2020-ci ilin yanvar ayından etibarən “PAŞA Holding” MMC-nin direktorunun birinci müavini Cəlal Qasımov Şirkətin Baş icraçı direktoru vəzifəsinə təyin olunacaq.

Bu barədə “Marja”ya “PAŞA Holding”dən bildirilib.

Mir Camal Paşayev isə öz növbəsində şirkətin idarəetməsini, korporativ idarəetmə islahatları nəticəsində yaradılacaq Holdinqin Direktorlar Şurasının üzvü kimi fəaliyyətini davam etdirəcək.

“Yeni vəzifəsini yerinə yetirərkən, o, ilk növbədə strateji biznes və insan kapitalının inkişafı məsələlərinə diqqət yönəldəcək.

Qeyd edək ki, sözügedən qərar, üzərində artıq iki ildən çox işlənilən “Liderlərin inkişafı və davamlılıq proqramı” nəticəsində Holdinq tərəfindən qəbul edilib”,- Holdinqin məlumatında deyilir.

Məlumat üçün bildirək ki, Cəlal Qasımov “PAŞA Holding”də karyerasını 2015-ci ildə Bank Qrupunun rəhbəri və direktorun müavini vəzifələrində başlayıb və 17 oktyabr 2016-cı il tarixində direktorun birinci müavini vəzifəsinə təyin edilib.

Cəlal Qasımov “Warwick” Universitetinin Biznes Məktəbindən MBA dərəcəsinə sahibdir. “PAŞA Holding”ə qoşulmazdan öncə o, Azərbaycanın bir neçə aparıcı şirkətlərində rəhbər vəzifələrdə çalışıb ki, bura iki yerli bankda baş icraçı direktor vəzifəsi də daxildir. O, həmçinin, dünyanın qabaqcıl peşəkar məsləhətçi şirkətində iş təcrübəsinə malikdir.
istinad