BizimAz.az - Siyasət

Kamaləddin Qafarov: “Azərbaycan bu torpaqların əsl sahibinin kim olduğunu sübuta yetirdi”

12:04 29.08.2023 | Baxış sayı: 11124

“Laçın rayonu 1992-ci il mayın 18-də Ermənistan silahlı qüvvələri tərəfindən işğal olunmuşdu. Böyük strateji əhəmiyyətə malik olan bu rayonun işğalı təkcə laçınlılar üçün deyil, bütün Azərbaycan xalqı üçün böyük faciə idi. Bu işğaldan sonra Ermənistanla keçmiş Dağlıq Qarabağ Muxtar Vilayəti arasında coğrafi əlaqə yaradıldı və bu, Azərbaycanın sonrakı ərazi itkilərinə yol açdı. İşğal nəticəsində rayonun əhalisi etnik təmizləməyə məruz qalıb, 300 nəfərdən artıq hərbi və mülki şəxs həlak olub və itkin düşüb. İşğal dövründə Ermənistan dövləti Laçında hərbi cinayət törədərək qanunsuz məskunlaşma aparırdı. Cari ilin avqust ayının 26-da Laçın şəhərində Həkəri çayının sahilində keçirilən “Laçın Şəhəri Günü” bayram tədbirində çıxış edən Ölkə Prezidenti İlham Əliyev bu məsələyə xüsusi toxunaraq tarixi həqiqətləri bir daha hər kəsin diqqətinə çatdırdı.”

Bu sözləri mətbuata açıqlamasında Milli Məclisin deputatı Kamaləddin Qafarov deyib.

Deputat bildirib: “Azərbaycan öz ərazilərini azad etmək üçün ədalətli müharibə apardı, öz torpaqlarında savaşdı və qalib gəldi. Şanlı ordumuz 44 gün ərzində Qələbəni əldə etdi və öz gücünü bütün dünyaya göstərdi. İkinci Qarabağ müharibəsində əldə olunmuş tarixi Qələbə nəticəsində dekabrın 1-də Laçın rayonu işğaldan azad edildi. Lakin keçmiş Laçın dəhlizi Laçın şəhəri və iki kənd – Zabux və Sus kəndlərindən keçdiyinə görə bu ərazilər müvəqqəti olaraq Azərbaycanın nəzarətində deyildi. Azərbaycan qısa müddət ərzində yeni yol çəkərək həm Laçına, həm də Zabux və Sus kəndlərinə qayıtdı. Azərbaycan öz möhtəşəm qələbəsini həm hərbi, həm də siyasi müstəvidə təmin etdi. Bu gün, müharibədən 3 ilə yaxın müddət keçməsinə rəğmən, cərəyan edən hadisələr belə deməyə əsas verir ki, təkcə ermənilər deyil, həm də onların bəzi xarici havadarları Azərbaycanın qələbəsini hələ də həzm edə bilmirlər. Lakin ölkəmizə qarşı aparılan çirkin təbliğat kampaniyaları nə dövlətimizin, nə də xüsusən möhtərəm Prezidentimiz cənab İlham Əliyevin iradəsinə təsir edə bilər. Cari ilin 23 aprel tarixində Laçın rayonunda, Azərbaycan-Ermənistan sərhədində sərhəd-buraxılış məntəqəsinin qoyulması da bunu bir daha bütün dünyaya nümayiş etdirdi. Dövlət başçımızın qeyd etdiyi kimi, “Laçın” sərhəd-buraxılış məntəqəsinin yaradılması ölkəmizin ərazi bütövlüyünün tam bərpası deməkdir. Laçınlılar artıq mayın 28-dən etibarən öz doğma el-obalarına qayıdıblar. Hazırda 1000-ə yaxın Laçın sakini şəhərdə məskunlaşmışdır və ilin sonuna qədər daha 900 ailə üçün evlər hazır olacaq. Bu isə o deməkdir ki, cari ilin sonuna qədər bir neçə min həm şəhər sakini, həm kənd sakini Laçında yaşayacaq. Bütün bunlar işğaldan azad edilmiş torpaqların əsil sahibinin kim olduğunu bir daha bütün dünyaya nümayiş etdirir. Xalqımız bundan sonra sülh, əmin-amanlıq şəraitində yaşayacaq, öz doğma torpağında qurub-yaradacaq.”

K.Qafarov Azərbaycanın Vətən müharibəsində əldə etdiyi tarixi Qələbəsinin əbədiləşdirilməsi məqsədilə görülən tədbirlərin əhəmiyyətindən bəhs edərək deyib: “Tarixi dəyişdirmək cəhdləri ermənilərin hər zaman ən çox istifadə etdikləri fitnəkarlıq olub. Belə hallara gələcəkdə yol verilməməsi üçün Azərbaycan dövləti bu gün Prezident İlham Əliyevin rəhbərliyi ilə məqsədyönlü addımlar atır. Dövlət başçısının 31 iyul 2023-cü il tarixli Sərəncamı ilə Azərbaycan Respublikasının işğaldan azad edilmiş əraziləri üzrə şəhər günləri təsis edilmişdir. Həmin Sərəncama əsasən 26 avqust Laçın şəhəri günü kimi müəyyən olunub. İşğaldan azad edilmiş bütün şəhərlərimizdə olduği kimi, Laçın şəhərində də İşğal və Zəfər muzeylərinin yerləşəcəyi Memorial Park salınır. Ölkə Prezidenti İlham Əliyevin sərəncamları ilə Laçın rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Respublikası Silahlı Qüvvələrinin 8397 hərbi qulluqçusunun “Laçının azad olunmasına görə” medalı ilə təltif olunmaları da tarixi həqiqətlərin gələcək nəsillərə olduğu kimi çatdırılması baxımından müstəsna əhəmiyyət kəsb edən haldır. Artıq bundan sonra erməni yalanları heç vaxt tarixi faktları təhrif edə bilməyəcək”.

Kamaləddin Qafarov: “Azərbaycan separatizmlə heç vaxt barışmayacaq”

10:21 06.08.2023 | Baxış sayı: 11227

“Ölkə Prezidenti İlham Əliyevin cari ilin iyul ayının 22-də Şuşada “Euronews” televiziya kanalına verdiyi müsahibə xüsusi özəlliyə malikdir. Bu özəllik ondan ibarətdir ki, cənab Prezidentin müsahibəsi həm də birbaşa Ermənistan əhalisinə və Qarabağda yaşayan ermənilərə konkret mesaj xarakteri daşıyır. Bu mesajda Prezident İlham Əliyev açıq mətnlə və birmənalı olaraq bildirdi ki, bizim Ermənistana qarşı hər hansı ərazi iddialarımız yoxdur və biz onların dövləti ilə sülh istəyirik. Əlbəttə ki, onlar da Azərbaycana qarşı ərazi iddialarından birdəfəlik əl çəkməlidirlər. Biz başa düşürük ki, uzun illər ərzində Ermənistan liderləri öz xalqını inandırırdılar ki, onlar dünyanın ən güclü ordusuna sahibdirlər. Lakin II Qarabağ savaşı bütün bunların uydurma təbliğatdan başqa bir şey olmadığını sübut etdi. Bu gün tarixin qaranlıq səhifələrini çevirmək və dinc qonşuluq mühitində həyatı yenidən qurmaq üçün hazırkı geosiyasi vəziyyəti və qüvvələr balansını aydın dərk etmək, nəzərə almaq lazımdır.”

