Prezident İlham Əliyev ötən gün keçirilən Nazirlər Kabinetinin iclasında bir çox məsələlərə toxundu. O, həm xalqa, həm də icra hakimiyyəti orqanlarına müəyyən mesajlar verdi.
Bizimaz.az: Bu sözləri açıqlamasında millət vəkili Vahid Əhmədov deyib. O bildirib ki, Prezidentin bu çıxışından sonra ciddi islahatlar həyata keçiriləcək:
“Ötən ilin 11 aprelində keçirilən prezident seçkilərindən sonra çox dərin, köklü iqtisadi, siyasi və digər islahatlara start verilib. Bu sahədə bir çox işlər görülüb. Hazırda da ciddi kadr islahatları həyata keçirilir. Bir sıra nazirlər vəzifədən azad edilib, onların yerinə yeni gənc kadrlar gətirilib. Bu ilin əvvəlindən başlayaraq iqtisadi sahədə bir sıra fərmanlar, sərəncamlar verilib. Sosial layihələr həyata keçirilib və məhkəmə-hüquq sistemiylə əlaqədar çox ciddi islahatlar aparmaq üçün fərman imzalanıb. Bu istiqamətdə həyata keçirilən bir çox işləri sadalamaq olar. Hesab edirəm ki, strukturlarda da islahatların aparılmasına çox böyük ehtiyac var. Çünki Azərbaycanın istər mərkəzi icra, istərsə də yerli icra hakimiyyəti orqanlarında bir-birini təkrar edən qurumlar var. Bəzi hökumət qurumları var ki, orada mütləq struktur dəyişikliyi aparılmalıdır və ya ləğv edilməlidir. Müəyyən nazirliklər və komitələr birləşdirilməli və ya ləğv edilməlidir. Yeni struktur formalaşdırılmalıdır ki, islahatlar həyata keçirilən zaman daha çevik rol oynaya bilsinlər. Bununla yanaşı ştat cədvəllərinə baxmaq lazımdır. Bu cədvəllərdə çox artımlar var. Biz dövlət büdcəsini müzakirə edəndə bunun şahidi oluruq. Bütün bu məsələlər onu göstərir ki, struktur islahatları Azərbaycanda gedir və davam edəcək. Bu həm mərkəzi, həm də yerli icra hakimiyyəti orqanlarına şamildir”.
Millət vəkili onu da bildirib ki, Prezidentin yerli və mərkəzi icra hakimiyyəti orqanlarına verdiyi ən ciddi mesajlardan biri də investorlarla bağlıdır:
“Həm yerli, həm də xarici investorlar üçün mərkəzi və yerli icra hakimiyyəti orqanlarında çox ciddi problemlər yaradılır. Azərbaycan hər bir investorun axtardığı stabil və sakit dövlətdir. Buraya investisiya qoymaq istəyənlər çox olmalıdır. Lakin müəyyən maneələr var. Bunların aradan qaldırılması üçün cənab Prezident çox ciddi tapşırıq verdi”.
Qeyd edək ki, ötən gün Prezident İlham ƏIiyev Nazirlər Kabinetinin iclasında idarəetmə sahəsində islahatların aparılmasına böyük ehtiyac olduğunu bildirib.
