Xəbər verdiyimiz kimi işğal dövründə Laçında məskunlaşdırılmış ermənilərə bölgəni tərk etməsi üçün avqustun sonuna kimi vaxt verilib. Ermənilər artıq evakuasiya işlərinə başlayıblar.
Bu gün isə erməni mediası Laçını tərk edən ermənilərin vəhşiliklərini əks etdirən daha bir video yayıb.
Görüntülərdə Laçındakı kilsəyə zərər vurulması əks olunub. Ermənilər ibadət evinin üzərindəki xaç ornamentlərini sökürlər.
Ermənistan parlamentinin keçmiş deputatı Naira Zohrabyan məsələyə reaksiya verərək yazıb ki, ermənilər Laçının Azərbaycana təhvil verilməsi üçün bu formada "hazırlıqlar" görürlər.
Eks-deputat qeyd edib ki, xalqının tarixində ilk dəfədir ki, erməni məlum torpaqlardan türklər tərəfindən deyil, öz seçdiyi hökumət tərəfindən çəkiclə zorla çıxarılır.
Qeyd edək ki, bundan öncə də erməni vandallığını əks etdirən onlarla görüntü yayılmışdı. Onlar tarixi abidələrə ziyan vurur, hətta qoyub getdikləri evləri belə yandırırdılar.