Bu sözləri mətbuata açıqlamasında Milli Məclisin deputatı Kamaləddin Qafarov deyib.

Deputat bildirib ki, Azərbaycan dövləti Qarabağda yaşayan erməni əhalisinin hüquqlarını pozmaq niyyətində olmadığı kimi, onlara əlavə imtiyazların verilməsini də nəzərdən keçirməyəcək: “Qarabağda yaşayan ermənilər, birmənalı olaraq, başa düşməlidirlər ki, onlar Azərbaycan ərazisində yalnız Azərbaycan vətəndaşı olaraq yaşaya bilərlər və yalnız bu halda onların bütün hüquqları qorunacaqdır. Prezident İlham Əliyevin dediyi kimi, əgər bu gün Qarabağda yaşayan ermənilər Azərbaycan dövlətini saymadan, qanunlarımıza tabe olmadan yaşamağa davam edərək özlərinin təhlükəsizliyinə xaricdən hər hansı bir yeni qarant axtarırlarsa, onlar bilməlidirlər ki, heç bir qüvvə bizim ərazilərdə Azərbaycanla silahlı qarşıdurmaya girə bilməz. Qarabağın erməni əhalisi artıq haqqı nahaqdan seçməyi öyrənməlidir. Onlar qondarma liderlərinin arxasınca getməməlidirlər. Çünki bu “liderlər” istər 30 illik işğal dövründə, istər Vətən müharibəsinin gedişində və istərsə də indiki dövrdə - hər zaman yalan danışıblar. Bu separatçılar faktiki olaraq Qarabağın erməni əhalisini öz ambisiyalarının girovuna çeviriblər. Möhtərəm Prezidentimiz açıq-aydın bildirdi ki, Qarabağ erməniləri Azərbaycan cəmiyyətinin bir hissəsi olaraq təhlükəsizliklərinin və hüquqlarının, o cümlədən təhsil, mədəniyyət, dini, bələdiyyə hüquqlarının təmin edilməsi ilə normal həyat yaşayacaqlar. Yox, əgər onlar Azərbaycan qanunlarını saymamağa davam etsələr və öz “dövləti” olan “ölkədə” yaşayırlarmış kimi davransalar, bu gün olduqları vəziyyət getdikcə pisləşəcək.”

K.Qafarov Azərbaycanın separatizmlə mübarizəsinə fərqli yanaşma tərzi nümayiş etdirən beynəlxalq təşkilatlara Prezident İlham Əliyevin ünvanladığı mesajların xüsusi önəm kəsb etdiyini vurğulayaraq deyib: “Bu gün bəzi beynəlxalq təşkilatlar hələ də ölkəmizə qarşı ikili standartlar siyasətini tətbiq etməyə səy göstərirlər. Xüsusilə son vaxtlar Qarabağın erməni əhalisinin təhlükəsizliyi ilə bağlı bu təşkilatların Azərbaycandan hansısa zəmanət tələb etmələri absurddur. Bu gün biz Ukraynaya kömək etmək üçün Avropa və Qərbin daha da yaxınlaşdığını, Gürcüstanın separatçı regionları ilə bağlı yanaşmasının Qərb ictimaiyyəti və siyasi dairələri tərəfindən tamamilə anlaşıqlı qarşılanmasını müşahidə edirik. Hətta İspaniyanın 5-6 milyon nəfər əhalisi olan və ermənilərdən fərqli olaraq öz dövləti olmayan Kataloniyaya referendum keçirməyə icazə verməməsi də separatizmə qarşı mübarizə üsulu olaraq dəyərləndirilir. Belə olan halda, nəyə görə bizim separatizmə qarşı mübarizəmizə fərqli yanaşma sərgilənir? Bu yanaşma ölkəmizə və xalqımıza qarşı 30 illik işğal dövründə sərgilənən münasibətin davamıdır. Həmin dövrdə əksər beynəlxalq təşkilatlar Azərbaycanı işğal faktı ilə barışdırmağa çalışırdılar. Azərbaycan Prezidenti İlham Əliyev 2003-2020-ci illər ərzində ölkəmizin və xalqımızın öz torpaqlarının itirilməsi ilə barışmayacağını deyirdi, bu gün də möhtərəm dövlət başçımız eyni qətiyyətlə separatizmə dözməyəcəyimzi birmənalı şəkildə bəyan edir. Artıq bu mesajdan hər kəs doğru nəticə çıxarmalıdır. Cənubi Qafqazda dayanıqlı sülhün və inkişafın əngəllənməsini planlanlayan bütün qüvvələr öz çirkin niyyətlərindən birdəfəlik əl çəkməlidirlər.”

Kamaləddin Qafarov: “Azərbaycan-Çin münasibətləri möhkəm təməl üzərində qurulub”

10:23 29.07.2023 | Baxış sayı: 23278

“Azərbaycanın hər gün daha da möhkəmlənən beynəlxalq mövqeləri, Ölkə Prezidenti cənab İlham Əliyevin həyata keçirdiyi uğurlu siyasət nəticəsində əldə olunan siyasi və iqtisadi nailiyyətlər getdikcə daha çox ölkənin, hətta Çin kimi qlobal güc olan dövlətlərin belə ölkəmizə maraq və diqqətini artırır. Qeyd olunmalıdır ki, “China Media Group” media korporasiyasının əməkdaşının dövlətimizin başçısına ünvanladığı suallardan açıq-aşkar məlum olur ki, beynəlxalq ictimaiyyətin ümumilikdə ölkəmizlə yanaşı konkret olaraq Prezident İlham Əliyevin şəxsiyyətinə olan marağı da çox yüksəkdir. Bu, ilk növbədə, möhtərəm dövlət başçımızın şəxsi liderlik keyfiyyətləri, siyasi iradəsi və diplomatik məharəti nəticəsində formalaşan münasibətdir.” Çin kimi dünyanın ən güclü iqtisadiyyatlarından birinə, bəlkə də birincisinə sahib olan bir dövlətin nüfuzlu media təmsilçisinin Azərbaycanın dünyanın dəyişməkdə olan geosiyasi mənzərəsi fonunda həssas rol oynayaraq böyük nailiyyətlər əldə etdiyini, iqtisadi və sosial baxımdan özü üçün nadir inkişaf yolu yarada bildiyini söyləməsi, birmənalı olaraq, cənab Prezident İlham Əliyevin yürütdüyü siyasi kursun təntənəsinin etirafıdır”.

Bu sözləri mətbuata verdiyi açıqlamasında Milli Məclisin deputatı Kamaləddin Qafarov deyib.

