Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyası davam edir.

Bakıvaxtı.az xəbər verir ki. bu gün aksiyanın 114-cü günüdür.

Aksiya gecə saatlarında da davam etdirilib.

Bu səhəri də adəti üzrə Azərbaycan Dövlət Himninin səsləndirilməsi ilə açan etirazçılar aksiyanın keçirildiyi ilk gündən etibarən dünya ictimaiyyətini ekologiyanı qorumağa çağırırlar.

Ekofəallar və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, "Экоциду нет! Мониторингу да!" şüarlarını səsləndirirlər.

İsmayıl Alısoy

Azərbaycan Respublikasının Prezidenti İlham Əliyev aprelin 3-də Türkiyənin “Baykar” şirkətinin texniki direktoru Səlcuq Bayraktarı qəbul edib.

AZƏRTAC xəbər verir ki, Səlcuq Bayraktar Türkiyə Prezidenti Rəcəb Tayyib Ərdoğanın salamlarını dövlətimizin başçısına çatdıraraq Türkiyədə baş verən zəlzələnin fəsadlarının aradan qaldırılmasında göstərilən qardaşlıq yardımına görə Rəcəb Tayyib Ərdoğanın Azərbaycan Prezidentinə minnətdarlığını bir daha ifadə edib.

Dövlətimizin başçısı salamlara görə təşəkkürünü bildirib, onun da salamlarını Türkiyə Prezidentinə çatdırmağı xahiş edib.

Prezident İlham Əliyev zəlzələ zamanı həlak olanlara bir daha Allahdan rəhmət diləyərək, Azərbaycanın Türkiyəyə yardımını qardaşlıq borcu kimi dəyərləndirib.

Azərbaycan Prezidenti bu yaxınlarda Ankarada Türkiyə Prezidenti ilə görüşünü və Rəcəb Tayyib Ərdoğanın Azərbaycana səfərlərini məmnunluqla xatırlayaraq, Türkiyə Prezidentinin işğaldan azad edilmiş ərazilərimizə səfərlərinin xüsusi əhəmiyyət daşıdığını qeyd edib.

Prezident İlham Əliyev Türkiyənin müdafiə sənayesinin son illərdə çox böyük nailiyyətlər əldə etdiyini deyərək, bu xüsusda “Baykar” şirkətinin fəaliyyətinin aparıcı rol oynadığını vurğulayıb və bu şirkətin istehsal etdiyi məhsulların Vətən müharibəsi dövründə erməni işğalçılarının hərbi texnikasının məhv edilməsində oynadığı rolu bir daha qeyd edib.

Söhbət zamanı Azərbaycanla Türkiyə arasında dostluq və qardaşlıq münasibətlərinin bütün digər sahələrdə olduğu kimi hərbi və müdafiə sənayesi sahələrində də uğurla inkişaf etdiyi vurğulanıb, əməkdaşlığın perspektivləri ətrafında fikir mübadiləsi aparılıb.

Sonda dövlətimizin başçısına xatirə hədiyyəsi təqdim olunub.

 

Qərbi Azərbaycan İcması 31 Mart - Azərbaycanlıların Soyqırımı Gününü ilə əlaqədar bəyanat yayıb.

Bəyanatda deyilir:

“31 Mart - Azərbaycanlıların Soyqırımı Gününü Qərbi azərbaycanlılar xüsusi hüznlə qeyd edirlər. Qafqaza ermənilərin kütləvi köçürülməsindən sonra erməni ekstremist silahlı qrupları və Ermənistan hökuməti tərəfindən Azərbaycan xalqına qarşı soyqırımı həyata keçirilib. Soyqırımı etnik nifrət aşılayan irqçi ideologiya zəminində sistemli şəkildə həyata keçirilib.

