Son günlər Ermənistandakı etirazlar, proseslərin mümkün sonluğu ilə bağlı müxtəlif fikirlər səslənir. Bəzi siyasilrə hesab edir ki, lazım gələrsə Rusiya bu ölkədəki 102-ci hərbi bazasından aksiyaları yatırmaq üçün istifadə edə bilər. 

 

Bəs əslində necə, Rusiyanın son anda belə bir addım atması mümkündürmü? İndiki mürəkkəb situasiyada Kreml buna cəsarət edə bilərmi?

 

VİP sədri Əli Əliyev Moskvanın indiki vəziyyətdə bir sıra addımlar ata biləcəyini vurğuladı:

 

“Mənə elə gəlir ki, dünəndən artıq Rusiyanın susqunluğu bitdi. Putinin Karapetyana zəngi və “problemlərin qanun çərçivəsi və son parlament yekunları “ əsasında çözülməsi barədə rəsmi məlumatlarda yer almış fikri iki cür yozulmalıdır. Ya Putin Karapetyana dəstək və tapşırıq verib, çərçivələrə işarə edir. Ya da ki, Paşinyanla Rusiya rəsmilərinin görüşündən sonra neytrallığa çalışır. Bir fikri dəqiqliklə bilirəm ki, Putin Ermənistanı Qərbə güzəşt etməyəcək. Bu yolda gərəkən nədirsə, artıqlaması ilə edəcək, o cümlədən hərbi müdaxiləyə də əl ata bilər. 102-ci hərbi hissə hərəkətə keçə bilər, lakin bu son həddir. Eksklüziv olaraq, sizə bir xəbər vermək istəyirəm. Dünən internet üzərindən müvafiq saytın köməkliyi ilə bəzi şəxslər Ermənistana 3 İL-76 təyyarəsinin uçduğunu qeydə alıblar. Təyyarələr Moskva vilayəti ərazisindən qalxıblar. İl-76 təyyarələri hərbi məqsədlə də istifadə edilə bilən uçuş vasitələridir. 

İstisna etmirəm ki, Moskva Ermənistana xüsusi təyinatlı qüvvələr yerləşdirir. Belə qüvvələr requlyar hərbi hissələrdən daha effektivdir. Onları mülki geyimdə istifadə etmək olur və lazım gəldikdə özəl şirkətlərə aidiyyatı deyilə bilir. Bu yolla dövlət kənarda saxlanılır. Suriyada bu üsul sınaqdan çıxarılıb. Vaqner adlı özəl şirkət Rusiya mənşəli olsa da, onların törətdiklərini rəsmi Moskva boynundan atır. Belə qüvvələr Ermənistana da gətirilə bilər. Gedişat Paşinyan-Rusiya, Paşinyan –Qərb, Qarabağ klanı-Kreml danışıqlarından asılı ola bilər. Bu günə Paşinyan şəksiz qalib təəssüratı bağışlayır. Lakin hadisələrin diametral dəyişikliyini mümkün sayıram. Mayın 1-nə parlmentdə seçkilər təyin edilib. O zamana qədər hər iş dəyişə bilər. Qarabağ klanı come-back də edə bilər. Karapetyan və hakim siyasi partiyanın yenidən güclənmməsi versiyası da baş tuta bilər. Fikrimcə, hadisələrin inkişafı Moskvanın mövqeyindən asılı olacaq”.