Prezidentin kəskin çıxışından nəticə çıxarılacaqmı?
bizimaz.az Azərbaycanda tikinti sektoru qayda-qanunların pozulması hallarının ən geniş yayıldığı sahələrdən biridir. Bu sahədə həm işçilərin əmək və sosial hüquqları, həm də tikintinin həyata keçirilməsi prosesini tənzimləyən hüquqi-normativ baza ən kobud formada pozulur. Uzun illərdir bu sektorda qayda-qanunlara riayət edilməsinə nail olunması istiqamətində atılan addımlar hələ də real bəhrəsini verməməkdədir.
Xüsusilə Bakı şəhərində tikintilər qaydaların pozulması, park və yaşıllıqların məhvi prosesi ilə müşayiət olunur. Bu vəziyyət dövlət başçısının Nazirlər Kabinetinin 2018-ci ilin 6 ayının sosial-iqtisadi yekunlarına həsr olunmuş iclasındakı çıxışında xüsusi vurğulanıb. Prezident bildirib ki, narahatlıq doğuran sahələrdən biri də inşaat sektorudur: “Son illərdə bu sahədə böyük işlər görülüb. Azərbaycanın demək olar ki, bütün şəhərləri tikinti meydançasına çevrilib. Həm dövlət kapital qoyuluşu, həm özəl sektor tərəfindən qoyulan investisiyalar inşaat sektorunun inkişafına böyük təkan verib. Azərbaycanda inşaat materiallarının istehsalı ildən-ilə artır. Deyə bilərəm ki, biz bu gün özümüzü əsas inşaat materialları ilə təmin edə bilirik. İlk növbədə, ona görə ki, daxildə buna tələbat var. Çünki biz çox az miqdarda inşaat materiallarını xaricə satırıq. Qarşıya vəzifə qoyulub ki, idxaldan asılılığımızı azaldaq və daxili bazarı yerli inşaat materialları ilə təmin edək. Yəni inşaat sektorunun inkişafı ümumi iqtisadi inkişafa təkan verir, məşğulluğu artırır. İki-üç il ərzində inşaat sektorunda müəyyən böhran yaranıb və bu, əmək bazarına da dərhal öz mənfi təsirini göstərmişdir. Bu məsələlər bir-biri ilə sıx bağlı olan məsələlərdir. Bir daha demək istəyirəm ki, bu sahədə görülən işlər müsbətdir. Ancaq eyni zamanda biz nəyi görürük? Bir çox hallarda aparılan tikintilər heç bir meyara sığmır, nə şəhərsalma meyarlarına, nə tikinti meyarlarına. Bəzən memarlıq baxımından çox eybəcər binalar tikilir. Buna son qoymaq üçün çox ciddi tədbirlər görülməlidir və qanunsuz tikililərə son qoyulmalıdır”.
İlham Əliyev qeyd edib ki, qanunsuz tikililərə şərait yaradan dövlət məmurları çox ciddi cəzalandırılacaq: “Mən deyirəm, bunu hamı bilsin. Çünki bir çox hallarda bu işləri bir-birinin üstünə atırlar. Şəhər icra hakimiyyəti bələdiyyələrin üstünə, bələdiyyələr şəhər icra hakimiyyətinin üstünə. Amma faktiki olaraq bələdiyyələr şəhər icra hakimiyyətinin icazəsi olmadan belə hərəkət edə bilməz. Ona görə burada vahid bir nəzarət mexanizmi olmalıdır. Bir daha demək istəyirəm ki, ilk növbədə, Bakıda və digər şəhərlərdə bütün qanunsuz tikililərə son qoyulmalıdır. Bundan sonra Dövlət Şəhərsalma və Arxitektura Komitəsinin rəyi, icazəsi olmadan ölkəmizdə bir dənə də bina tikilməməlidir. Kim bunu edəcəksə, dərhal mənə məlumat verilsin. Həmin o adamları ən ciddi cəzalar gözləyir. Çünki biz bu qədər səy göstəririk. Bakı bu gün dünyanın ən gözəl şəhərlərindən biridir. Bunu təkcə biz demirik. Bunu demək olar ki, Bakıya gələn bütün qərəzsiz xarici qonaqlar deyir. Sözün əsl mənasında Bakı parlayan bir ulduzdur. Ancaq eyni zamanda Bakı şəhərində elə yerlər var ki, utanc gətirir. Binalar heç bir qaydaya riayət olunmadan biri-birinin yanında, ictimai yerlərdə, həyətlərdə tikilir. Bu binaların tikilməsinə kim icazə verir?! Yerli icra orqanları. Bu icazəni təmənnasızmı verir?! Əlbəttə ki, yox. Biz paytaxtımızı parklar, bağlar, ictimai zonalar şəhərinə çevirmişik. İndi yadınıza salın, əvvəlki dövrlərdə qanunsuz tikilmiş, bir-birinin içinə girmiş binalar həm orada yaşayanlara, həm də şəhər əhalisinə nə qədər əziyyət verirdi. İndi biz təmizlənmiş və sakinləri köçürülmüş yerlərdə ictimai zonalar yaradırıq, orada binalar tikilmir.