31 mart 1918-ci ildə Bakıda ifrat millətçi Daşnaksutyun partiyasının silahlı birliyi tərəfindən törədilmiş kütləvi qətliam ondan əvvəlki və sonrakı dövrlərdə, tarixi Azərbaycan torpaqlarında xalqımıza qarşı törədilmiş geniş miqyaslı soyqırımı təcəssüm edən dəhşətli bir hadisədir.
1905-ci ildən başlamış bu soyqırımı Azərbaycanın qərb hissəsində xüsusilə amansız olub. Ermənistan ordusu 1918-20-ci illərdə Zəngəzur, Göyçə, Dərələyəz, Sürməli, Şərur və digər bölgələrdə azərbaycanlılara qarşı kütləvi qırğınlar törədib və etnik təmizləmə həyata keçirib.

Ermənistan ordusunun 1918-ci ildə Qacarlar dövlətinin Xoy, Salmas, Urmiya və Qaradağ bölgələrinə soxularaq ora pənah aparmış qaçqınları və yerli azərbaycanlıları kütləvi şəkildə öldürməsi bu dövlətin təkcə öz ərazisində etnik təmizləmə aparmaq deyil, həm də azərbaycanlıları bir qrup kimi tamamilə məhv etmək niyyətini sübut edir.

Yüzminlərlə azərbaycanlının öldürüldüyü bu soyqırımı aktları nəticəsində vaxtilə indiki Ermənistan ərazisində əhalinin 80 faizindən çoxunu təşkil etmiş azərbaycanlılar artıq 1921-ci ildə həmin ərazidə etnik azlıq təşkil etməyə başladılar. 1948-52, 1987-91-ci illərdə aparılmış etnik təmizləmə nəticəsində azərbaycanlılar tamamilə oradan qovulublar. Hazırda bir nəfər də olsun azərbaycanlı indi Ermənistan adlanan o ərazidə qalmayıb.

Azərbaycanlıların bütün tarixi-mədəni irsi, məscidləri və qəbiristanlıqları dağıdılıb. 1897-ci ildə dövlət qeydiyyatına alınmış 269 məsciddən cəmi 1-i salamat qalıb.

Ermənistan BMT-nin Nizamnaməsinə, Ümumdünya İnsan Hüquqları Bəyannaməsinə və insan hüquqları sahəsində çoxsaylı beynəlxalq konvensiyalara tərəf olsa da, irqçi siyasətini davam etdirir. Bu ölkə azərbaycanlıların öz evlərinə təhlükəsiz və ləyaqətli şəkildə geri qayıtmasına mane olur, azərbaycanlılara qarşı insanlıq əleyhinə cinayətlər və terror aktları törətmiş Qaregin Njde, Andranik Ozanyan, Drastamat Kanayan, Monte Melkonyan kimi ünsürləri şöhrətləndirilir və Njdeizm kimi nasist ideologiyasını dövlət səviyyəsində təşviq edir.

Biz Ermənistan dövlətini törətdiyi soyqırımı, etnik təmizləmə, insanlıq əleyhinə cinayətlər və müharibə cinayətlərinə görə məsuliyyətini etiraf etməyə və barışıq naminə zəruri addımları atmağa çağırırıq. Ermənistan oradan qovulmuş azərbaycanlıların təhlükəsiz və ləyaqətli şəkildə geri qayıtmasına şərait yaratmalı və dağıtdığı Azərbaycan mədəni irsini bərpa etməlidir.

Həmçinin, Ermənistan azərbaycanlılara qarşı nifrət və ayrı-seçkiliyi aşılayan siyasət və praktikasını dayandırmalı, insanlıq əleyhinə cinayət törətmiş şəxsləri ədalət məhkəməsinə təslim etməli, onları şöhrətləndirməyə dərhal son verməli, azərbaycanlılara qarşı cinayətlərdə iştirak etmiş hərbi və siyasi xadimlərə, terrorçulara qoyulmuş abidələri sökməli və aparılmış yer adları dəyişikliklərini ləğv etməlidir”.