Deputatın fikrincə, Çinin təkcə məhdud siyasi və iqtisadi dairələrində deyil, həmçinin geniş ictimaiyyət tərəfindən Prezident İlham Əliyevin çıxış və müsahibələri izlənilir və yüksək qiymətləndirilir. “İki il bundan öncə möhtərəm dövlət başçımızın BBC-nin jurnalistinə verdiyi müsahibəni xatırlayan “China Media Group”-un müxbiri həmin müsahibədən sonra Çin ictimaiyyətində Qərblə münasibətdə maraqların tarazlaşdırılması üçün bir ölkə rəhbərinin məhz bu cür addım atmalı olduğuna dair fikir formalaşdığını deməklə, Prezident İlham Əliyevin onların ölkəsində də siyasi lider kimi böyük nüfuza sahib olduğunu etiraf etmiş oldu.”

Deputat Prezident İlham Əliyevin müsahibəsində vacib məqamlardan biri kimi, Azərbaycan-Çin münasibətlərinin formalaşmasında Ulu Öndər Heydər Əliyevin müstəsna xidmətləri barədə deyilənləri qeyd edib: “Azərbaycan-Çin dostluq münasibətlərinin təməli xalqımızın Ümummilli Lideri Heydər Əliyev tərəfindən qoyulub. Bu faktı Çin ictimaiyyətində də yaxşı bilirlər və buna görə Ulu Öndərimizin xatirəsini ehtiramla yad edirlər. Prezident İlham Əliyevin dediyi kimi, Ümummilli Lider Heydər Əliyev Çinə etdiyi səfərləri, bu ölkənin rəhbərləri ilə keçirdiyi görüşləri ilə dövlətlərimiz arasında əməkdaşlığın çərçivəsini yaratmışdır. Bu gün həmin münasibətlər qarşılıqlı hörmət əsasında inkişaf edərək dostluq əlaqələrinə çevrilib. Çinli jurnalist Ulu Öndərin onların ölkəsinə rəsmi səfərləri zamanı rəsmi proqramdan əlavə sadə çinli ailələrlə görüşdüyünü, onların həyatı ilə maraqlandığını bildirdi. Hələ SSRİ Nazirlər Soveti Sədrinin birinci müavini vəzifəsində çalışdığı vaxtlardan Çini yaxşı tanıyan Ümummilli Liderimiz artıq müstəqil Azərbaycanın Prezidenti seçiləndən sonra bu ölkə ilə ikitərəfli münasibətlər qurmağı özünün xarici siyasət prioritetlərindən birinə çevirmişdi.”

K.Qafarov Prezident İlham Əliyevin Azərbaycan-Çin münasibətlərinin böyük inkişaf perspektivlərinə malik olduğuna dair ifadə etdiyi fikirlərin əhəmiyyətini vurğulayaraq deyib: “Möhtərəm dövlət başçımız öz müsahibəsində bildirmişdir ki, Azərbaycan-Çin münasibətləri bu gün əla səviyyədədir və ikitərəfli əlaqələrin geniş gündəliyi, əməkdaşlığın çox aydın perspektivləri vardır. Ölkələrimizin əksər siyasi və iqtisadi məsələlərdə mövqeləri üst-üstə düşür. İki ölkə arasında qarşılıqlı ticarətin həcmi getdikcə artır və bu sahənin də böyük potensialı var. Xüsusilə yeni nəqliyyat marşrutları ölkələrimizin gələcəkdə daha da yaxınlaşmasında böyük rol oynayacaqlar. Əlbəttə ki, bu məqam regional təhlükəsizliyə və sabitliyə böyük töhfə olacaq. Dövlət başçımızın dediyi kimi, ölkələr qarşılıqlı faydalı əməkdaşlıq formatı çərçivəsində birləşirsə, bu, regionun sabitliyini, proqnozlaşdırılmasını, firavanlığını və inkişafını daha da gücləndirir”.

Kamaləddin Qafarov: “Prezident İlham Əliyev Paşinyanı yenidən susdurdu”

18:51 31.05.2023 | Baxış sayı: 16480

“Azərbaycan özünün beynəlxalq mövqelərini möhkəmlətməkdə davam edir. Bu önəmli məqam mayın 25-də Moskvada keçirilmiş Ali Avrasiya İqtisadi Şurasının geniş tərkibli iclasında bir daha özünü aşkar şəkildə göstərdi. Azərbaycan Prezidenti İlham Əliyevin bu mötəbər beynəlxalq tədbirdə qonaq qismində iştirakı, eləcə də iclasın gedişində aparılan müzakirələr, səsləndirilən fikirlər Avrasiya İqtisadi Birliyinə üzv dövlətlərlə ölkəmiz arasında münasibətlərin ən yüksək səviyyədə olduğunu növbəti dəfə təsdiq etdi. Tədbirdə çıxış edən möhtərəm Prezidentimiz ali toplantıda təmsil olunan dövlətlərlə mövcud qarşılıqlı əlaqələr barədə ətraflı açıqlamalar verərək bildirdi ki, Ermənistan istisna olmaqla, Azərbaycanın Avrasiya İqtisadi Birliyinin üzvləri ilə əməkdaşlığı 30 il ərzində uğurla inkişaf edir”.

Bu fikirləri mətbuata açıqlamasında Milli Məclisin deputatı Kamaləddin Qafarov bildirib.

Millət vəkili deyib:”Şərq-Qərb və Şimal-Cənub nəqliyyat yollarının coğrafi kəsişməsində yerləşən Azərbaycan özünün nəqliyyat-logistika infrastrukturunun yenilənməsinə və təkmilləşdirilməsinə xüsusi diqqət verir, bu sahəyə böyük sərmayələr yatırılır. Hazırda ölkəmizin bütün istiqamətlərdə daşımaları həyata keçirmək üçün geniş imkanları var və bu imkanlar getdikcə artır. Dünya okeanına birbaşa çıxışı olmayan Azərbaycan Şərq-Qərb istiqamətində Xəzər üzərindən daşımaların həyata keçirilməsində əsas rollardan birini oynayır. Ölkəmiz hazırda Xəzər dənizində 50 gəmidən ibarət ən böyük ticarət donanmasına malikdir. On beş milyon ton yükün daşınmasına hesablanmış Ələt Dəniz Limanı isə yaxın vaxtlarda modernləşdiriləcək və yükdaşımaların həcmi 25 milyon tona çatacaq. Bundan başqa, Azərbaycan illik 500 min ton yük dövriyyəsi ilə regionda ən iri hava yük donanmasına malikdir. Bu gün ölkədə 8 beynəlxalq hava limanı fəaliyyət göstərir. Onlardan ikisi işğaldan azad olunmuş torpaqlarda – Füzuli və Zəngilanda son iki ildə tikilib. Doqquzuncu beynəlxalq aeroport azad olunmuş Laçında tikilir və 2025-ci ildə istismara veriləcək. Bir məqamı da qeyd etmək lazımdır ki, Prezident İlham Əliyev Moskva toplantısında da Azərbaycanın hər zaman təkcə özünün deyil, həmçinin bütün region ölkələrinin və qonşu dövlətlərin də xalqlarının maraqlarına cavab verən təşəbbüslərlə çıxış etdiyini bir daha diqqət mərkəzinə çəkdi. Qeyd olundu ki, Azərbaycan ölkənin əsas hissəsini Naxçıvan Muxtar Respublikası ilə birləşdirəcək və eyni zamanda da beynəlxalq dəmir yolu marşrutlarının bir hissəsi olmaqla bütün regionun sürətli inkişafına səbəb olacaq Zəngəzur nəqliyyat dəhlizinin yaradılması təşəbbüsünün də müəllifidir.”

