Böyük Britaniyanın “London Post” saytında Azərbaycan millət vəkili Cavanşir Feyziyevin və Böyük Britaniya Nümayəndələr Palatasının üzvü Bob Bləkmənin birgə müəllifi olduqları məqalə çap olunub.
Bizimaz.az xəbər verir ki, “Xocalı soyqırımı və onun qurbanları” adlı məqalə Xocalı soyqırımının 29-cu ildönümünə həsr olunub.
Məqalədə bildirilir ki, 1945-ci ildən sonra yaradılmış və bütün dünya tərəfindən qəbul olunmuş beynəlxalq norma və prinsiplərə zidd olaraq, Azərbaycanının ərazi bötövlüyünə qarşı silahlı hücum yolu ilə onun Dağlıq Qarabağ bölgəsinin və ona bitişik 7 rayonun işğal olunması və bu ərazilərdən bütün azərbaycanlıların etnik təmizlənməyə məruz qoyulması sadəcə Ermənistan tərəfindən beynəlxalq qanunların pozulması deyil. Hələ 1980-ci illərdən başlayaraq son 30 il ərzində Ermənistan dövləti Azərbaycana qarşı çoxsaylı müharibə cinayətləri, insanlığa qarşı cinayət və soyqırım cinayətləri törədib. Bu cinayətlər yüzminlərlə azərbaycanlının fundamental insan haqlarından, o cümlədən öz dogma torpaqlarında yaşamaq hüququndan məhrum olması ilə nəticələnib.
Məqalədə Xocalı soyqırımının tarixi və təfərrüatı barədə geniş məlumat verilib. Müəlliflər həmçinin 27 sentyabr – 10 noyabr tarixlərində baş vermiş 44 günlük Vətən müharibəsinin nəticələri haqqında da Britaniya oxucularına məlumat verib, torpaqlarımızın azad olunmasını ədalətin bərqərar olunması kimi dəyərləndiriblər.
Məqalə müəllifləri Bob Bləkmən və Cavanşir Feyziyev bildiriblər ki, ərazi bütövlüyünün təmin olunması Ermənistanı Azərbaycana qarşı törətdiyi cinayətlərə görə məsuliyyətdən azad edə bilməz. Son 30 il ərzində Ermənistan tərəfindən Azərbaycan ərazisində törədilmiş bütün cinayətlər, o cümlədən Xocalı soyqırımı ən xırda detallarına qədər öyrənilməli və Ermənistan beynəlxalq ədalət məhkəməsi qarşısında cavab verməlidir.
Məqalənin original variantını BURADAN oxuya bilərsiniz.
