Azərbaycanda 2020-ci ilin birinci yarısında premium avtomobil markaları üzrə satışların həcmi məlum olub.
Bizimaz.az Axar.az-a istinadən xəbər verir ki, 6 marka - "Audi", BMV, "Mersedes", "Leksus", Lənd Rover və "Porşe" üzrə ümumi satışların həcmi 665 ədəd təşkil edib.
Ən çox satılan bahalı avtomobil "Mersedes" olub
"Mersedes" 38,95% bazar payı və ya 259 ədəd satışla bazarın lideri olub. "Leksus" 119 ədəd satışla (17,89% bazar payı) 2-ci, BMV 112 avtomobil (16,84%) sataraq 3-cü olub. Yanvar-iyun aylarında 100 ədəd Lənd Rover, 40 ədəd "Porşe" və 35 "Audi" satılıb.
“Audi”nin satışları 40%, “Leksus” və "Lənd Rover"in satışları isə 30% azalıb
Bununla belə pandemiya küləyi premium avtomobil bazarını da vurub. Xüsusilə də, bu ilin I rübü ilə müqayisədə II rübdə satışların həcmi 16,3% azalıb. 6 markadan 5-nin satışlarında azalma müşahidə edilib. Faizlə ən çox azalma “Audi”də olub - 40%. "Leksus" və "Lənd Rover"in satışları 30%, "Porşe"nin satışları isə 18% azalıb. Rəqəmlə ifadədə ən böyük azalma isə "Mersedes" avtomobilləri üzrə olub. Markanın satışları ikinci rübdə 23 ədəd azalaraq 118 avtomobilə qədər düşüb.
BMV axına qarşı, 33%-lik artım
Maraqlıdır ki, pandemiya BMV avtomobillərinin satışına nəinki təsir edib, hətta bu dövrdə markanın satışları artan xətt üzrə davam edib. Belə ki, şirkət I rübdə 48 avtomobil satıbsa, II rübdə satışların həcmi 64 avtomobilə qədər yüksəlib. Bu isə 33% artım deməkdir.
