Prezidentliyə namizədliyi irəli sürülən Zahid Orucun seçki qərargahı fəaliyyətə başlayıb.
Bu barədə millət vəkili Zahid Oruc məlumat verib. Millət vəkili seçki qərargahının Nərimanov rayonu Heydər Əliyev prospektində yerləşdiyini bildirib:
“Seçki qərargahındakı komandanın tərkibi 2013-cü ildə prezident seçkilərində işləmiş insanlardır və bura yeni simalar da cəlb ediləcək. Biz 2013-cü ildə prezident seçkilərində əldə edilmiş təcrübədən yararlanaraq prosesdə iştirak edəcəyik. Hazırda seçki qərargahı üzvləri arasında vəzifə bölgüsü aparılıb. İndiki mərhələdə əsas iş imza vərəqələrini dislokasiyalar üzrə paylayıb, qanunvericiliyin tələblərinə uyğun olaraq toplamaqdır. Toplanıb, geri yığılması ilə bağlı genişmiqyaslı işlərə start verilib. Hazırda bütün fəaliyyətimiz bu istiqamətə yönəlib”.
Millət vəkili vurğulayıb ki, bununla bağlı növbəti mərhələ üçün yol xəritəsi hazırlanıb və hazırda buna uyğun işlər görülməkdədir: “Seçki qərargahının simvolları, adı, şüarları, seçki komandası və proqram üzərində iş gedir. Bunlar barədə əlavə məlumatlar veriləcək”.
