Noyabr ayının ortası Andaman adasında amerikalı turist sentinel qəbiləsi tərəfindən qətlə yetirildi.

Bizimaz.az ölkə.az-a istinadən xəbər verir ki, bu adanın yerli sakinləri adaya qədəm basan istənilən yad insana hücum edir, qətlə yetirir. Planetimizdə sivil dünya ilə əlaqə qurmaq istəməyən yüzlərlə cəmiyyət var. Onlardan bəziləri isə kifayət qədər təhlükəlidir. Siyahını oxucularımızla bölüşürük.

Yadlara ox və yayla hücum

Bir çox antropoloq etiraf edir ki, Hind okeanındakı Şimali Sentinel adasının sakinləri dünyadan tamamilə təcrid edilmiş yeganə xalqdır. Heç kəs onların hansı dildə danışdığını, saylarını və sosial statuslarını bilmir. 150 il ərzində onlarla əlaqəyə girmək cəhdi faciə ilə nəticələnib. Adaya yaxınlaşanlara sakinlər ox atır, daha yaxına gedənləri isə qətlə yetirirlər.

Məlum olub ki, ada sakinləri hələ də daş dövründə yaşayırlar. Onlar ovçuluq və yığıcılıqla məşğul olur, kənd təsərrüfatı ilə tanış deyillər. Eyni zamanda alovu da əldə etməyiblər.

Sivilizasiyanın mikrobları

Sentinel adası yaxınlığındakı Cənubi və Orta Andaman adalarındakı carava qəbiləsi də daş dövründə yaşayır. Alimlər ehtimal edirlər ki, 55 min il ətraf dünya ilə təcrid olunmuş qəbulə xalqı praktiki olaraq heç dəyişilməyib. Onlar vəhşi donuz və tısbağa, balıq ovlayır, meyvə, bitki kökü və arı balı toplayırlar. Onların pəhrizi optimaldır. Caravalıların rasionunda 150 bitki və 350 heyvan növü var.

Bu yaxınlara qədər qəbilə yadlarla ünsiyyətdən qətiyyətlə boyun qaçırır, oxdan atəş açırdılar. 1970-ci illərin sonunda qəbilənin ərazisindən uzaq qəsəbələrlə ada administrasiyasını birləşdirən yol çəkildi.

Hindistan hökuməti qadağan etsə də, turistlər bəzən yolda aborigenlərlə əlaqəyə girirlər. Onlar yerli sakinlərə qida və əşyalar verərək rəqslərini izləyirlər. Amma yadlarla əlaqə ada sakinləri arasında infeksiyaya səbəb oldu.  1999-cu ildən 2006-cı ilə qədər immuniteti olmayan caravaların yarısı bu epidemiyadan həlak oldu.

Mühafizəkarlar və maksimalistlər

Ekvadorun şərqində, Yasuni milli parkı ərazisində dünyanın ən azsaylı və qapalı xalqı, yəni taqarei hinduları yaşayır. Onlar nə vaxtsa böyük vaorani qəbiləsinin üzvləri olublar. Amma 1968-ci ildə protestant missionerləri ilə əlaqəyə girdilər və meşələrə gedərək xaric aləmlə əlaqəni tamamilə kəsdilər. Sonuncu dəfə taqaerilərlə missionerlər 1987-ci ildə əlaqə qurmağa çalışdılar. Onların hamısı öldü.

Qəbilə barədə demək olar ki, heç nə məlum deyil. Ehtimal edilir ki, onların sayı 30 nəfərdən çox deyil. Taqaerilər əsasən ovçuluq və yığıcılıqla məşğul olurlar. Kənd təsərrüfatı ilə tanış deyillər. Son on ildə bu xalqın cavan üzvlərini Vaorani kəndləri yaxınlığında görüblər. Onlar ovladıqları heyvanları paltar və silaha dəyişmək üçün gəlirlər.

Kabus-hindular

Cənubi Amerikanın Amazon vadisində sivilizasiyadan uzaq yaşayan 80-ə yaxın qəblə var. Onlar arasında ən vəhşisi və əlaqəyə girməyən qəbilə kavaxivalardır. Kavaxiva qəbiləsi Braziliyanın Matu-Qrosu ştatında yaşayır.

Qəbilə və onun dili haqqında çox az məlumat var. Bundan başqa hinduları demək olar ki, heç kəs görməyib. Sadəcə 2005-ci ildə çəkilmiş bir neçə foto və video var. Bu kadrlarda kavaxivalar bir-birləri ilə söhbət edirlər.

Kavaxivaların həyat tərzi haqqında bütün məlumatlar ya qonşu qəbilələrdən alınır ya da izləri ilə müşahidə edilir. Qonşu qəbilələr kavaxivaları qırmızı başlılar adlandırırlar. Tupi qəbiləsinin üzvləri bildirirlər ki, kavaxiva kişilərinin siluetini gecələr kəndlərinin yaxınlığında görüblər və onlar quş və vəhşi heyvan səsləri çıxarıblar.

Ağac kəsənlər və antropoloqlar tez-tez bu xalqın tərk etdiyi kəndlər tapırlar. Evlərdə ox, yay və nizə, mətbəx əşyaları, toxunma zənbillər tapılır. Bu əşyalara baxsaq, qəbilə köçəri həyat tərzi sürür. Onlar ovçuluq və yığıcılıqla məşğul olur, kənd təsərrüfatı, əkin-biçinlə tanış deyillər.