Son vaxtlar Bakıda avtobus dayanacaqlarında ödəmə terminallarının azlığı müşahidə olunur. Bu terminalların təxminən 150-dən çoxu metrostansiyaların giriş və çıxış vestibüllərində yerləşir, lakin pandemiya səbəbilə yeraltı nəqliyyatın fəaliyyəti dayandırıldığı üçün vətəndaşlar bunlardan istifadə edə bilmirlər.
Məsələ ilə bağlı açıqlama verən Bakı Nəqliyyat Agentliyinin mətbuat xidmətinin rəhbəri Mais Ağayev bu istiqamətdə tədbirlərin görüldüyünü deyib.
O, sərnişinlərin bu terminallara tələbatının ödənilməsi məqsədilə BNA-nın, metropolitenin, eyni zamanda Milli Ön və “BakıKart”ın rəhbər şəxsləri arasında videokonfrans formatında görüş keçirildiyini bildirib:
“Görüş zamanı məsələnin operativ həlli istiqamətində qərarlar qəbul olunub. Qərarlardan biri əsasən səhər və axşam pik saatlarında sərnişin axınına uyğun olaraq metrostansiyaların vestibüllərinin yalnız ödəmə terminallarından istifadə edilməsi üçün açılması ilə bağlıdır”.
Mais Ağayev yaxın zamanlarda “BakıKart”ların balansının onlayn şəkildə artırılmasının mümkün olacağını da vurğulayıb:
“Əsas hədəfimiz bütün marşrut xətlərinin nağdsız ödənişə inteqrasiyasını təmin etməkdir. Bu da o deməkdir ki, gün ərzində daha çox sərnişinin “BakıKart”ının balansını artırması tələbatı yaranacaq. Bu durumda sərnişinlərin hər hansı bir sıxıntı çəkməməsi üçün ən optimal variant kimi onlayn ödəmə sistemi nəzərdən keçirilib və bu istiqamətdə işlər aparılır”.
