Neftin qiymətləri artıq kritik həddi - 1 barrel üçün 70 dolları keçdi.
Bizimaz.az xəbər verir ki, bu sözləri dünya bazarında neft qiymətlərinin bahalaşması ilə bağlı danışan professor Fikrət Yusifov deyib. İqtisadçı bildirib ki, neft ixracatçıları olan Rusiya, İran və Venesuelaya qarşı sanksiyalar ABŞ-ın neft qiymətlərinin aşağı düşməsi ilə bağlı istəyinə uyğun olmasa da, Birləşmiş Ştatlar sanksiyaların miqyasını genişləndirmək siyasətindən əl çəkmək fikrində deyil:
“Keçən ilin noyabrın 5-dən İran neftinin satışına 6 ay müddətinə tətbiq edilən sanksiyaların müddəti başa çatdıqdan sonra qadağaların vaxtı yenidən uzadılacaq və sanksiyalar tətbiq edilməyə başladıqdan sonra İrandan neft ixracına razılıq verilmiş 8 ölkə mayın əvvəlindən artıq bundan məhrum ediləcəklər. Bunu bilən sözügedən ölkələrin İrandan neft idxal edən kampaniyaları artıq indidən hazırlıq görməyə başlayıblar. Yəni onlar bazarda özlərinə yeni satıcılar axtarırlar. Birləşmiş Ştatların Venesueladakı vəziyyəti günü-gündən daha da gərginləşdirməsi bu ölkənin də neft ixracı imkanlarının aşağı düşməsinə səbəb olur. Bu arada Rusiyaya neft hasilatı ilə bağlı yeni sanksiyaların tətbiq ediləcəyi gözlənilir. Belə bir durumda Liviyada vəziyyətin gərginləşməsi də neft bazarında qiymətlərin artmasına əlavə bir stimul yaradır”.
F.Yusifov dünya bazarlarında neft qiymətlərinin azalmasını özünün strateji hədəfinə çevirmiş ABŞ-ın yaranmış vəziyyətdə atacağı addımlardan da söz açıb:
“ABŞ-da bu gün neft hasilatını və onun ixracını sürətlə artırmaq istiqamətində davamlı addımlar atılır, şist neft hasilatı genişləndirilir. OPEK və onunla əməkdaşlıq edən ölkələrə qarşı isə neft qiymətlərinin tənzimlənməsinə qarşı yeni sanksiyaların tətbiqi istiqamətində konkret addımlar atılır. Bu günlərdə Birləşmiş Ştatlar Konqresində NOPEC qanun layihəsinin qəbul edilməsi gözlənilir. Bu qanun Amerika məhkəmələrinə OPEK ölkələrinə qarşı inhisarçılıqla bağlı işlərə baxmaq səlahiyyəti verəcək. Bu o deməkdir ki, OPEK-ə üzv olan və ilk növbədə OPEK-lə əməkdaşlıq edən neft hasilatçısı ölkələr özlərinə problem yaratmamaq xatirinə bir-birinin ardınca OPEK-i tərk etməyə başlayacaqlar. OPEK-in dağılması isə neft bazarına nəzarət sahəsində ABŞ-n hegemonluğunun bərqərar olması demək olacaq. Nəticə etibarilə neft hasilatının həcminin bir mərkəzdən idarə olunması ortadan qalxacaq. Bu isə hasilatın artmasına, neft qiymətlərinin isə son nəticədə ABŞ-n istədiyi bir səviyyəyə qədər azalmasına inkan verəcək”.
Qeyd edək ki, hazırda “Brent” markalı neftin bir barreli 70,55 dollardır.