Həkim olmaq məsuliyyətdir

“Həkimlik sənəti daim inkişaf edir, qazanılmış təcrübə hesabına zənginləşərək irəliləyir. Heç  bir  peşədə  Hippokrat andı kimi and yoxdur. Hippokrat andı içən hər bir həkim o anda sona qədər sadiq qalmalıdır.”

Heydər Əliyev

 Həkim - bu sahədə əldə etdiyi bilik və bacarıqlarını insanların xəstəliklərinin müalicəsinə, insan sağlamlığının qorunması və saxlanılmasına xidmət göstərən insandır. Həkim peşəsi olduqca çətin və məsuliyyət tələb edən bir peşədir. Bu qədim sənəti seçən insan daim fövqəladə vəziyyətlərə hazır olmalı və insanlara yardım etmək hissindən həzz almalıdır. Əlbəttə ki, bu geniş ruhiyyə və insanlığa dərin məhəbbət tələb edir. Bəli, öz peşəsinin vurğunu olan Hippokrat andını lazımınca yerinə yetirən həkimlərimiz çoxdur. Hippokrat andına sadiq qalaraq  öz peşəsini sevən və illər ərzində göstərdiyi xidməti sayəsində insanların böyük hörmətini və sevgisini qazanmış  həkimlərimizdən biridə  Nəsibə  xanım Quliyevadır.

 Nəsibə Köçəri qızı Quliyeva (Kəngərli) 1962-ci il fevral ayının 10-da Tərtər rayonunda ziyalı ailəsində anadan olmuşdur. Ailədə 5 uşaq olublar, 2 qardaş, 3 bacı. Nəsibə xanım ailənin sonbeşiyi olub. Atası Köçəri Quliyev  bir çox rəhbər vəzifələrində çalışıb. 1962-ci ildən uzun  illər  kolxoz sədri işlədikdən sonra,  xalqın etimadını qazandığına görə  millət vəkili seçilmişdir. Ulu öndər Heydər Əliyev  tərəfindən  dövlətə və xalqına  sədaqətlə  xidmət etdiyinə görə  bir çox fəxri medallarla və 1970-ci ildə “Lenin ordeni” ilə təltif olunmuşdur. Anası Zümrüd xanım isə evdar qadın  olsa da,  gözəl  səsi  və  rəqs etmə bacarığı olub.  Buna görə də  Nəsibə  xanım  hələ orta  məktəbdə oxuyarkən  musiqiyə, ədəbiyyata böyük həvəsi olub. Orta məktəbdə keçirilən hər bir yarışmalarda  birinciliyi  qazandığı üçün müəllimləri ona xüsusi diqqət yetiriblər. Nəsibə xanımın həm də gözəl şeir demə qabiliyyəti də olub. Bu bacarıq və istedadına görə, bütün rayon tədbirləri  Nəsibə xanıma həvalə edilmişdir. O, isə  hər bir tədbirə öncədən hazırlıqlı olaraq məsuliyyətlə yanaşıb. Buna görə də  tədbir və rayon yarışmalarında birinciliyi əldə etdiyinə görə, məktəbin direktoru və müəllim kollektivinin Nəsibə xanıma qarşı sevgi və qayğıları əvəzsiz olub. 



Nəsibə xanım Quliyeva 7-8-ci sinifdə oxuyarkən qələmə aldığı  hekayələr, şeirlər və məqalələri  “Qızıl Bayraq” rayon qəzetində və  “Azərbaycan Gəncləri” qəzetində dəfələrlə dərc edilmişdir. Baba yurdu olan Kəngərli  kəndinin adını isə özünə təxəllüs kimi götürmüşdür.

