Azərbaycan hər zaman beynəlxalq bazarlarda enerji resurslarının etibarlı təchizatçısı olmuşdur. Hazırda ölkəmizdə 2,6 trilyon kubmetr qaz ehtiyatı məlumdur. Texnologiyaların sürətlə inkişafı deməyə əsas verir ki, Azərbaycanın isbat edilmiş qaz ehtiyatları daha da çox olacaq. Azərbaycanın enerji siyasəti həmişə çox açıq, şəffaf, biznes və nəticələrə hesablanmış olub, əməkdaşlığa və qarşılıqlı dəstəyə gətirib çıxarıb. Ölkəmizin beynəlxalq miqyasda aparıcı enerji lahiyələrində özünəməxsus rolu vardır. Xüsusən Cənub Qaz Dəhlizi kimi iri lyihələrdə əvəzedilməz tərəfdaş hesab edilən Azərbaycan üçün bu layihə həm iqtisadi əhəmiyyəti, həm də siyasi önəmi var. Cənub Qaz Dəhlizi həmçinin, Avropanın enerji təhlükəsizliyində əvəzsiz rol oynayır.
Cənub Qaz Dəhlizi layihəsinin iştirakçıları olan ölkələr – Türkiyə, Gürcüstan, Yunanıstan, Bolqarıstan, Albaniya və İtaliya layihənin həyata keçirilməsində bir komanda olaraq effektli çalışıb. Hər il yeni nailiyyətlər qeyd olunur. Cənub Qaz Dəhlizinin uğurla tamamlanması bütün iştirakçı dövlətlərin nailiyyətidir.
Cənub Qaz Dəhlizi layihəsinin tamamlanmasından sonra Azərbaycanın beynəlxalq bazarlara, o cümlədən Avropa bazarlarına ixrac potensialı artmış və eyni zamanda ölkəmiz Avropa dövlətləri üçün əsas enerji təsisatçısına çevirilmişdir. Təbii ki, ölkəmizdə də əhalinin sayı artdıqca istehlak və tələbat da artmaqdadır. Həyata keçirilməkdə olan iqtisadi layihələr və islahatlar nəticəsində ölkə iqtisadiyyatında xüsusi sıçrayışlı inkişaf nəzərə çarpmaqdadır.
Azərbaycan iqtisadiyyatının bütün sahələrində olduğu kimi, sənayenin inkişafında da böyük uğurlar qazanılmışdır. Bu iqtisadi uğurlar daxili tələbatın ödənilməsində başlıca rol oynamaqdadır. Son illər ərzində rəqabət qabiliyyətli müasir sənaye sahələrinin yaradılması, infrastruktur təminatının yaxşılaşdırılması istiqamətində çoxsaylı layihələr icra edilmiş, xeyli iş yerləri açılmış, ölkə sənayesi yeni inkişaf mərhələsinə qədəm qoymuşdur. Xüsusən istehsal texnologiyalarının təkmilləşdirilməsi, müasir yönümlü bazar iqtisadiyyatının tələblərinin uyğunlaşdırılması bu iqtisadi uğurlarımızı daha da yüksəltməkdədir. Həmçinin enerji istehsalında yüksək nəticələrin əldə edilməsi, enerjiyə olan daxili tələbatın ödənilməsinə və Azərbaycanın beynəlxalq aləmdə əsas enerji təchizatçısına çevirilməsinə səbəb olub. Azərbaycanda 100% elektrikləşmə mövcuddur. Bu gücün alınmasında istilik elektrik stansiyaları 60% payla üstünlük təşkil edir.
Ölkəmiz son zamanlar mövcud istehsal və ötürücü güclərin artırılması və modernləşdirilməsi üzrə irimiqyaslı investisiya proqramını həyata keçirməsinə nail olmuş, enerji resurslarının istehsalı infrastrukturunun irimiqyaslı yenidən qurulmasını həyata keçirmişdir. Bu gün ölkəmiz qonşu ölkələrlə transsərhəd elektrik enerjisi ticarəti aparır və əsasən, Gürcüstan və Türkiyəyə elektrik enerjisi ixrac edir. Bu isə o deməkdir ki, artıq Azərbaycan elektrik enerjisinin xalis ixracatçısıdır və elektrik enerjisi istehsalı üzrə öz izafi istehsal potensialından istifadə edərək regional bazarda öz sözünü deyir.
Dünyada yaşanan, pandemiya nəticəsində dərinləşən böhran, əlbəttə ki, bir çox şirkətlərə mənfi təsir göstərib. Ancaq bu şəraitdə də dövlət başçısının uzaqgörən və ağıllı siyəsəti nəticəsində Azərbaycan elə addımlar atır ki, postpandemiya dövrünə ən hazırlıqlı ölkələr sırasında ola bilsin. Nəticədə, ölkəmiz vaxt itirmədən bütün sahələrdə yeni inkişaf dinamikasına sahib olacaq.
Ülviyyə Mirzəyeva,
Salyan rayon Xurşud kənd ümumi orta məktəbin direktoru
