İstanbul Böyük Şəhər Bələdiyyəsinin sədri Əkrəm İmamoğluna verilən cəza açıqlanıb.
Türkiyə mediası xəbər verir ki, İBB sədri Əkrəm İmamoğlu “vəzifələrinə görə idarə heyətində çalışan Yüksək Seçki Qurumunun üzvlərini açıq-aşkar təhqir etmək” ittihamı ilə 2 il 7 ay 15 gün həbs cəzası alıb.
Belə ki, İmamoğlu 30 oktyabr 2019-cu il tarixində Fransanın Strasburq şəhərində keçirilən Avropa Şurası Yerli və Regional Hakimiyyətlər Konqresində çıxış edib.
İBB sədri çıxışı zamanı seçki dövründə dövlət resurslarından qeyri-məhdud şəkildə hakimiyyətin xeyrinə istifadə edildiyini, kampaniya zamanı cəmiyyəti parçalayan və qütbləşdirən bir dildən istifadə edildiyini, prezident və kabinet üzvlərinin aksiyalar həyata keçirdiklərini və seçki qadağalarını nəzərə almayan təcrübələr etdiyini vurğulayıb.
Bu səbəbdən məhkəmə qərarı ilə İmamoğlunun "vəzifələrinə görə kollegiya olaraq çalışan dövlət məmurlarını açıq-aşkar təhqir etmək" ittihamı ilə həbs cəzasına məhkum edildiyi bildirilib.
Həmçinin, “müəyyən hüquqların həyata keçirilməsindən məhrum etmə”ni özündə əks etdirən 53-cü maddənin də İmamoğluya tətbiq edilməsinə qərar verib.
Qeyd edək ki, 2019-cu il 31 martda Türkiyədə keçirilmiş bələdiyyə seçkilərinin nəticələrinə əsasən Cümhuriyyət Xalq Partiyasının (CHP) namizədi Əkrəm İmamoğlu İstanbul Böyükşəhər Bələdiyyəsinin sədri seçilib.