Bulvar 3 kilometrdən 16 kilometrə uzadılıb, böyük bir ictimai zonadır. Böyük parklar salınıb. Heydər Əliyev Sarayının arxasında gözəl park yaradılıb. Biz oradan vətəndaşları köçürəndə bəziləri deyirdilər, köçürürlər ki, binalar tikilsin. Gözəl bir parkdır. Azərbaycan Dram Teatrının arxasındakı ”Sovetski” adlandırılan ərazidəki biabırçı mənzərə aradan götürülür. Yenə də deyirdilər ki, orada binalar tikilir. İndi orada yol qovşaqları tikilir, yol hərəkətinə nəfəs verilir, parklar salınır. Onlarla, yüzlərlə belə işlər indi göz qabağındadır. Vaxtilə bəzi cinayətkarlar tərəfindən qanunsuz zəbt edilmiş yerlərdə indi parklar yaradılır. Yusif Səfərov küçəsi ilə Babək prospektinin kəsişməsində vaxtilə böyük bir ərazi zəbt edilmişdi, istifadəsiz qalırdı. İndi orada böyük parklar salırıq ki, insanlar gəlib dincəlsinlər, istirahət etsinlər. Heydər Əliyev Mərkəzinin qarşısında böyük ictimai zona yaradılıb. Vaxtilə orada işləməyən, dağılmış vəziyyətdə olan zavod yerləşirdi. Yəni biz bunu edirik. Ancaq götürüb ictimai yerdə, həyətdə, yaxud da ki, insanların istifadə etdiyi yerdə bina tikmək cinayətdir və bunu edən cavab verəcək. Bir daha demək istəyirəm ki, Dövlət Şəhərsalma və Arxitektura Komitəsinin icazəsi olmadan heç bir bina tikilə bilməz”.
Göründüyü kimi, Bakı şəhərində ictimaiyyətin narazılığına səbəb olan tikintilərlə bağlı dövlət başçısı da kəskin narazılığını qeyd edib. Bu çıxış göstərir ki, parkları, bağları məhv edərək tikinti aparanlar, binaların həyətlərində göydələn ucaldanlarla bağlı ölkə rəhbərliyinə ətraflı məlumat çatdırılıb.
Onu da qeyd edək ki, Bakı şəhərində bu cür qanunsuz, ictimai qınaqla qarşılanan tikintiləri həyata keçirmək üçün mütləq hakimiyyətdəki yüksək vəzifəli məmurlara bağlılıq olmalıdır. Bu cür tikintiləri aparan şirkətlərin arxasından əksər hallarda bu və ya digər yüksək post sahibi çıxır. Paytaxtda, eləcə də ölkənin digər iri şəhərlərində fəaliyyət göstərən əksər böyük tikinti şirkətləri faktiki olaraq oliqarx-məmurlara məxsusdur. Prezidentin son çıxışı əslində birbaşa həmin məmur-oliqarxlara xəbərdarlıqhesab olunmalıdır.
Xatırladaq ki, iyunun 2-də prezident tərəfindən Bakı şəhərinin baş planının hazırlanması məqsədilə sərəncam imzalanıb. Sərəncama əsasən baş planın hazırlanması prosesinə nüfuzlu beynəlxalq məsləhətçi şirkətin cəlb olunması üçün Dövlət Şəhərsalma və Arxitektura Komitəsinə ilkin olaraq 4,3 milyon manat ayrılıb.
Bu sərəncamdan sonra prezidentin kəskin tənqidi çıxışı bundan sonra xüsusilə Bakı şəhərində tikintilərin qaydalara uyğun şəkildə həyata keçirilməsinə ciddi nəzarət mexanizminin yaradılacağından xəbər verir.(musavat.com)
