“Bildiyiniz kimi kreditlərlə bağlı iki istiqamətdə müzakirələr gedir. Onlardan biri biznes kreditlərinə güzəştlərin tətbiq edilməsi ilə bağlıdır. Bu məsələ iqtisadi dəstək paketində öz həlini tapıbdır. Burada söhbət sahibkarların götürdüyü kreditlərə faiz subsidiyalarının verilməsindən gedir”.
Bizimaz.az bildirir ki, bu sözləri Moderator.az-a Milli Məclisin İqtisadi siyasət, sənaeyi və sahibkarlıq komitəsinin üzvü Vüqar Bayramlı deyib.
Pandemiyanın yaratdığı şərtlərə görə istehlak kreditləri ilə bağlı tətbiq edilməsi gözlənilən qərarın yubanmasının səbəblərinə aydınlıq gətirən millət vəkili bildirib ki, İqtisadiyyat Nazirliyi tərəfindən hazırlanan təkliflər planında biznes kreditlərində 10 faizin dövlət tərəfindən subsidiyalaşdırılması nəzərdə tutulur:
“Kredit 12 faizlikdirsə, onun 2 faizini sahibkar özü, 10 faizini isə dövlət kompensasiya edəcək.
Eləcə də planda güzəştli kreditlərlə bağlı dövlət tərəfində 60 faizlik dəstək təklifi var. Söhbət yarım mlyard manatlıq dəstək paketindən gedir”.
Vətəndaşları daha çox narahat edən istehlak kreditlərinə tətbiq ediləcək güzəştlərlə bağlı Vüqar Bayramlı əlavə edib ki, bu məsələnin parlamentdə müzakirəsi gedib və vətəndaşlara 3 aylıq güzəştin tətbiq edilməsi təkli edilib:
“Söhbət 3 ay müddətində yubanmalara görə cərimələrin hesablanmamasından gedir. Bununla bağlı Mərkəzi Bankın sədri də ötən həftə MM – də məlumat verdi. Dünən isə İşçi Qrupu tərəfindən əsas istiqamətlər elan edildi. Güman edirəm ki, yaxın günlərdə bununla bağlı konkret qərar açıqlanacaqdır.
Onu da əlavə edim ki, bu məsələ Mərkəzi Bank tərəfindən qararlaşdırılacaq və yaxın günlərdə yəqin ki, elan ediləcəkdir”.