 Nəsibə xanım Quliyeva 1979-cu ildə 6 saylı orta məktəbi qızıl medalla bitirdikdən  sonra,  Azərbaycan Dövlət Tibb Universitetinin  2-ci müalicə profilaktika  fakültəsinə daxil olmuş, 1986-cı ildə oranı müvəffəqiyyətlə bitirərək müalicə işi üzrə ixtisasa yiyələnmişdir. 1986-1987-ci illərdə ixtisası üzrə internatura keçmişdir. 1988-1995-ci illər ərzində 16 saylı tibbi sanitar hissədə həkim-terapevt kimi çalışmış, 2008-ci ildə götürdüyü elmi işi müdafiə edərək, tibb üzrə fəlsəfə doktoru adına layiq görülmüşdür. 1995-ci ildən Akademik M.Ə. Mirqasımov adına Respublika  Klinik  Xəstəxanasında  həkim-terapevt  kimi fəaliyyət göstərir.  Onun 15 elmi məqaləsi bir çox elmi konfransların  materiallarında və müxtəlif  tibb  jurnallarında çap edilmişdir. Nəsibə xanım 2020-ci ilin may ayında Ankarada Başkent Universiteti Xəstəxanasında exokardioqrafiya və koronar reanimasiya şöbəsində nəzəri və praktiki təcrübə proqramını müvəffəqiyyətlə tamamlamış  və professor  İ.Haldun  Müderrisoğlu  tərəfindən  sertifikatla təltif olunmuşdur. Nəsibə xanım Quliyeva  2020-ci ilin iyun ayından Yeni  Klinikaya ezam olunaraq  1 il 3 ay çox ağır və gərgin günlərdə fasiləsiz çalışaraq, COVİD-19-la mübarizə aparan qəhrəman həkimlərimizdən biridir. Azərbaycan və Avropa Kardioloqlar Cəmiyyətinin üzvü, həmçinin Azərbaycan Hepatoloqlar və Qastroentoroloqlar İctimai Birliyinin üzvüdür. Nəsibə xanım həm də iki şeir kitabının və bir neçə mahnının da müəllifidir. Bir oğlu, bir qızı və iki nəvəsi var. Biz də Nəsibə xanıma  həkimlik borcunu ləyaqətlə yerinə yetirdiyinə görə, ona can sağlığı, şərəfli peşə yolunda böyük uğurlar arzu edirik.

 Afət İlkin

İran İslam Respublikası Ordusunun Quru Qoşunlarının Komandanı Kiomərs Heydəri tərəfindən Azərbaycana münasibətdə çirkin iftira və böhtan xarakterli fikirlər səsləndirilib.

Bu barədə Azərbaycan Müdafiə Nazirliyinin açıqlamasında bildirilir.

Qeyd olunur ki, K.Heydəri öz cəfəng fikirlərində Azərbaycanda guya “sionist” qüvvələrin olması və 44 günlük Vətən müharibəsində Azərbaycanın Suriyadan gətirilən İŞİD terroristlərindən istifadə etdiyini və onların hələ də ölkə ərazisində olduğunu iddia edir. O, eyni zamanda, İran tərəfindən Ermənistan ilə sərhəddə dəyişikliklərə icazə verilməyəcəyini deyir:

“İlk öncə bildiririk ki, Azərbaycan Respublikası ərazisində hər hansı xarici qüvvələrin olması haqqında İran tərəfinin ittihamı əsassızdır və tamamilə qəbuledilməzdir. Ümumiyyətlə, Azərbaycan Respublikasının ərazisində kənar elementlər mövcud deyildir.

K.Heydəriyə xatırlatmaq istərdik ki, Ermənistan 30 il ərzində Azərbaycan ərazilərini işğal altında saxlayıb. Bu hərbi təcavüz nəticəsində Azərbaycan-İran dövlət sərhədinin 132 kilometrlik hissəsi də işğal edilmişdi. Lakin İran tərəfi bir dəfə də olsun Ermənistana münasibətdə ittihamedici açıqlama verməyib. Əksinə bu dövr ərzində İran-Ermənistan qardaşlığı daha da güclənib. Bu gün də heç kimə sirr deyil ki, Ermənistanın dünyada iki əsas müttəfiqi varsa onlardan biri Fransa, ikinci isə İrandır.  

