Azərbaycan Prezidenti İlham Əliyev Rusiya Prezidenti Vladimir Putinlə Soçidə görüşüb.

Bizimaz.az: Axar.az xəbər verir ki, görüş “Valday” Beynəlxalq Müzakirə Klubunun toplantısı çərçivəsində baş tutub.

“Bizim şəxsi görüşlərimizdə müəyyən fasilənin olmasına baxmayaraq, ölkələrimiz arasındakı əlaqələr inkişaf edir. Ticari-iqtisadi əlaqələr möhkəmlənir, əmtəə dövrüyyəsi ötən il 2.5 milyard dollar təşkil edib", - Putin bildirib.

Putinin sözlərinə görə, Azərbaycan və Rusiyanın bu istiqamətdə yaxşı perspektivləri var:

“Azərbaycan Prezidentinin müəllifi olduğu planları nəzərdə tuturam. Biz əlimizdən gələni edirik ki, bu konkret, iri layihələr həyata keçsin. Bunun üçün hətta ikitərəfli hökumətlərarası komissiya da işləyir.

Digər sahələrdə də əlaqələrin necə inkişaf etdiyinə dair məlumat mübadiləsi aparmaq lazımdır, ümid edirəm ki, bu gün buna müvəffəq olacağıq və maraqlı bir ümumi müzakirədə iştirak edəcəksiniz”.

Azərbaycan Prezidenti İlham Əliyev Putinə görüş imkanına görə təşəkkür edib:

“Qeyd etdiyiniz kimi, biz bir müddətdir, daha dəqiq desək, 4 aydır görüşmürük. Bizim ötənilki görüşlərin intensivliyini nəzərə alsaq, bu, həddən artıq uzun vaxtdır. Ötən il biz 4 dəfə görüşmüşük”.

İ.Əliyev Rusiya-Azərbaycan münasibətlərini strateji tərəfdaşlıq kimi xarakterizə edib.

Azərbaycan Prezidenti iqtisadi sahədə müsbət dinamikanı da qeyd edib:

“Əmtəə dövriyyəsi ötən il də artırdı, bu il də artır. Bizim məlumatımıza görə, bu il avqusta qədər artım 20 faizdən çox təşkil edib. Rusiya bizim üçün vacib tərəfdaş, dost və mehriban qonşudur. Biz bu əlaqəni qiymətləndiririk. Əminəm ki, bugünkü müzakirə əlaqələrimizin daha da möhkəmlənməsinə yaxşı töhfə olacaq”.

 

 

Twitter