Bakıda Ümumdünya Mətbuat Şuraları Assosiasiyasının növbəti illik toplantısı keçirilir.
Bizimaz.az Axar.az-a istinadən xəbər verir ki, “Park İnn” otelində Azərbaycan Mətbuat Şurasının təşkilatçılığı ilə baş tutan bu mötəbər tədbirdə Asiya, Avropa və Afrikanın 20-yə yaxın ölkəsindən, o cümlədən Türkiyə, Hindistan, Banqladeş, Nepal, Kenya, Zimbabve, İraq, Kosovo, Makedoniya, Şri-Lanka, Tanzaniya, Uqandadan nümayəndələr qatılıb.
Tədbirdə Azərbaycan prezidentinin ictimai-siyasi məsələlər üzrə köməkçisi Əli Həsənov, Türkiyənin Azərbaycandakı fövqəladə və səlahiyyətli səfiri Ərkan Özoral, Mətbuat Şurasının sədri Əflatun Amaşov, MTRŞ sədri Nuşirəvan Məhərrəmli, KİVDF-nin icraçı direktoru Vüqar Səfərli, “Teleqraf” Media Qrupunun rəhbəri Aynur Camalqızı, BMT, Avropa Şurası kimi beynəlxalq təşkilatların nümayəndələri, o cümlədən yerli media qurumlarının rəhbərləri və ekspertlər də iştirak edir.
Tədbirdən öncə mətbuat nümayəndələri qarşısında çıxış edən Azərbaycan Mətbuat Şurasının sədri Əflatun Amaşov tədbirin əhəmiyyətini vurğulayıb, beynəlxlaq toplantının Azərbaycanda keçirilməsindən məmnunluğunu ifadə edib. Qeyd edib ki, bu assosiasiya 1992-ci ildə yaradılıb:
“ABŞ-ın müəyyən ştatlarında, Türkiyənin, Hindistanın, Banqladeşin, Zimbabvenin, Kenya və Makedoniyanın jurnalistləri belə bir qurum yaradıblar. O vaxdan indiyə kimi həmin ölkələrdə tədbirlər keçirilir, dünyada mətbuat azadlığının durumuna dair hesabatlar dinlənilir, jurnalistlərin qarşılaşdığı problemlər, onların informasiya əldə etməsi ilə bağlı təkliflər səslənir. O cümlədən dünyada medianın inkişaf meylləri müzakirə olunur və tendensiyalar öyrənilir. Bu gün iştirak edən ölkələrin söz azadlığına dair hesabatları dinləniləcək, sabah isə saat 11-də ekstremal vəziyyətdə jurnalist fəaliyyətinə dair geniş müzakirələr dinləniləcək. Hindistandan, İraqdan və digər ölkələrdən olan məruzəçilər çıxış edəcəklər. Günün ikinci yarısında isə Ümumdünya Mətbuat Şuraları Assosiasiyası yenidən öz işini davam etdirəcək. Artıq qonaqların əksrəiyyəti iki gündür ki, Azərbaycandadır. Onların çalışdığı mətbuat orqanlarında Azərbaycanla bağlı kifayət qədər məlumatlar yer alıb. Onların Azərbaycanla bağlı təsəvvürləri genişlənib, ölkəmizdə necə əminamanlıq olduğunu dilə gətirirlər. Mən əminəm ki, 40-a yaxın jurnalist öz ölkəsinə qayıtdıqdan sonra Azərbaycanla bağlı yazılar dərc edəcək”.
Ümumdünya Mətbuat Şuraları Assosiasiyasına üzv təşkilarların nümayəndələrinin öz ölkələrində söz azadlığı və medianın durumu, o cümlədən mövcud problemlərə dair məruzələrlə çıxış etməsi gözlənilir. Mövcud sahədəki tendensiyalarla bağlı fikir mübadiləsi aparılacağı toplantıda həmçinin, ekstremal vəziyyətlərdə və müharibə şəraitində jurnalistlərin davranışı ilə bağlı müzakirələrin getməsi də nəzərdə tutulur.