Azərbaycan Respublikası bütün ölkələrin ərazi bütövlüyünü dəstəkləyir və dövlətlərin daxili işlərinə qarışmır.

44 günlük Vətən müharibəsində Azərbaycanın guya İŞİD terrorçularından istifadə etməsinə dair ittihama cavab olaraq bildiririk ki, şanlı Azərbaycan Ordusu təkbaşına torpaqlarımızı işğaldan azad edərək zəfər salnaməsi yazıb. Bu iddia cəfəng ittiham və iftiradan başqa bir şey deyildir. Bu ittihamın məhz terrorizmi dəstəkləyən və adı dünyanın müxtəlif ölkələrində terror əməllərinin törədilməsində keçən dövlətin yüksək çinli hərbçisi tərəfindən irəli sürülməsi istehza və gülüş doğurur”.

Qeyri-iş günlərinin sayı Əmək Məcəlləsinə və Nazirlər Kabinetinin “2023-cü il üçün Novruz, Ramazan və Qurban bayramları günlərinin müəyyən edilməsi haqqında” 2022-ci il 9 dekabr tarixli 438 nömrəli Qərarına əsasən müəyyənləşib.

Beləliklə, Ramazan bayramında ardıcıl olaraq 21, 22, 23, 24 aprel qeyri-iş günləridir. Ümumilikdə həftəsonları da daxil olmaqla, gələn ay 12 gün iş olmayacaq.

Güneyli-quzeyli azərbaycanlıların ermənilər və havadarları tərəfindən soyqırımına məruz qalmalarından 105 il ötür.

Prezident Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” fərmanla 31 mart “Azərbaycanlıların Soyqırımı Günü” elan edilib.

Bu, ermənilərin güneyli-quzeyli azərbaycanlılara qarşı törətdikləri soyqırımının ümumiləşdirilmiş tarixidir. Ermənilər havadarlarının yardımı və dəstəyi ilə yüz ildən artıqdır ki, azərbaycanlılara qarşı soyqırımı həyata keçirirlər.

1918-ci ilin martında kütləvi qırğınlar Bakı şəhərində və Bakı quberniyasının müxtəlif bölgələrində, Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və başqa ərazilərdə qeydə alınıb.

Soyqırımı nəticəsində onminlərlə azərbaycanlı qətlə yetirilib, bir o qədəri də itkin düşüb.

Yeri gəlmişkən, Birinci Dünya müharibəsindən əvvəl Bakı əhalisinin sayı təxminən 200 000 nəfər olub.

Erməni daşnakların liderlərindən biri olan Stepan Şaumyan sonralar etiraf edirdi ki, Hərbi İnqilab Komitəsi Qafqaz ordusunun qüvvələrini birləşdirərək yaxşı silahlanmış 6 000 nəfərlik dəstələr təşkil etmişdi.

O qeyd edirdi ki, milli xarakterli qırğınlara bilərəkdən imkan yaradırmışlar. Həmin vaxt S.Şaumyan və bolşeviklər sinfi mübarizə adı altında azərbaycanlılara qarşı soyqırımı törədiblər. Sovet dövründə kommunistlər onun adını əbədiləşdirmək üçün Xankəndinin adını dəyişdirmişdilər.

SSRİ dövründə və ondan sonrakı illərdə də ermənilər azərbaycanlılara qarşı vəhşiliklərindən əl çəkmədilər. 1987-ci ildə azərbaycanlılar indiki Ermənistan ərazisində yerləşən dədə-baba yurdlarından didərgin salındılar.

Erməni quldurlar Birinci Qarabağ müharibəsində Azərbaycanın Qaradağlı, Xocalı, Ağdaban, Ballıqaya, Başlıbel və s. yaşayış məntəqələrində soyqırımları törədiblər.