Deputat xüsusi olaraq vurğulayıb ki, hazırda yaranmış vəziyyət Azərbaycan ilə Ermənistan arasında sülh sazişinin imzalanması üçün kifayət qədər əlverişli ola bilər: “Cənab Prezident İlham Əliyevin çıxışında diqqəti çəkən ən vacib məqamlardan biri də bu oldu ki, dövlətimizin başçısı sülh gündəliyinin hələ də öz aktuallığını qoruduğunu və Azərbaycan ilə Ermənistan arasında münasibətlərin normallaşdırılması üçün ərazi bütövlüyünün və suverenliyin qarşılıqlı şəkildə tanınması əsasında ciddi imkanların mövcud olduğunu vurğuladı. Təəssüflər olsun ki, Ermənistanın baş naziri bu dəfə də ölkəmizin ünvanına müəyyən absurd ittihamlar səsləndirməklə rəsmi İrəvanın Cənubi Qafqazda dayanıqlı sülhə nail olunmasına qarşı olduğuna dair əsaslı şübhələrə yol açmış oldu. Azərbaycanın guya Laçın-Xankəndi yolunu bağladığını iddia edən Paşinyan ölkəmizin Ermənistanla sərhəddində nəzarət-buraxılış məntəqəsi qoymaq kimi beynəlxalq qaydalara tamamilə uyğun olan hüququnu mübahisələndirməyə çalışıb. Bundan başqa, Ermənistanın baş naziri Azərbaycan Prezidentinin öz çıxışında Zəngəzur dəhlizi ilə bağlı səsləndirdiyi fikirlərini ifadə etmək üçün işlətdiyi “dəhliz” sözünü təhrif etməyə çalışaraq, ölkəmizə qarşı daha absurd bir ittiham irəli sürüb. Paşinyan tədbir iştirakçılarını inandırmağa çalışıb ki, Azərbaycanın Ermənistana qarşı hansısa ərazi iddiaları var. Əlbəttə ki, bütün bu cəfəng ittihamlar cənab Prezident İlham Əliyevin məntiqli və sərrast cavabları ilə dərhal heçə endirildi və Paşinyanın yeganə nail olduğu məqam özünü növbəti dəfə qınaq və gülüş hədəfinə çevirməsi oldu. Lakin bütün bunlara rəğmən, Ermənistanın rəsmən Qarabağı Azərbaycanın tərkib hissəsi kimi tanıması sülh sazişinə nail olmaq üçün imkanların mövcud olduğunu deməyə əsas verir. Bu məsələnin həllində Rusiya amili də mühüm rol oynaya bilər. Təsadüfi deyil ki, cənab Prezident İlham Əliyev də öz çıxışında Azərbaycan ilə Ermənistan arasında münasibətlərin normallaşdırılması istiqamətində Rusiyanın səylərinin önəmli olduğunu qeyd etdi”.

İlham Əliyev Rusiyaya getdi

11:02 25.05.2023 | Baxış sayı: 34711

Prezident İlham Əliyev Rusiya Federasiyasının Prezidenti Vladimir Putinin dəvəti ilə mayın 25-də Moskvaya işgüzar səfərə gəlib.

Moskvanın Vnukovo-2 beynəlxalq hava limanında dövlət başçısını Rusiya xarici işlər nazirinin müavini Mixail Qaluzin və digər rəsmi şəxslər qarşılayıblar.

Kamaləddin Qafarov: “ Xalqlarımızı tarixi dostluq və qonşuluq münasibətləri birləşdirir”

13:39 13.04.2023 | Baxış sayı: 11742

“Gürcüstan uzun illərdən bəri Azərbaycanla səmimi dostluq və etibarlı müttəfiqlik əlaqələri olan ölkədir. Bu gün də Azərbaycan və Gürcüstan bir çox strateji sahələr üzrə sıx əməkdaşlıq edirlər. Hər iki ölkənin dövlət və hökumət başçıları səviyyəsində keçirilən görüşlərin müntəzəm xarakteri mövcud əlaqələrin genişlənməsinə və möhkəmlənməsinə xidmət edir. Aprelin 7-də Gürcüstanın Baş naziri İrakli Qaribaşvilinin ölkəmizə səfəri zamanı Qəbələ şəhərində mətbuata bəyanatlarla çıxış edən Azərbaycan Prezidenti İlham Əliyev və Gürcüstanın Baş naziri İrakli Qaribaşvili xalqlarımız arasında sıx dostluq və qardaşlıq münasibətlərinin önəmini qeyd etmiş və çox qədim tarixə malik olan bu münasibətlərin müasir dövrümüzdə strateji tərəfdaşlıq səviyyəsinə yüksəldiyini vurğulamışlar. Prezident İlham Əliyev öz çıxışında qeyd etmişdir ki, aparılan müzakirələrdə qarşıya qoyulan əsas məqsəd ikitərəfli əməkdaşlığı dərinləşdirmək və xalqlarımızın gələcəyi üçün lazım olan bütün addımları atmaqdır.”

Bu fikirləri mətbuata açıqlamasında Milli Məclisin deputatı Kamaləddin Qafarov səsləndirib.

Deputat Azərbaycan və Gürcüstanın qonşu dövlətlər olaraq birgə layihələrdə yer almaqla Avropanın enerji təhlükəsizliyinin təmin olunmasında önəmli rol oynamalarını ölkələrimiz arasında münasibətləri daha da möhkəmləndirən vacib amillərdən biri kimi qiymətləndirib: “Prezident İlham Əliyevin qeyd etdiyi kimi, Azərbaycan ilə Gürcüstan arasında olan dostluq və əməkdaşlıq əlaqələri bu gün Avropanın enerji təhlükəsizliyinə böyük töhfələr verir. Məlumdur ki, ölkələrimiz hazırda Avropanın enerji təhlükəsizliyi üçün önəmli rol oynayırlar və bu rol getdikcə artır. Azərbaycan təbii qazının Avropa istiqamətinə ixracı ildən-ilə artmaqdadır. Keçən il Avropa İttifaqı ilə imzalanmış Anlaşma Memorandumuna əsasən, Azərbaycan 2027-ci ilə qədər təkcə Avropa məkanına 20 milyard kubmetr qazın nəqlini təmin etməlidir. Məlumdur ki, bu gün beynəlxalq aləmdə formalaşan geosiyasi vəziyyətin fonunda enerji təhlükəsizliyi məsələləri təkcə Avropa İttifaqı üçün deyil, bütün ölkələr üçün ön plana çıxır. Bu baxımdan Azərbaycan şirkəti SOCAR-ın Gürcüstanda artıq uzun illərdir ki, uğurla fəaliyyət göstərməsi qonşu ölkə üçün xüsusi əhəmiyyət kəsb edir. Ölkələrimiz artıq indidən energetika sahəsində əməkdaşlığın yeni istiqamətləri üzrə fəal iş aparırlar. 2022-ci ilin dekabrında Buxarestdə Prezident İlham Əliyevin iştirakı ilə Azərbaycan, Gürcüstan, Rumıniya və Macarıstan arasında yaşıl enerjinin inkişafı və ötürülməsi sahəsində strateji tərəfdaşlıq haqqında saziş imzalanıb. Dördtərəfli hökumətlərarası saziş Rumıniya ilə Azərbaycan arasında bərpa olunan mənbələrdən elektrik enerjisinin nəqli üçün Gürcüstan və Qara dəniz vasitəsilə sualtı kabelin çəkilməsini nəzərdə tutur. İmzalanma mərasimində çıxış edən Avropa Komissiyasının sədri xanım Ursula Fon der Lyayen Azərbaycanı etibarlı tərəfdaş adlandıraraq deyib ki, Qara dənizin dibi ilə çəkiləcək elektrik kabeli Avropa üçün əhəmiyyətli layihədir və Avropanın enerji təhlükəsizliyində mühüm rol oynayacaq. Avropa Komissiyası Prezidentinin imzalanma mərasimində iştirakı Avropa İttifaqının bu layihəyə həqiqətən də çox böyük önəm verdiyini sübut edir.”

