Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən “Gənclərin Azərbaycanın işğaldan azad olunmuş ərazilərinin ekoloji qiymətləndirilməsində iştirakı” layihəsi uğurla davam etdirilir.
13 dekabr tarixində gənc ekoloqlar Şuşa şəhərinə səfər edib, ərazinin radiasiya fonu və hava keyfiyyəti üzrə ölçmə işlərinin aparılması, eləcə də su və torpaq nümunələrinin götürülməsində iştirak ediblər. Bununla yanaşı, səfər zamanı gənclərin iştirakı ilə “Qarabağı qoru” şüarı altında kütləvi ağacəkmə aksiyası keçirilib.
Məlum olduğu kimi, Dağlıq Qarabağ və onun ətrafındakı rayonların Ermənistan tərəfindən 30-illik işğalı nəticəsində Azərbaycanın təbiətinə ciddi ziyan vurulub. Ərazilərin yandırılması, su resurslarının çirkləndirilməsi, meşələrin, təbiət abidələrinin və ümumiyyətlə yeraltı və yerüstü təbii sərvətlərin talan edilməsi nəticəsində regionun ekoloji tarazlığı pozulub. Hazırda işğaldan azad olunmuş ərazilərin, o cümlədən təbii sərvətlərimizin vəziyyətinin qiymətləndirilməsi və bərpa edilməsi istiqamətində dövlət səviyyəsində mühüm addımlar atılmaqdadır.
Bu tədbirlərə gənc ekoloqların cəlb edilməsi məqsədilə IDEA İctimai Birliyi, Ekologiya və Təbii Sərvətlər Nazirliyi və Azərbaycan Gənclər Fondu tərəfindən Sözügedən ekoloji qiymətləndirmə layihəsinə start verilib.
Şuşa ilə yanaşı, layihə çərçivəsində gənclər həmçinin Cəbrayıl, Füzuli, Qubadlı, Xocavənd, Zəngilan və Ağdam rayonlarına səfər ediblər.
Qeyd edilməlidir ki, layihədə iştirak üçün təbiət elmləri sahəsində təhsili olan və bu sahədə fəaliyyət göstərən 300-dən çox gəncdən müraciətlər daxil olub, onlardan 60 nəfər müsahibə əsasında seçilib. Araşdırmalar 6 əsas istiqamət, o cümlədən bioloji müxtəliflik, su ehtiyatları, meşələrin qorunması, hidrometeoroloji və monitorinq xidməti, topoqrafiya, xəritəçəkmə və geologiya üzrə aparılır.
Layihənin gənc iştirakçıları ekoloji qiymətləndirilmə və monitorinq üzrə bilik və təcrübələrini artırmaq, eyni zamanda azad olunmuş ərazilərdə bərpa və mühafizə işlərinə töhfə vermək imkanı əldə edəcəklər.
“Azərbaycan və Türkiyə arasında ticarət dövriyyəsinin 15 milyard dollara çatdırılması üzərində çalışırıq”.
Oxu.Az xəbər verir ki, bunu Azərbaycanın iqtisadiyyat naziri Mikayıl Cabbarov Azərbaycan-Gürcüstan-Türkiyə Biznes Forumunda deyib.
O bildirib ki, bu məqsədə nail olunmasında Türkiyə ilə Azərbaycan arasında imzalanmış preferensial saziş xüsusi rol oynayır:
“Eyni zamanda qeyri-neft məhsullarının ixracında da dövlətlərarası preferensial ticarət sazişinin müsbət təsir göstərdiyini deyə bilərik. Azərbaycandan Türkiyəyə ixrac edilən məhsulların həcmində sürətli artım müşahidə olunub”.
Nazir əlavə edib ki, Azərbaycanla Gürcüstanla arasındakı münasibətlərə nəzər saldıqda strateji əməkdaşlığa söykənən əlaqələrin inkişaf etdiyi görünür:
“Ölkələrimiz arasında ticarətin müxtəlif sahələrində, xüsusilə enerji, nəqliyyat və logistika sahəsində də əməkdaşlığın genişləndiyi xüsusilə qeyd edilməlidir. 2021-ci ilin 10 ayı ərzində Gürcüstanla Azərbaycan arasında ticarət dövriyyəsi 33 faiz artıb.
Üçtərəfli əməkdaşlığın inkişaf etdirilməsində uğur həm biznes nümayəndələrinin, həm də müvafiq palataların işi nəticəsində mümkün olub”.