1941-45-ci illərdə Cənubi Azərbaycanda qurulmuş Azərbaycan Milli Hökumətinin başçısı Seyid Cəfər Pişəvəri “Bakıdakı ilk Sovet hökumətinin müqəddəratı” adlı məqaləsində həmin hadisələrə toxunaraq yazırdı: “Mən daşnakların vəhşiliklərini, saysız-hesabsız günahsız adamların, хüsusilə bitərəf iranlıların öldürülüb karvansaralarda meyitlərinin yandırılmasını öz gözümlə görmüşdüm. Bu, çoх faciəli və nifrətləndirici bir hərəkət olmuşdu. Heç bir əsas və ünvan olmadan yalnız kin və ədavət üzündən daşnakların törətdikləri cinayət hər bir insanın ruhunu sıхıb kədərləndirirdi”.

Mart qırğını Güney Azərbaycanın Urmiya şəhərində başlasa da, hələ 1917-ci ildən ermənilərin yerli türklərə, azərbaycanlılara hücumları adi hal almışdı. Urmiyadakı ABŞ nümayəndəsi Şedin təşəbbüsü və zəmanəti ilə şəhər sakinləri tərk-silah edildiklərindən ermənilərə müqavimət göstərə bilməmişdilər.

Məşhur tarixçi Seyid Əhməd Kəsrəvinin yazdığına görə, toplardan da istifadə edən erməni-aysor dəstələri bunun sayəsində şəhərdə xeyli insanın öldürülməsinə nail oldular. İran arxivlərində saxlanılan materiallara əsasən, təkcə 1918-ci ilin mart ayının 17-də, İlaxır çərşənbə günü erməni-daşnak və aysor dəstələri 500-dən çox evi yandırmış, 10 mindən çox insanı isə qətlə yetirmişdilər. Xalq arasında bu, “Urmu bəlası” olaraq yad edilir.

Silahlı kürd dəstələrinə Smitko adlanan İsmayıl xan, ermənilərə Petros ağa, xristian assurilərə isə Marşimon başçılıq edirdi. Birləşmiş koalisiyanın bütün hərəkət planları Qərbdə hazırlanmış, hətta silahlı quldur dəstələri belə, xaricin dəstəyi ilə silahlandırılmışdılar. Məsələn, birləşmiş koalisiya qüvvələrinin 30 minlik ordusunda rus və fransız zabitlər xidmət edirdilər.

Urmu, Salmas və Xoy şəhərlərində Azərbaycan türklərinə qarşı qətliam hadisələri 1918-ci ilin fevralından başlanmışdı. Birləşmiş erməni-kürd və assuri dəstələri fevral-mart ayları boyunca Urmu, Xoy və Salmasın ayrı-ayrı kəndlərində türk əhaliyə divan tutmuş, qarət etmiş, dinc əhalini qətlə yetirmişdilər... Bu soyqırımı təkcə Urmiyada deyil, Salmas, Xoy, Maku, Dilməqan şəhərlərində, Muğanda da törədilib. 1917-18-ci illəri əhatə edən bu hadisələr zamanı ermənilərin havadarlarının yardımı ilə Güney Azərbaycanda 200 minə yaxın Azərbaycan türkünü qətlə yetirdiklərinə dair tarixi faktlar var.

1918-ci ilin iyununda, Kazım Qarabəkir Paşanın rəhbərliyi ilə Osmanlı ordusunun Cənubi Azərbaycana daxil olmasından sonra bu hadisələrin qarşısı alınmasa da, ermənilərin vəhşiliklərinin qarşısı alınmışdı.

