Son onilliklərdə iqlim dəyişiklikləri fonunda istiləşmə tendensiyasının üstünlüyünə baxmayaraq, ayrı-ayrı illərdə fərqli proseslər müşahidə edilir. Aprel ayının birinci yarısında dağətəyi rayonlarda ilin bu vaxtı üçün nadir hadisə olan qar qeydə alınıb. Havanın temperaturu isə orta hesabla iqlim normasından 1,5 dərəcə aşağıdır.

Bizimaz.az havaların qeyri-sabit keçməsi ilə bağlı yaranan suallara aydınlıq gətirmək üçün tarixi məlumatlara nəzər salıb.

İlk olaraq, son onilliyin təhlili göstərir ki, 2011-ci ildən başlayaraq beş dəfə havanın temperaturu normadan dörd dərəcəyədək yüksək, üç dəfə 1,4 dərəcə aşağı, iki dəfə isə norma daxilində olub. Yüzillik dövr üzrə isə ən anomal soyuq keçən aprel ayı 1954-cü və 1987-ci illərdə müşahidə edilib - havanın orta aylıq temperaturu doqquz dərəcəyə enib.

Çoxillik meteoroloji müşahidələrə görə, Bakı şəhəri üçün aprel ayında ən yüksək temperatur göstəricisi 32 dərəcə isti, ən aşağı temperatur isə 0,4 dərəcə şaxtadır. Bununla da, sərhəd göstəricilər arasında fərq 30 dərəcədən çoxdur. Apreli iqlim xüsusiyyətlərinə görə ilin ən rəngarəng və sürpizlərlə zəngin aylarından biri kimi səciyyələndirmək olar.

Milli hidrometeorologiya xidmətinin məlumatına əsasən, keçən əsrin sonunda - 1998-ci ildə  aprelin 14-də və 24-də havanın temperaturu rekord həddə çataraq, Abşeron yarımadasında 35 dərəcəyədək, Naxçıvan MR-da və ayrı-ayrı aran rayonlarında 36-38 dərəcəyədək yüksəlib. 2012-ci il aprelin 10-da Bakıda 1998-ci ilin sutkalıq rekord göstəricisi təkrarlanıb, yenidən 32° isti olub.  

Aprel ayında ən soyuq hava 1911-ci il aprelin 1-də qeydə alınıb. Həmin gün Bakıda havanın minimal temperaturu 0,4° şaxta olub.

Adətən, aprelin 20-dən sonra yağışlar leysan xarakterli olur və tez-tez şimşəklə müşayət edilir.