, “ROKETSAN” şirkətinin baş direktoru Murat İkinci, “Müdafiə Texnologiyaları və Mühəndislik” şirkətinin baş direktoru Özgür Güleryüz, “Türkiyənin Aviasiya və Kosmos Sənayesi - TUSAŞ” şirkətinin baş direktoru Temel Kotil daxildir.