Azərbaycanın xalq yazıçısı Çingiz Abdullayev aprelin 7-də 59 yaşını qeyd edəcək. Ad günü ərəfəsində detektiv ustası “Novosti-Azerbaycan”a müsahibə verib.
Çingiz Abdullayev müsahibəsində, aprelin 11-də Azərbaycanda keçiriləcək prezident seçkiləri ilə bağlı mühüm məqamları da şərh edib.
“Mən İlham Əliyevə səs verəcəyəm. Bunu gizlətmirəm və kimlərinsə xoşuna gəlmək üçün demirəm. Sadəcə, normal bir şəxs, bütün bu quruculuq işlərini görürsə, İlham Əliyevə səs verməli olduğunu başa düşəcək. Bu, təbliğat deyil, həqiqətdir, reallıqdır. Çünki hazırda İlham Əliyevdən layiqli namizədlər görmürəm”.
Yazıçı qeyd edib ki, 90-cı illərin əvvəllərində ölkəmizdə tez-tez baş verən hakimiyyət dəyişiklikləri nəticəsində az qala, Azərbaycanı itirmək qorxusu ilə üzə-üzəydik. O zaman ölkəmizi dahi şəxsiyyət, ümummilli lider Heydər Əliyev sözün əsl mənasında xilas etdi:
“Bu, bir həqiqətdir. İndi qorxuram, o vaxtkı kimi hakimiyyət davası başlaya və daha heç kim bizi xilas edə bilməyə, dövlətimiz parçalana. 1988-ci ildən 1993-cü ilə qədər - beş il ərzində Azərbaycanda yeddi lider dəyişikliyi baş verib. Təsəvvür edin, əgər avtomobil beş il ərzində yeddi sürücü dəyişsə, dağılmağa məhkumdur; bir binada beş il ərzində yeddi idarə yerləşərsə, o binadan əsər-əlamət qalmaz. Buna görə biz dövləti qoruyub saxlamalıyıq, çünki müharibə vəziyyətindəyik.
İlham Əliyevi ən uyğun namizəd hesab edirəm. Bundan əlavə, bir yazıçı kimi bilirəm ki, Prezident mənim bütün kitablarımı oxuyur və mən bununla qürur duyuram. Mən bunun üçün öz səsimi ona verəcəyəm”, - deyə Çingiz Abdullayev əlavə edib.
