Bakı metrosunda sərnişinlər boşaldılıb.
Bizimaz.az: Oxu.Az xəbər verir ki, Bakı metrosunda qatarlardan birində texniki problem yaranıb.
Bu səbəbdən sərnişinlər boşaldılıb. Stansiyalarda sərnişin sıxlığı müşahidə edilib.
“Bakı Metropoliteni” QSC-nin mətbuat xidmətinin rəhbəri Bəxtiar Məmmədov faktı təsdiq edib. O bildirib ki, son günlər metrodan istifadə edən sərnişinlərin sayında ciddi artım müşahidə edilir:
“Bu gün “Sahil” stansiyasından “28 May” stansiyasına hərəkət edən qatarda texniki problem yaranıb. Qatar “28 May” stansiyasında dayanıb. Sərnişinlərin təhlükəsizliyini nəzərə alaraq qatar boşaldılıb və texniki baxış üçün depoya göndərilib.
Onun əvəzinə xəttə yeni qatar buraxılıb. Hazırda qatarlar arasında interval qrafikə uyğun şəkildə davam etdirilir. Ümumiyyətlə, son dönəmlər metrodan istifadə edən sərnişinlərin sayında ciddi artım var. Bu gün isə stansiyalarda sərnişin sıxlığı müşahidə edilir”.
