“Mayın 11-dən etibarən Daxili işlər Nazirliyi tərəfindən Bakı ərazisində xüsusi karantin rejiminin tələblərinin yerinə yetirilməsinə nəzarət etmək məqsədilə quraşdırılmış stasionar postların sayı azaldılıb”.

 Bunu jurnalistlərə açıqlamasında Nəsimi Rayon Polis İdarəsinin İctimai Təhlükəsizlik şöbəsinin rəisi, polis mayoru Elçin İsgəndərov bildirib.

Onun sözlərinə görə, həmin postlarda xidmət aparan polis naryadları patrul xidmətinə cəlb edilib:

“Eləcə də, məhəllələrarası və küçələrdə olan xidmətimiz əvvəlki günlərdəki kimi davam etdirilir. Bundan əlavə, patrul naryadlarının, DİN-in Daxili Qoşunlarının hərbi qulluqçularının sayı avtobus dayanacaqlarında, metro stansiyalarının girişlərində, eləcə də poçt və bank filialları qarşısında artırılıb. Onlar sosial izolyasiya qaydalarına əməl edilməsi üçün vətəndaşlarla profilaktik söhbət aparırlar”.

O qeyd edib ki, paytaxtda rayonların sərhəd hissələrində postlar saxlanılıb:

“Əlcək və maskadan istifadənin, yaşayış yerini tərk etmək üçün icazənin, hər hansı xidmət sahəsində çalışanların isə xidməti vəsiqələri və arayışların olub-olmaması polis əməkdaşlarında olan planşetlərlə yoxlanılır”.

Qeyd edək ki, dünənə kimi Bakıda 70 post quraşdırılmışdı. Hazırda paytaxt ərazisində 18 postda yoxlama aparılır.