ABŞ-Meksika sərhədinə doğru irəliləyən miqrantlar zorakılıq edəcəyi halda ABŞ-ın təhlükəsizlik qüvvələri buna radikal tədbirlərlə qarşılıq verəcək.
Bizimaz.az xəbər verir ki, bu barədə ABŞ Prezidenti Donald Tramp Ağ Evdə keçirilən mətbuat konfransı zamanı danışıb.
ABŞ-ın köç siyasətinin dəyişdiyini bildirən Tramp Hondurasdan yola çıxan və getdikcə böyüyən miqrant dəstəsi məsələsinə də toxunub. Sözügedən miqrant dəstəsinə heç bir güzəşt edilməyəcəyini qeyd edən prezident dəstə üzvlərinin Qvatemala-Meksika sərhədində Meksika polisinə daş atmasını xatırladıb.
“Dünyada milyardlarla insan yoxsulluq içində yaşayır. ABŞ-dan bu insanların hamısına qucaq açmasını gözləmək olmaz. Ümid edirəm burada eyni şeylər baş verməz. Sizə açıq şəkildə deyə bilərəm: Meksikadakı kimi daş atmağa cəhd etsələr, təhlükəsizlik qüvvələrimiz onlara atəşlə cavab vermək haqqını dəyərləndirəcək. Hər halda atılan bir daşın üzünüzə dəyməsi də fərqli bir vəziyyət deyil”, - Tramp bildirib.
Qeyd edək ki, Trampın göstərişi ilə miqrantların ABŞ-a daxil olmasının qarşısını almaq üçün 15 minə qədər hərbçi meksika sərhədinə göndərilib.