K.Qafarov Azərbaycan-Gürcüstan əlaqələrinin mühüm bir istiqamətinin də nəqliyyatla bağlı olduğunu qeyd edib: “Dövlətimizin başçısı öz çıxışında Orta Dəhliz layihəsinin həyata keçirilməsində Gürcüstan və Azərbaycanın uğurla fəaliyyət göstərdiklərini vurğulamaqla ölkələrimiz arasında ikitərəfli əlaqələrdə məhz nəqliyyat sahəsinin də önəmli yer tutduğunu diqqət mərkəzinə çəkdi. O, bildirdi ki, növbəti mərhələdə yükdaşımalarının həcminin artırılması istiqamətində əlavə addımlar atılacaqdır. Rusiya-Ukrayna müharibəsi və Qərbin Moskvaya qarşı sanksiyaları Rusiyanın tranzit ölkə kimi, xüsusən də Avropa İttifaqı ilə Çin arasında quru əsaslı ticarət əlaqələrində effektivliyini məhdudlaşdırıb. Bu kontekstdə Orta Dəhliz dəmir yolu ticarəti üçün potensial alternativ marşrut kimi Çin, Aİ və daha geniş regionda şirkətlər və hökumətlərin diqqətini çəkməyi bacarıb. Son iki ildə yeni yüklərin Orta Dəhliz üzrə nəql edilməsi üçün çox gözəl imkanlar yaranıb. Bu məsələ də Azərbaycan və Gürcüstan rəhbərlərinin görüşündə geniş müzakirə olunub və məsləhətləşmələr davam edəcək”.

Kamaləddin Qafarov: “Ulu Öndər ordumuzun formalaşmasına əvəzsiz töhfələr vermişdir”

12:15 02.04.2023 | Baxış sayı: 12257

“Müasir Azərbaycan özünün dövlət müstəqilliyinin bərpasına 1991-ci ildə nail olsa da, vahid komandanlığa əsaslanan nizami və mütəşəkkil, ən əsası, müstəqilliyimizə və dövlətçiliyimizə qarşı yarana biləcək hər hansı təhdidin qarşısını almağa qadir ordunun yaradılması Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra mümkün oldu. Dövlətin müstəqilliyinin qorunmasında ordunun müstəsna rolunu qeyd edən Ulu Öndər öz çıxışlarının birində demişdir: “Möhkəm, daimi sülh üçün müstəqil dövlətin güclü ordusu olmalıdır.” Məlumdur ki, keçən əsrin əvvəllərində, 1918-ci il mayın 28-də Azərbaycan öz müstəqilliyini elan edərək, Şərqdə ilk dəfə demokratik dövlət qurdu. Hökumətin qərarı ilə 1918-ci il iyunun 26-da ilk nizami hərbi hissə – Əlahiddə Azərbaycan Korpusu yaradıldı. Ulu öndər Azərbaycan Ordusunun varislik məqamını vurğulayaraq demişdir: “XX əsrin sonunda öz dövlət müstəqilliyini bərpa etmiş Azərbaycan Respublikasının Silahlı Qüvvələri məhz Azərbaycan Xalq Cümhuriyyəti Milli Ordusunun layiqli varisidir.” 1920-ci ildə Azərbaycanın Sovet Rusiyası tərəfindən işğalı ilə ölkəmizdə dövlət quruculuğu istiqamətində aparılan bütün işlər kimi, ordu quruculuğu prosesi də dayandı. Yalnız 1969-cu ildə, Ulu Öndər Heydər Əliyevin respublikada hakimiyyətə gəlişindən sonra Azərbaycanda hərbi kadrların hazırlanması prosesinə xüsusi diqqət yetirilməyə başlandı.”

Bu sözləri mətbuata açıqlamasında Milli Məclisin deputatı Kamaləddin Qafarov deyib.

Deputat bildirib: “Ölkəyə rəhbərlik etdiyi bütün dövrlərdə öz xalqına misilsiz xidmətlər göstərmiş Heydər Əliyev qarşıya çıxan bütün çətinlik və maneələrə rəğmən 1971-ci ildə Azərbaycanda Cəmşid Naxçıvanski adına Hərbi Məktəbin yaradılmasına nail olmaqla, bugünkü qüdrətli ordumuzun formalaşmasına əvəzsiz töhfə vermiş oldu. Bu məktəbin fəaliyyəti Azərbaycanda hərb sənətinə marağın güclənməsinə, azərbaycanlı zabit kadrların hazırlanmasına yol açdı. Azərbaycan dövlət müstəqilliyini bərpa edəndən sonra C.Naxçıvanski adına Hərbi Məktəb ordu quruculuğunun əsas bazalarından birinə çevrildi. Sonralar məhz Ulu Öndərin səyləri nəticəsində azərbaycanlı gənclərin Bakı Ali Birləşmiş Komandanlıq və Bakı Ali Hərbi Dənizçilik məktəblərinə qəbulu, eləcə də keçmiş SSRİ-nin digər hərbi məktəblərinə güzəştli şərtlərlə qəbulu mümkün oldu. 1993-cü ildə ümummilli lider Heydər Əliyevin yenidən hakimiyyətə qayıtması ilə bu sahədə də mühüm irəliləyişlər əldə edildi. 1994-cü ilin may ayının 12-də Ermənistan-Azərbaycan hərbi münaqişəsində atəşkəs əldə olunduqdan dərhal sonra Azərbaycanda Milli Ordusunun formalaşdırılmasına start verildi. Ordu quruculuğu işinə hər zaman böyük həssaslıq və xüsusi diqqətlə yanaşan Ulu Öndər 1998-ci il mayın 22-də Əlahiddə Azərbaycan Korpusunun yarandığı günün – 26 iyun tarixinin Azərbaycanda Silahlı Qüvvələr Günü elan olunması barədə Sərəncam imzaladı. 1999-cu il fevralın 20-də isə Ümummilli Lider Hərbi Akademiyanın yaradılması haqqında Fərman imzalamaqla, hərb sahəsində milli kadr ehtiyatının formalaşması prosesini keyfiyyət etibarı ilə yeni inkişaf mərhələsinə çıxardı. Azərbaycan Ali Hərbi Məktəbinin 2001-ci ildə baş tutmuş birinci buraxılışına həsr olunan mərasimdə etdiyi nitqində ümummilli lider Heydər Əliyev demişdir: “Azərbaycan əsgəri, Azərbaycan zabiti gərək yüksək mənəviyyata malik olsun. Azərbaycan xalqının yüksək mənəvi dəyərləri ilə yaşasın. Vətənpərvərliyi, Vətəni sevməyi, Vətən yolunda şəhid olmağı daim gözünün önündə saxlasın.” Ulu öndərin rəhbərliyi ilə 1993-cü ildən ölkəmizdə həyata keçirilən dövlət quruculuğunun ən parlaq nəticələrindən biri bu gün getdikcə artan və qüdrətlənən, gücü ilə qürurlandığımız Azərbaycan Ordusudur.”

