Azərbaycan Prezidenti İlham Əliyev Birləşmiş Millətlər Təşkilatının (BMT) Baş Assambleyasının 75-ci yubiley sessiyasında ümumi müzakirələrində çıxış edəcək.
BMT İnformasiya Mərkəzinin xəbərinə görə, Azərbaycanın dövlət başçısının çıxışı sentyabrın 24-nə planlaşdırılıb.
15 sentyabrda Nyu-Yorkda BMT Baş Assambleyasının 74-cü sessiyası sona çatıb və 75-ci yubiley sessiyası start götürüb. Yeni sessiyanın ilk günlərində, əsasən gündəm maddələrinin Assambleyanın altı əsas komitəsi arasında bölüşdürülməsi ilə əlaqədar prosedur məsələləri öz həllini tapacaq.
Sessiyada ümumi müzakirə 22 sentyabrda başlayacaq. Ənənəvi yüksək səviyyəli Payız Həftəsi formatı dəyişdiriləcək - ölkə liderləri, istisna hal kimi, bu il çıxışlarını videoformatda göndərə biləcəklər. İclas zalının özündə isə hər nümayəndə heyətindən bir nəfər olacaq.
Ənənəvi olaraq debatları Braziliya açacaq, ardından isə BMT-nin mənzil-qərargahının yerləşdiyi ölkə olaraq ABŞ çıxış edəcək. ABŞ prezidentinin bu iclasda birbaşa Baş Assambleyanın tribunasından çıxış etməsi istisna edilmir. Digər dövlət başçılarının çıxışları konfrans iştirakçılarının siyahısı və prosedur qaydalarına uyğun olaraq bir-birinin ardınca konfrans zalında yayımlanacaq.
İlkin siyahıya görə, ümumi debatların ilk günü - 22 sentyabrda ABŞ, Çin, Rusiya, Fransa, İran, Türkmənistan və Tacikistan liderləri çıxış edəcəklər. Özbəkistan, Qazaxıstan, Qırğızıstan, Moldova və Ukrayna prezidentlərinin çıxışları konfrans zalında sentyabrın 23-də, Azərbaycanın dövləti başçısının çıxışı isə sentyabrın 24-də yayımlanacaq. Çıxış edənlərin siyahısına uyğun olaraq Gürcüstan və Moldova adından 25 sentyabrda hökumət başçıları, Belarusdan isə sentyabrın 26-da Xarici İşlər Naziri çıxış edəcək.
Debatlar ərəfəsində 21 sentyabrda BMT-nin 75 illiyinə həsr olunmuş yüksək səviyyəli iclas olacaq. Bundan əlavə, Yüksək Səviyyəli Həftə çərçivəsində daha üç vacib görüşün keçirilməsi planlaşdırılır.
