Vətən Müharibəsində qələbə milli birlik olmadan qazanıla bilməzdi. Ali Baş Komandan İlham Əliyev bütün idarəçiliyi dövründə dövlətin humanizm siyasətini digər tədbirlərdən yuxarı tutub. Məhz ona görə də son 26 ildə 61 əfv və amnistiya qərarı nəticəsində çoxlu sayda şəxs yenidən cəmiyyətə dönüş imkanı əldə edib, doğmalarına, öz ailələrinə qayıda bilib və beləliklə, bağışlamağın, xeyirxahlığın ən ali dəyər olduğunu dərk edərək ictimai-siyasi sabitliyin, əmin amanlığın qoruyucularına çevrilib.
Bizimaz.az Axar.az -a istinadən xəbər verir ki, bunu millət vəkili Zahid Oruc deyib.
Millət vəkili qeyd edib ki, əfvlə cəzası azaldılan və tam azadlığa qovuşan məhbusların yalnız bir faizi təkrar cinayətlərin törədilməsində iştirak edib:
“Mənəvi islah tədbirləri, islahatlar nəticəsində hüquq sisteminin və qanunçuluğun insan hüquq və azadlıqlarının təminatında daha da liberallaşdırılması özünü doğruldur, dəqiq prinpislərlə müəyyənləşdirilən həmrəylik siyasəti səmərə verir:
Ona görə Əfv Komissiyasının üzvü kimi aldığımız müraciətlərin içərisində son dövrlər məhz şəhid ailələrinə və yaralı hərbçilərimizə yaxın insanların, eləcə də arxa cəbhədə fədakarlıq göstərən insanlarımızın yaxınları ilə bağlı böyük əfv, yaxud “qızıl amnistiya” gözləntisində olanlar çoxluq təşkil edir.
Prezident İlham Əliyevin “qızıl amnistiya” qərarı ilə çıxış edəcəyi haqda informasiyaları Zəfər səlnaməmizin davamı kimi görmək istəyənlər daha çoxdur. Lakin bir qədər gözləyək və sıx iş qrafiki altında, gərgin beynəlxalq və daxili gündəlik, xüsusilə Böyük Qayıdış strategiyası üzərində çalışan ölkə rəhbərinin ən mühüm dövləti işlər içərisində azadlıq arzusunda olan insanları da sevindirəcəyinə hər birimiz dərindən inanırıq.
Qəbul ediləcəyi təqdirdə “qızıl amnistiya” ictimai-siyasi-hüquqi akt kimi yeni tariximizə mühüm səhifə kimi daxil olacaq.
Gəncə işi və Tərtərdə dövlətçiliyimiz əleyhinə olanlar, eləcə də ətrafında siyasi cəbhə açılmış məhbuslarla bağlı qərarlar, hansı maddələrin, güzəştlərin əhatə dairəsinə daxil edilməsi yalnız Prezidentin konstitusion səlahiyyətləri daxilindədir”.
