Daxili İşlər Nazirliyinin Kollegiyası "Şəxslərə məhkumluq barədə arayışların verilməsinə dair Təlimat”da dəyişikliklər edib.
Bizimaz.az bildirir ki, Bakıpost.az-ın məlumatına görə, dəyişiklik biri əvvəllər Azərbaycan ərazisində yaşamış əcnəbilərlə bağlıdır.
Bundan sonra həmin əcnəbilər məhkumluqları barədə arayış almaq üçün xarici ölkələrdəki Azərbaycan Respublikasının diplomatik nümayəndəliklərinə və ya konsulluqlarına müraciət etməlidirlər. Bu cür müraciətlər baxılması üçün Xarici İşlər Nazirliyinin Konsulluq İdarəsi vasitəsilə DİN-in Baş Əməliyyat və Statistik İnformasiya İdarəsinə göndərilir və müvafiq yoxlamadan sonra hazırlanmış arayışlar Xarici İşlər Nazirliyinə təqdim olunur.
Azərbaycanın diplomatik nümayəndəlik və ya konsulluqlarının olmadığı ölkələrdə yaşayan Azərbaycan vətəndaşları, əcnəbilər və ya vətəndaşlığı olmayan şəxslər isə məhkumluqları barədə arayış almaq üçün üçüncü ölkələrdə yerləşən Azərbaycanın diplomatik nümayəndəlik və ya konsulluqlarına müraciət etməlidirlər.
Qeyd edək ki, qüvvədə olan Təlimata əsasən indiyə qədər Azərbaycanda yaşamış əcnəbilərin göstərilən məsələ üzrə müraciətləri diplomatik kanallarla Xarici İşlər Nazirliyinə göndərilib. Qərara əsasən bu müddəa ləğv edilib.
Dxili işlər naziri Ramil Usubovun imzaladığı qərar yanvarın 18-də qüvvəyə minib.
