Bu gün Əməkdar artist, tanınmış televiziya aparıcısı Nailə İslamzadənin doğum günüdür.
N.İslamzadə Moderator.az-a açıqlamasında doğum günüylə bağlı öz xoş təəssüratlarını bölüşüb:
“Təbrikiniz üçün üçün çox sağ olun, diqqətinizə görə təşəkkür edirəm. Moderator.az həmişə diqqətcildir və bütün hadisələri gündəmdə saxlamağa çalışır. Həmişə böyük həvəslə sizin saytı oxuyuram və bir çox saytlardan fərqli olaraq sizi “sarı mətbuat” adlandırmaq olmaz.
Doğum günümü bu gün ailə üzvlərimlə birlikdə evdə keçirəcəm. İllər sonra televiziyaya da qayıtdım. Düzdür, çoxları AzTV-də işə başlayacağımı gözləyirdi, əvvəlcə məni AzTV dəvət etmişdi, İctimai Televiziyanın təklifi daha uyğun oldu. Buna görə İTV-nın rəhbərliyinə təşəkkür edirəm. Veriliş çox ürəyimcədir, çox gözəl komandamız var, işləyirik. Azərbaycan Televiziyası da bizim doğma yerimizdir, belə desək alma materdir. (Adətən bu ifadə mənəvi qida verən müəssisə anlamında işlədilir.- red.) Bilirsiniz ki, noyabrın 6-da Radio və Televiziya Gününü qeyd edəcəyik, çünki əsas radionun bayramıdır, televiziyanın bayramı 14 fevraldır, amma ümumiləşdirərək 6 noyabrda bunu daha geniş şəkildə qeyd edirlər. Sağ olsunlar, Azərbaycan Televiziyası da məni tədbirə dəvət edib. Yəni hara getsək, AzTV bizim doğma məkanımızdı, təbii ki, iyirmi beş il işlədiyim bir yerdir”.