K.Qafarov açıqlamasının sonunda deyib: “Prezident İlham Əliyev Silahlı Qüvvələrin modernləşdirilməsini müasir dövlət siyasətinin strateji isiqamətlərindən biri kimi müəyyən edib. Nəticə etibarı ilə bu gün Qafqazda ən müasir ordu olan Azərbaycan Silahlı Qüvvələri Hərbi Hava və Hava Hücumundan Müdafiə, Hərbi Dəniz və Quru qoşunlarından ibarət qüdrətli bir ordu kimi formalaşıb. 2020-ci il sentyabr ayının 27-də şanlı Azərbaycan Ordusu Müzəffər Ali Baş Komandan İlham Əliyevin əmri ilə düşmən təxribatına son qoymaq və ölkənin ərazi bütövlüyünü bərpa etmək məqsədilə hərbi əməliyyatlara başladı. Cəmi 44 gün davam edən Vətən müharibəsi Azərbaycanın şanlı Qələbəsilə başa çatdı. Diqqətəlayiq haldır ki, II Qarabağ müharibəsi zamanı istifadə olunan döyüş taktikası dünya hərb tarixində yenilik hesab olunur və müvafiq ali hərbi məktəblərin dərsliklərinə salınaraq öyrənilir. Bu gün Azərbaycan Ordusunun dünyanın ən güclü 50 ordusu sırasında yer alması da məhz dövlət başçısı cənab İlham Əliyevin həyata keçirdiyi möhtəşəm siyasətin təzahürüdür”.

Kamaləddin Qafarov: “31 Mart soyqırımı insanlıq əleyhinə törədilmiş ən ağır cinayətlərdəndir”

11:07 30.03.2023 | Baxış sayı: 11948

“Təxminən iki yüz il bundan əvvəl Rusiya imperiyasının maraqlarına uyğun olaraq Cənubi Qafqazda, tarixi Azərbaycan torpaqlarında məskunlaşdırılan ermənilər ötən iki əsr ərzində yerli sakinlərə - azərbaycanlılara qarşı olmazın cinayətlər törətmiş, kütləvi deportasiyalar, qətliamlar həyata keçirmişlər. 1918-ci ilin 30 mart - 3 aprel tarixlərində ermənilər tərəfindən xalqımıza qarşı törədilmiş amansız soyqırımı Azərbaycan tarixinin acı həqiqətlərindən biridir. Azərbaycan Xalq Cümhuriyyəti yarandıqdan sonra milli hökumət tərəfindən tarixdə ilk dəfə siyasi qiymət vermək cəhdi edilmişdir. Xalqımız öz müstəqilliyini bərpa etdikdən sonra, Ümummilli lider Heydər Əliyevin təşəbbüsü ilə, tariximizə “31 Mart soyqırımı” kimi daxil olmuş bu faciənin araşdırılması və həqiqətlərin qlobal miqyasda dünyaya yayılması işinə başlanılmışdır. 1998-ci il martın 26-da Azərbaycan Respublikasının Prezidenti Heydər Əliyevin imzaladığı “Azərbaycanlıların soyqırımı haqqında” Fərmanda azərbaycanlılara qarşı 1918-ci ildə törədilmiş dəhşətli soyqırımı hadisələrinə müvafiq siyasi qiymət verildi və 31 mart “Azərbaycanlıların Soyqırımı Günü” elan olundu. Məhz bundan sonra aparılmış araşdırmalar sayəsində bir çox yeni faktlar və sənədlər toplandı, Quba şəhərində kütləvi məzarlıq aşkarlandı. Üzə çıxmış tarixi faktlar 1918-ci ilin mart-aprel aylarında və sonrakı dövrlərdə erməni millətçilərinin həyata keçirdikləri qanlı aksiyaların coğrafiyasının daha geniş və faciə qurbanlarının sayının qat-qat çox olduğunu isbat etmiş oldu.”

Bu sözləri mətbuata açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Deputat bildirib: “1918-ci il hadisələri Azərbaycan xalqının başına gətirilən dəhşətli müsibətlərdən biridir. Tarixi dəlil və faktlar inkarolunmaz şəkildə göstərir ki, 1917-ci il oktyabr çevrilişindən sonra ermənilər öz iddialarını bolşevik bayrağı altında reallaşdırmağa başlayıblar. 1918-ci ilin mart ayında Stepan Şaumyan Qafqazın fövqəladə komissarı təyin edildi və Bakıya göndərildi. Həmin vaxtdan “Əks-inqilabi ünsürlərlə mübarizə” şüarı altında maskalanmış Bakı Kommunası daşnak-bolşevik Şaumyanın rəhbərliyi ilə Bakı şəhərini azərbaycanlılardan təmizləmək kimi mənfur bir planı həyata keçirməyə başladı. Həmin günlərdə, 1918-ci ilin 30 mart - 3 aprel tarixlərində Bakı şəhərində, habelə Bakı quberniyasına daxil olan Şamaxı, Quba və digər şəhər və qəzalarda on minlərlə dinc sakin məhz etnik və dini mənsubiyyətinə görə qətlə yetirilib, yaşayış məntəqələri dağıdılıb, mədəniyyət abidələri, məscid və qəbiristanlıqlar yerlə-yeksan edilib. O dövrdə Bakı şəhərində, eləcə də Qarabağ, Naxçıvan, Şamaxı, Quba, Xaçmaz, Lənkəran, Salyan, Zəngəzur və digər ərazilərdə Bakı Soveti qoşunları və daşnak erməni silahlı dəstələri 30 mindən çox azərbaycanlını qətlə yetirmiş, 10 minlərlə insanı öz torpaqlarından qovmuşdular. Soyqırımının gedişində on minlərlə azərbaycanlı ilə yanaşı, minlərlə ləzgi, yəhudi, rus, avar və talış millətinə mənsub insanlar da erməni daşnakları tərəfindən qılıncdan, süngüdən keçirilmiş, diri-diri yandırılmışlar. Dinc azərbaycanlıların qırğınında Bakı Sovetinin 6 min silahlı əsgəri, eyni zamanda “Daşnaksutyun” partiyasının 4 minlik silahlı dəstəsi iştirak etmişdir. Faciənin miqyasını təsəvvür etmək üçün Bakı qırğınları ilə yanaşı Şamaxı və Quba qətliamlarının da ciddi şəkildə araşdırılması lazımdır. Ötən əsrin 90-cı illərindən etibarən yerli tədqiqatçıların apardıqları araşdırmalar nəticəsində isə müəyyən edilib ki, erməni cinayətkarları Şamaxı şəhərində təqribən 14-16 min, şəhərin 40 kənd və obasında isə daha 6-8 min nəfəri qətlə yetiriblər. Şamaxı qəzasından didərgin düşənlərin sayı isə 18 min nəfərdən çox olub. 2007-ci ilin aprelində Quba stadionunun təmiri ilə əlaqədar aparılan qazıntı işləri zamanı kütləvi məzarlıqda 500-dək insan kəlləsi tapılıb. Onlardan 50-dən çoxu uşaqlara, 100-dən çoxu qadınlara aid idi. Quba qırğınları zamanı şəhərdə öldürülənlərin təxmini sayının 2900-dək, Quba qəzası üzrə ümumilikdə isə 4000 nəfərdən artıq olduğu qeyd olunur. Bu soyqırımı nəticəsində Quba qəzasının 122 kəndi dağıdılmış, 2750-dən çox ev tamamilə yandırılmışdır.”

