Milli Məclisin iclasında deputat Aydın Mirzəzadə şəhid ailələri ilə bağlı bir neçə məsələ qaldırıb. 

Bizimaz.az bildirir ki, Oxu.Az-ın məlumatına əsasən, A.Mirzəzadə qeyd edib ki, şəhid olanlar sırasında ali məktəblərdə təhsil alanlar da olub.

“Amma onlar şəhid olduqdan sonra diplomları ailələrinə verilməyib. Mövcud qanunvericiliyə əsasən, yalnız imtahanlardan keçənlər ali təhsil haqqında diplom alır. Təklif edirəm ki, qanunvericiliyə yenidən baxaq. Həmin şəhidlər ən böyük imtahanı səngərdə veriblər, şəhidlik zirvəsinə ucalıblar”, - deyə deputat əlavə edib.

A.Mirzəzadə bəzi şəhid ailələrinin mənzil növbəsinə durmasına yaranan əngəldən də söz açıb. 

“Qanunda qeyd edilib ki, mənzildə adambaşına 6 kvadratmetr düşəndə, belə ailələr mənzil növbəsinə dayana bilərlər. Bəzi şəhid ailələrində bu rəqəm 7-8 kvadratmetrdir. Bir-iki kvadratmetrə görə bunu etmək düzgün deyil. Heç olmasa, bu rəqəm adambaşına 10 kvadrat metrə çatdırılmalıdır”.