Pekində keçirilən “Bir kəmər, bir yol” ikinci beynəlxalq konfransı çərçivəsində Azərbaycanla Çin arasında 821 milyon dollar dəyərində 10 investisiya sənədi imzalanıb ki, bu sənəddə Çin şirkətinin Sumqayıt Kimya Sənaye Parkında avtomobil şini istehsalı zavodunun yaradılmasında iştirakını nəzərdə tutur.
Moderator.az-a açıqlamasında Sumqayıtda belə bir zavodun inşasının təqdirəlayiq olduğunu vurğulayan İqtisadi və Sosial İnkişaf Mərkəzinin rəhbəri, iqtisadçı alim Vüqar Bayramov bunun həmölkəmizin iqtisadi gücünün artırılması, həm də qeyri-neft sektorunun inkişafı baxımından mühüm əhəmiyyətə malik olduğunu qeyd edib:
“Sumqayıtda şin zavodunun inşası Azərbaycan üçün bir neçə aspektdən əhəmiyyətlidir. Şin zavodunun inşası hər şeydən əvvəl daxili bazarda olan tələbin ödənilməsi baxımından vacibdir. Bu, daxili bazarda tələbatın ödənilməsinə əhəmiyyətli dərəcədə təsir göstərəcək. Şin zavodunun inşası idaxaldan asılılığın aradan qaldırılması baxımından da vacib bir addımdır.
Bu məhsulların idxal hesabına təmin edilməsi valyutanın ölkədən çıxması deməkdir. İdxaldan asılılığın ortadan qaldırılması valyutanın ölkəmizdə qalmasına imkan yaradacaq.
Digər tərəfdən bu, ölkəmizin ixrac imkanlarını genişləndirəcək. Şin zavodunun inşası, onun ixrac imkanlarının genişlənməsi Azərbaycana həm Yaxın Şərq ölkələri, həm də qonşu ölkələrə bu məhsulları ixrac etmək imkanı verəcək. Bu isə ölkəmizə valyuta axınına imkan yaradacaq.
Bu, həm də qeyri-neft sektorunun inkişafı baxımından da mühüm addımdır. Məlum yenilik qeyri-neft sektorunun gəlirlərinin artmasına təsir göstərəcək.
Şin zavodunun inşası iş yerlərinin yaranması baxımından da faydalıdır. Çünki hər bir qurulan zavod yeni iş yeri deməkdir. Bu tip zavodların inşası istiqamətində davamlı addımların atılmasına ehtiyac var”.
Məlumat üçün qeyd edək ki, qeyri-neft sktorunun inkişaf etdirilməsi ölkə başçısının mühüm tələb və tövsiyyələrindən biridir. Hazırda özünün 70 illiyinə hazırlaşan Sumqayıtda son üç ildə qeyri-neft sektorunun inkişafı istiqamətində atılan addımlar ölkə başçısının məlum tövsiyyələrinə ciddi diqqət yetirildiyini, yerli icra hakimiyyətinin bu sahədə mühüm uğurlara imza atdığını göstərir.