Kamaləddin Qafarov sonda deyib: “Azərbaycan xalqı tarix boyu başına gətirilən bütün faciələrə, üzləşdiyi çətinliklərə və haqsızlıqlara baxmayaraq, özünün müstəqillik əzmini hər zaman qoruyub saxladı, möhkəm iradə, yenilməz birlik və həmrəylik nümayiş etdirdi. Xüsusilə 2003-2020-ci illər ərzində Ölkə Prezidenti cənab İlham Əliyevin rəhbərliyi ilə Ulu Öndər Heydər Əliyevin ölməz ideyalarının işığında öz gələcəyini quran Azərbaycan dövlətimizin gücünün, qüdrətinin daha da artmasına nail oldu. Nəhayət, 2020-ci ilin sentyabr-noyabr ayları ərzində aparılan və cəmi 44 gün davam edən Vətən müharibəsinin nəticəsi olaraq, Azərbaycan 30 illik işğala son qoydu və öz ərazi bütövlüyünü bərpa etdi. Bu tarixi Qələbə ilə Müzəffər Ali Baş Komandan İlham Əliyevin rəhbərliyi ilə Şanlı Ordumuz artıq uzun illər boyunca bütün Cənubi Qafqaz xalqlarını təhdid edən erməni faşizminin belini qırdı. Xalqımızın əldə etdiyi bu tarixi Zəfər bütün şəhidlərimizin ruhlarını şad etdi. Dövlət başçımızın dediyi kimi, biz şəhidlərimizin qisasını düşməndən döyüş meydanında aldıq.”

Kamaləddin Qafarov: “Siyasi dialoq günün labüd reallığıdır”

12:44 29.03.2023 | Baxış sayı: 12360

“Ölkə Prezidenti İlham Əliyevin sədrliyi ilə 2020-ci il aprelin 14-də videokonfrans formatında keçirilmiş müşavirənin gedişində çıxış edən dövlət başçısı demişdir: “Hesab edirəm ki, hakimiyyət tərəfindən atılan addımlar, siyasi dialoqun başlanması və müxalifət partiyaları tərəfindən buna müsbət reaksiya verilməsi müstəqillik dövründə yeni vəziyyətin yaradılmasına gətirib çıxarır.” Həmin tarixi çıxışdan sonra keçən dövr ərzində ölkəmizdə gedən proseslərin və əldə olunan nəticələrin təhlili belə deməyə əsas verir ki, cənab Prezident İlham Əliyev 2018-ci il prezident seçkilərindən sonra həyata keçirməyə başladığı əsaslı islahatlar sayəsində ölkənin siyasi sisteminin yeni, müasir çağırış və tələblərə cavab verə bilən unikal modelini qurmağa müvəffəq oldu.”

Bu sözləri Milli Məclisin deputatı Kamaləddin Qafarov mətbuata verdiyi açıqlamasında deyib.

K.Qafarovun fikrincə, birmənalı olaraq qeyd etmək lazımdır ki, həmin ildən ölkəmizdə faktiki olarq “siyasi dialoq” məfhumunun aktuallaşdırılmasına start verildi . Zaman keçdikcə siyasi münasibətlərdə köhnə stereotiplər dəyişdirildi. Qərəzli mövqelərdən çıxış edənlər isə səhvlərini etiraf etmək və siyasi fəaliyyətlərini yeni səhifədən başlamaq şansı əldə etdilər. İslahatların gedişində dövlətimizin başçısı Azərbaycan siyasi sisteminə rasional siyasi davranış modeli, məntiqi mühakimələrə və analitik təhlilə əsaslanan, mütərəqqi, pozitiv, milli məqsədlərə xidmət edən və siyasi realizmə söykənən siyasi fəaliyyət nümunəsi gətirdi. Prezident İlham Əliyevin yürütdüyü siyasət müasir Azərbaycanın güclənməsinə, milli-mənəvi dəyərlərimizin ən yüksək səviyyədə qorunmasına xidmət edərək, ölkəmizin dünyada tolerantlıq məkanı, mədəniyyətlərarası və sivilizasiyalararası dialoq məkanı kimi tanınmasını təmin etdi.”

Deputat daha sonra deyib: “ Ölkəmizdə 2022-ci ilin dekabrında “Siyasi partiyalar haqqında” yeni Qanunun qəbulu bir daha təsdiqlədi ki, Azərbaycanda dövlət siyasətinin prioritet istiqamətlərindən biri məhz demokratik təsisatların inkişafı və təkmilləşdirilməsidir. Prezident İlham Əliyevin təşəbbüsü ilə ölkədə siyasi dialoq mühitinin inkişaf etdirilməsi siyasi proseslərdə iştirak edən bütün tərəfləri açıq və bərabərhüquqlu münasibətlərə dəvət deməkdir. Təsadüfi deyil ki, Qanun layihəsinin hazırlanmasında Avropanın qabaqcıl ölkələrinin təcrübəsi, milli-mənəvi dəyərlərin qorunub saxlanması zərurəti, ölkədə mövcud olan siyasi sistemin özəllikləri nəzərə alınıb, Avropa Şurasının Venesiya Komissiyasının siyasi partiyaların fəaliyyətinin tənzimlənməsi ilə bağlı tövsiyələri nəzərdən keçirilib. Bu sənədlər arasında 24 xarici ölkənin təcrübəsi, ölkəmizdə fəaliyyət göstərən 47 siyasi partiyadan Milli Məclisə yazılı formada təqdim edilmiş 250-dən çox təklif, eləcə də parlamentin komitə və plenar iclaslarında deputatlar tərəfindən irəli sürülmüş 100-dən çox təklif yer almışdır. Nəticədə yeni reallıqda ölkəmizin siyasi sistemində milli maraqlarımız baxımından səmərəli nəticələrə gətirib çıxara biləcək bir Qanun qəbul edilmişdir. Yeni qəbul edilən Qanun siyasi partiyaların cəmiyyətdə nüfuzunun artmasına, siyasi proseslərə təsir imkanlarının genişlənməsinə də öz müsbət təsirini göstərəcək.