Ermənilərin İranda müsəlman azərbaycanlılara qarşı törətdikləri soyqırımından 105 il ötsə də, Tehran hakimiyyəti indiyədək bu hadisəni yada salmayıb. Həmin cinayətləri araşdıranlar daim təqiblərə məruz qalıblar. İrandakı rejim ermənilərin uydurduqları saxta soyqırımı ilə bağlı tədbirlərin keçirilməsinə də bir qayda olaraq şərait yaradıb. Əvvəllər İran hakimiyyəti bunu müxtəlif bəhanələrlə ört-basdır etməyə çalışırdı. Ancaq son illər baş verənlər Ermənistanı bütün istiqamətlərdə müdafiə edən Tehran rejiminin maskasını yırtdı. Həmin hadisələrdən sonra İranda qacarların hakimiyyəti devrildi. Onları panfarsizm ideologiyasının daşıyıcıları əvəzlədi. Hazırda İranda hakimiyyətdə olanlar onların davamçılarıdır. Ona görə də 105 il əvvəl törədilən soyqırımını gizlədirlər. Tehran rejimi bununla türklərə qarşı düşmənçiliyini, ermənilərə isə sevgisini göstərir.

“Report” Informasiya Agentliyi

Prezident İlham Əliyev su ehtiyatları, su təsərrüfatı və meliorasiya sahələrində idarəetmənin təkmilləşdirilməsi haqqında Fərman imzalayıb. 

Bununla bağlı Prezident.az məlumat yayıb. 

Fərmanla Azərbaycan Respublikası Fövqəladə Hallar Nazirliyinin Su Ehtiyatları Dövlət Agentliyinin əsasında Azərbaycan Dövlət Su Ehtiyatları Agentliyi yaradılıb.

“Azərsu” Açıq Səhmdar Cəmiyyəti və Azərbaycan Meliorasiya və Su Təsərrüfatı Açıq Səhmdar Cəmiyyəti əmlakları ilə birlikdə Agentliyin tabeliyinə verilib.

Müəyyən edilir ki, Agentlik Azərbaycan Respublikasında suyun mənbədən götürülməsi, emalı, nəqli və təchizatı sahəsində fəaliyyətin təşkilini təmin edən, dövlət mülkiyyətində olan meliorasiya və irriqasiya sistemlərinin, içməli su təchizatı, yağış və tullantı sularının emalı və axıdılması sistemlərinin istismarını, eləcə də bu sahədə xidmətlər göstərilməsini təşkil edən, balansında olan su təsərrüfatı obyektlərinin texniki vəziyyətinə müntəzəm nəzarəti həyata keçirən, Azərbaycan Respublikasında yerüstü, yeraltı su ehtiyatlarının, su və su təsərrüfatı obyektlərinin, hidrotexniki qurğuların, su təchizatı sistemlərinin monitorinqini aparan, bu sahələrdə vahid dövlət siyasətini və tənzimləməsini həyata keçirən mərkəzi icra hakimiyyəti orqanıdır.

Prezident İlham Əliyevin imzaladığı sərəncamla Zaur Rauf oğlu Mikayılov Azərbaycan Dövlət Su Ehtiyatları Agentliyinin sədri təyin edilib.

O, 1974-cü ildə Şamaxı şəhərində anadan olub. 1999-cu ildə Türkiyə Cümhuriyyətinin Boğaziçi Universitetinin Biznesin idarə olunması fakültəsini bitirib.

Sədr 2016-2018-ci illərdə “Agro Dairy” MMC-də Baş Menecer vəzifəsində çalışıb. 2018-2021-ci illərdə “Azərbaycan Supermarketləri” MMC-də İcraçı direktor vəzifəsində çalışıb. 

Ailəlidir, üç övladı var.

Qeyd edək ki, İlham Əliyev su ehtiyatları, su təsərrüfatı və meliorasiya sahələrində idarəetmənin təkmilləşdirilməsi haqqında Fərman imzalayıb. 

Fərmanla Azərbaycan Respublikası Fövqəladə Hallar Nazirliyinin Su Ehtiyatları Dövlət Agentliyinin əsasında Azərbaycan Dövlət Su Ehtiyatları Agentliyi yaradılıb.

“Azərsu” Açıq Səhmdar Cəmiyyəti və Azərbaycan Meliorasiya və Su Təsərrüfatı Açıq Səhmdar Cəmiyyəti əmlakları ilə birlikdə Agentliyin tabeliyinə verilib.