Efiopiyadan Keniyaya uçan “Ethiopian Airlines” şirkətinə aid Boinq-737 sərnişin təyyarəsinin qəzaya uğraması səbəbi ilə BMT-nin Azərbaycan nümayəndəliyində təşkilatın bayrağı yarıya qədər endirilib.
Bizimaz.az xəbər verir ki, bu barədə məlumatı BMT-nin Azərbaycandakı ofisi yayıb.
“Efiopiya Hava Yollarına məxsus təyyarənin qəzaya uğraması nəticəsində 157 nəfər, o cümlədən BMT-nin 11 əməkdaşı həlak olub. Onların xatirəsini anmaq üçün BMT-nin Azərbaycandakı nümayəndəliyi təşkilatın bayrağını yarıya qədər endirib. BMT Baş katibi Antonio Quterreş həlak olanların ailələrinə başsağlığını çatdırıb”, - açıqlamada bildirilib.
Qeyd edək ki, ötən gün Efiopiyadan Keniyaya uçan “Ethiopian Airlines” şirkətinə aid Boinq-737 sərnişin təyyarəsi qəzaya uğrayıb. Hadisə nəticəsində 157 nəfər həlak olub.