K.Qafarov qeyd edib ki, bu gün ölkəmizdə təşviq olunan siyasi dialoq mühiti siyasi partiyaları cəmiyyətə daha yaxın edir: “ Siyasi proseslərə qiymət verərkən, obyektivlik naminə nəzərə alınmalıdır ki, ölkəmizdə dialoq təşəbbüsü ilə çıxış edən tərəf məhz iqtidardır. Dialoq prosesinin keyfiyyət etibarı ilə yeni müstəvidə inkişafını müşahidə edərək deyə bilərik ki, dövlət başçımızın təşəbbüsü ilə ölkədə təşviq olunan siyasi dialoq bu gün artıq daha təkmil və konstruktiv modelə transformasiya edib. Eyni zamanda da bu transformasiya ölkəmizdə təşviq olunan dialoq siyasətinin məzmununu siyasi dəyər formatından, demokratik münasibətləri şərtləndirən işlək mexanizm formatına qədər dəyişdirə bilib”.

Kamaləddin Qafarov: “Ermənistan yenə odla oynayır”

10:31 24.03.2023 | Baxış sayı: 11433

“Martın 18-də Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva Tərtər rayonunun 2020-ci il oktyabrın 3-də işğaldan azad olunmuş Talış kəndində görülən yenidənqurma işləri ilə tanış olublar. Dövlətimizin başçısı 2021-ci il oktyabrın 4-də Talış kəndində Azərbaycan Respublikasının Dövlət Bayrağını ucaldıb. Üçüncü ildir ki, Azərbaycan xalqı Novruz bayramını doğma Qarabağda böyük ruh yüksəkliyi ilə qeyd edir”.

Bu sözləri mətbuata açıqlamasında Milli Məclisin deputatı Kamaləddin Qafarov deyib.

Millət vəkili bildirib ki, Talış kəndində olarkən Prezident İlham Əliyev, birinci xanım Mehriban Əliyeva və qızları Arzu Əliyeva Novruz tonqalını alovlandırıblar. “Dövlətimizin başçısı Azərbaycan xalqını bayram münasibətilə təbrik edib. Hər zaman olduğu kimi, dövlət başçısının çıxışında önəmli açıqlamalar verilib, mühüm mesajlar yer alıb. Ölkə Prezidenti Vətən torpaqlarının azad olunması naminə öz canlarını fəda etmiş şəhidlərin əziz xatirəsini yad etməklə şəhid və qazilərimizə, müharibə iştirakçılarına Azərbaycan xalqının sonsuz ehtiramını bir daha nümayiş etdirdi. O, 30 illik işğal ərzində ermənilərin xalqımıza qarşı apardıqları etnik təmizləmə siyasətindən, törətdikləri soyqırımı və kütləvi qırğınlardan, hərbi cinayətlərdən bəhs edərək, beynəlxalq təşkilatların həmin illərdə səsimizi eşitmədiklərini, münaqişəni həll etmək əvəzinə, onu dondurmağa çalışdıqlarını xatırlatmışdır. Əlbəttə ki, bu gün vəziyyət artıq kökündən dəyişib. 2020-ci ilin sentyabr-noyabr ayları ərzində rəşadətli Azərbaycan Ordusu Müzəffər Ali Baş Komandan İlham Əliyevin rəhbərliyi ilə cəmi 44 günə torpaqlarımızı işğaldan azad etdi və indi həm Ermənistan, həm də onun havadarları Azərbaycanın müəllifi olduğu yeni reallıqları qəbul etməyə məcburdurlar.”

Deputat qeyd edib ki, Ermənistanda bu gün yenidən baş qaldıran revanşist qüvvələr erməni xalqını böyük fəlakətə sürükləyə bilərlər: “ Prezident İlham Əliyevin dediyi kimi, Ermənistanda gedən proseslər, ölkəmizə qarşı yenidən ərazi iddialarının irəli sürülməsi belə deməyə əsas verir ki, İkinci Qarabağ müharibəsinin ibrət dərsini Ermənistan hələ də tam mənimsəməyib. Ermənistana dəstək verən bəzi dövlətlərin boş vədləri bu ölkəni yenidən revanşizmə təhrik edir. Lakin belə mövqe, hadisələrin bu istiqamətdə inkişafı Ermənistan üçün ciddi fəsadlara gətirib çıxara və erməni xalqını daha böyük fəlakətlərlə üz-üzə qoya bilər. Ermənistan ölkəmizə qarşı yenidən ərazi iddiaları irəli sürməkdənsə, indi ona məxsus olan 29 min kvadratkilometr ərazidə rahat yaşaması üçün təklif olunan şərtləri qəbul etməlidir. Əks halda, möhtərəm dövlət başçımızın dediyi kimi, əgər Ermənistan bizim ərazi bütövlüyümüzü tanımasa, biz də onların ərazi bütövlüyünü tanımayacağıq. Bunun nəticəsi nə olacaq, bunu Ermənistan və onun arxasında duran ölkələr yaxşı bilməlidirlər. Azərbaycanın hərbi və iqtisadi qüdrəti, dünyada sahib olduğu nüfuzlu mövqeyi və ən əsası, güclü iradəyə malik olan Prezidenti var.”

K.Qafarov bəzi ölkələrin Azərbaycana qarşı qərəzli addımlar atmaqla Cənubi Qafqazda destabillik yaratmağa çalışdıqlarını vurğulayaraq deyib: “ Ermənistana havadarlıq etməyə çalışan ölkələrdə Azərbaycanın daxili işləri ilə bağlı hansısa konfranslar, simpoziumlar təşkil edilir, bəzi hallarda isə hətta Azərbaycanın ərazisində mövcud olmayan dırnaqarası “Dağlıq Qarabağ”ın müstəqilliyini belə tanıyırlar. Bu, qətiyyən yolverilməz haldır. Azərbaycan torpaqlarının 30 il ərzində işğal altında olmasını heç kim yaddan çıxarmamalıdır və gələcək sülh müqaviləsi üçün bu önəmli amillər hər kəsi ciddi düşündürməlidir. Ağdamı “Qafqazın Xirosimasına” döndərən ermənilərin vəhşiliklərini unutmaq olmaz. Cənab Prezident İlham Əliyevin dediyi kimi, işğal reallıqları, müharibə reallıqları və əlbəttə ki, postmüharibə reallıqları sülh danışıqlarında öz əksini tapmalıdır və tapacaqdır”.

2 -dən səhifə 298

Xəbər lenti