Akademik Vaqif Abbasovun təşəbbüsü və təşkilatçılığı ilə Tərtər rayonunun 4 kəndinə xidmət edən müasir kitabxana açılıb
24 dekabr 2018-ci il tarixdə Tərtər rayonunun 4 kəndinə xidmət edəcək müasir tipli kitabxananın Tərtər rayon ictimaiyyətinin və qonaqların iştirakı ilə təntənəli açılışı oldu.
AMEA-nın prezidenti akademik Akif Əlizadə hər zaman təhsil və elmin inteqrasiyasına böyük önəm verir və AMEA-nın elmi müəssisələrini təhsil qurumları ilə sıx əməkdaşlığa çağırır. Belə əməkdaşlığın bir istiqaməti də rayonlarda gənclər arasında mütaliəyə marağın artırılması, kitab oxumağa təbliğ və s. durur.
Akademik Vaqif Abbasov cəbhə bölgəsində yerləşən, 48 km təmas xəttinə malik Tərtər rayonunda bir neçə kənd üçün yeni kitabxananın tikilməsi və işinin təşkili təşəbbüsünü irəli sürüb. Tərtər rayon icra hakimiyyəti bu təşəbbüsü bəyənib, hazırlanmış layihənin icrasına razılıq verib, yerli idarəetmə orqanı kitabxana üçün yer ayırıb.
Akademik Vaqif Abbasov iş adamlarına, keçmiş tələbələrinə və AMEA-nın müəssisələrinin rəhbərlərinə müraciət edərək bu işdə dəstək olmalarını xahiş edib. Əslən Tərtər rayonundan olan iş adamı Hacı Seymur binanın tikintisi üçün lazım olan kəsmə daşları, “Norm” sement zavodu 10 ton sementi, “Biləv inşaat” MMC binanın daxili tavanının materiallarını, “Prometal” MMC binanın dam örtüyünü verib, 54 nömrəli yol istismarı idarəsi MMC 500 m2 asfalt örtüyünün salınmasına dəstək olub. Cəmilli kənd tam orta məktəbin məzunu, Azərbaycan Respublikasının əməkdar mühəndisi, AMEA-nın Təcrübə-Sənaye Zavodunun direktoru Vasif Abbasov daxili divarların sıvanması və boyanması işlərinə çəkilən məsrəfləri ödəyib. Akademik Vaqif Abbasov tikintiyə, aksesuarlara, döşəmə materiallarına xərcləri öz vəsaiti hesabına ödəyib. AMEA-nın Neft-Kimya Prosesləri İnstitutunun kollektivi kitabxananın rəflərini, masalarını, kreslonu, oturacaqları hədiyyə edib.
AMEA-nın aşağıdakı müəssisələri kitabxana üçün nadir kitab nüxsələri (3000-dən çox) hədiyyə verib:
1. Neft-Kimya Prosesləri İnstitutu
2. Azərbaycan Milli Ensiklopediyası “Elmi Mərkəzi”
3. İnformasiya Texnalogiyaları İnstitutu
4. Riyaziyyat və Mexanika İnstitutu
5. Nəsimi adına Dilçilik İnstitutu
6. Folklor İnstitutu
7. Hüseyn Cavid Ev Muzeyi
8. Fəlsəfə İnstitutu
9. A. Bakıxanov adına Tarix İnstitutu
10. Akademik H. Əliyev adına Coğrafiya İnstitutu
11. Arxeologiya və Etnoqrafiya İnstitutu
12. Nizami adına Ədəbiyyat İnstitutu
Qeyd edək ki, Dövlət İmtahan Mərkəzi kitabxanaya müxtəlif fənlər üzrə abituriyentlər üçün 400-ə qədər vasitələr və test topluları hədiyyə etmişdir.
Azərkitab kitab təbliğat mərkəzi də kitabxanaya təmənnasız olaraq kitablar hədiyyə edib.
Kitabxananın ətrafını yaşılaşdırmaq üçün Astaradan 350 ağac, Tərtər rayon icra hakimiyyətindən 1200-dən çox həmişəyaşıl ağac təmənnasız verilib.
Bu xeyirxah işin həyata keçirilməsinə razılıq və dəstək vermiş hər bir kəsə böyük minnətdarlığımızı bildiririk.
